Kukwe bäri kwin ja jie ngwankäre ye tä Bibliabätä. Aisete mä tö nünain kwin ngwane, mäkwe ñäkädrebätä, töbikadretaribätä aune kukwe nüke gare mäi ye mikadre täte (Josué 1:8; Salmo 1:1-3). Ne madakäre, Ngöbö aune Monso kwe ye rükai gare mäi aune ye köböire mä raba nemen kwäre (Juan 17:3, TNM).

¿Tärä keteitire keteitire Bibliabätä yebätä ñäkä raba ño? Nuain raba jene jene. Programa ñäkäkäre Bibliabätä ye ükaninte ne kwe tärä ükaninte jatäri ye ererebätä mäkwe ñäkädre o ükaninte jene jene yebätä mäkwe ñäkädre. Ñodre, kapitulo ruäre täräi mikaninkä yebätä mä raba ñäke ne kwe Ngöbökwe ja ketabare ño nitre israelita ben ye rabadre gare mäi. O mada täräi mikaninkä yebätä mä raba ñäke ne kwe siklo kena yete konkrekasion kristiano ye ükaninte ño aune jatani nirien ño ye rabadre gare mäi. Kapitulo ükaninte yebätä mäkwe ñäkäi köbö kwatire kwatire ngwane, kä kwati te mäkwe ñäkäi täte Bibliabätä.

Mä tö ñäkäi Bibliabätä mantre jetebe, mä tö ñäkäibätä kä kwati te o mä tö ñäkäi jerekäbebätä ngwane, programa nebiti mä raba nuainne. Programa ñäkäkäre Bibliabätä ne mä raba denkä Internete jai o imprimire kömikakäre.