Gobran bäri ütiäte aune organización krikri ye ñan ni mikanina nüne jäme jabe. Rübare Kri Bobukäre näire nükebe nengwane rüta bäri käbiti tibien. Nitre 2,000 millón tä nüne kä känti nitre tä rüre.

 ¿Ñobätä nitre ñan tä nüne jäme? ¿Biblia tä kukwe mike garebätä?

1.  1. Nitre tä ja ngwen ño ni näire ye Biblia tä mike gare: “Nitre rabai ja aibe tarere, ngwian tarere, ja käikitekä, bike kri, blite diän diän, [...] ñaka rabai ja ngwen metre, [...] rabaitre kukwe ngwarbe niere ni madabätä, ñaka rabaitre ja gobraine, rabaitre nitre mada nuainne tare, [...] rabaitre ja dokwä mike ribi, rabaitre bike bäri kri” (2 Timoteo 3:2-4, TNM). Nitre töita ne erere köböite ñan tädre kä töibikaire kukwe kwin nuainkäre.

2.  2. Ni iti kaibe o ja ñäte ni madabe ñan raba kukweta nemen kisete ye ükete akwle. Jehová a Ni Sribekä aibe raba kukwe ükete. “Ni kä nebätä ie ja jie ngwandre ño ye ñaka gare jire” ye drieta Bibliabätä (Jeremías 10:23).

3.  3. Ni käme aune dite abokän tä kä tibien ne gobrainne. Ni ye “tä näin ni ngökö kwati kä jökräbti temen” (Apocalipsis 12:9). Ni ye abokän Satanás, niara ara kädekata Ni Käme (1 Juan 5:19). Kä tibien ne täi Ni Käme kisete ngwane, nitre rabai ngüdrärekä aune rüre jabe.

 Ngöbö aibe raba ni mike nüne kä jäme te, ni kä tibienbätä ñan nuaindi nieta Bibliakwe.

•   “‘Ñobätä ñan aune ti töita ño mun kräke ye gare kwin tie’, nieta Jehovakwe. ‘Ti tö mun tuai nüne jäme aune ñaka ja tare nike. Kukwe kwin rabadre ja känenkäre munkwe aune munkwe tö ngwandre kukwe kwin ie ye ie ti tö’” (Jeremías 29:11).

 ¿Kukwe käbämikata ne Ngöbökwe mikai nemen bare ño? Biblia tä niere: “Ngöbö kä jäme bianka nie, ye käkwe Satana mikadi tükarekä jötrö ngwarbe ja ngoto täni” (Romanos 16:20). Gobran tä kä kwinbiti köböire Ngöbökwe kä jäme mikai kä tibienbätä. Biblia tä kädeke “Gobran Ngöbökwe”. Jesukristo abokän rei gobran Ngöbökwe yete (Lucas 4:43). Jesukwe rabai gobrane käbiti tibien ngwane, ni jökrä rabai nüne jäme (Isaías 9:6, 7).

•   Mä tö raba kukwe mada mikai gare jai ngwane, artículo kädekata “¿Qué cosas logrará el Reino de Dios?” yebätä mäkwe ñäkä.