Organización Mundial de la Salud käkwe bren tare COVID-19 ye mikani gare marzo 2020 ngwane, kä rikai kwati ta ye bitikäre bren ye tädi ye nitre ñaka bämikabare ja töite. Bren tare ne köböite, nitre kwati aune nitre testiko Jehovakwe käkwe ja tare nikabarera, ja ngrabare, ja töite aune ngwian ñakare yebätä. ¿Bren tare ne näire nitre testiko käkwe ja ükaninte ño ja mräkätre kwe dimikakäre?

 Comité de Coordinadores nitre braibe konkrekasion jökrä ngübabitikä nitre testiko Jehovakwe, käkwe Comite de Socorro 950 jire ükaninante ja tuakäre bren tare COVID-19 ye ben. Kukwe ruärebätä comité käkwe kukwe ükaninte nitre dimikakäre kukwe tare tä nemen bare ye näire kä yekänti, kukwe madabätä gobrantre tä kukwe ükete nitre dimikakäre ye nitre testiko Jehovakwe tärä kain ngäbiti. Ne madakäre, Comité de Socorro käkwe kukwe ükaninante krubäte nitre dimikakäre.

 Ñodre, dre nemen bare Paraguay ye ani mike gare jai. Bren tare ye köböite, ngwian ñaka krubäte nitrekwe yebätä nitre nünanka Paraguay yekwe mrö ñaka bökän kwetadre. Akwa Comité de Socorro Paraguay ye jatanina bolsa döräire bämän krobu kräke. Bolsa kratire kratire yete mrö, jondron kä mikakäre mrebe aune jondron ja sribekäre ye biani nitre ja mräkäre nibokä nünanka jabe ie, jondron jökrä ye ütiä 30 dólar näre.

 ¿Nitre sribikä ja töi jeñebiti ye tä dre nuainne ja ngübakäre aune nitre mada ngübakäre bren COVID-19 yebätä? Tätre mascarilla ngwen aune ñaka nünenkä ja ken mikata gare ye ererebätä. Aune nire tä niken mrö ngwena ye rabadre sribire kä kwin känti aune ja ngübadrebiti kwin kwetre ye mikata gare ietre. Nire tä kise mike jondron yebätä ye rabadre jondron kite jabätä ja ngübakäre, rabadre kä bätete, karo ye bätete aune medente jondron ye ükakröta ye tädre bätäninte kwin ye mikata gare ietre. Ne madakäre, nire tä niken jondron ye döräire ye ñaka tä nemen ja ken tä niken jondron ye döräire ja mräkätrebiti ngwane.

 Enero kä 2021 yete, Comité de Coordinadores käkwe ngwian 25 millón dianinkä nitre dimikakäre COVID-19 ye näire. Sukursal aune Comité de Socorro tätre sribire kwin ngwian bianta yebiti aune tätre ja di ngwen dre ribeta ye kökakäre ütiä jakukwäre yebiti. Ñodre, Chile yete, ja mräkätre tä sribire nitre dimikakäre kukwe tare näire käkwe ja töi mikani lenteja kökö 750 kilo o (1.653 libra). Akwa lenteja ye ütiä namani bäri kabre sö käne ye kräke. Lenteja ütiä nämäne nuäi ye erere ja mräkätre käkwe ja töi mikani kökö. Akwa, ora nikani krobu ta ye bitikäre, ni jondron rürübäinkä ye käkwe blitabareta niaratre ben aune ni iti käkwe lenteja kökabare akwa biti ja namanenta bienta ye mikani gare kwe ietre. Ye medenbätä, niaratre ñaka lenteja ye ütiä biani ere krubäte, ñakare aune lenteja bianinta ye ni jondron rürübäinkä käkwe rürübäinbare ütiä nämäne nuäi käne ye erere.

 Akwa, ja mräkätre nikani lenteja ye tuinta ngwane, ni jondron rürübäinkä ye ñaka tö namani lenteja ye rürübäin ja mräkätre ie. Nitre mada nämäne nuainne erere niaratre ñaka nämäne jondron ye döräire kwin niebare kwe ietre. Ja mräkä iti käkwe orasion nuainbare käbube jötrö ngwarbe, biti nire nämäne jondron ribere bäri jai ye ngwanintari konkrekasion keteitire keteitire känti ye mikani gare kwe ni jondron rürübäinkä ye ie. Nitre nüne ño ye ererebätä jondron jene jene mika nämäne bolsa keteitire keteitire te mikani gare ja mräkätrekwe ie arato. Ye medenbätä, bolsa keteitire keteitire te jondron jene jene mika nämäne aune meden raba nemen bäri kwin niaratre kräke ye mika nämäne. Mrä mada, ngwian bianta ja töi jeñebiti nitre testiko Jehovakwe ie aune nire tä sribire yete, ye tä sribire ja töi jeñebiti ye ja mräkätre mikani gare ie. Ni jondron rürübäinkä ye töi namani niä. Ye medenbätä ja töi mikaninta kwe jondron ye rürübäine aune ja mräkätre jataninta lenteja kököta mada bati ngwane, niarakwe ja töi mikani lenteja 400 kilo (882 libra) ye bien ngwarbe ietre.

 Meri testiko niena umbre, muko krütani kän nünanka Liberia kädekata Lusu abokän tä nüne mräkätre nirike kwe ben. Bati dekä, niaratre nämäne mröre aune ñäke textobätä ngwane, mrö ñaka namanina ietre kwetakäre ye namani gare bräi chi kwe ie abokänbiti ka nämäne kwä kükü ye ie. “¿Nikwe dre kwetai mada?” ngwanintari monso chi yekwe. Mölöi kwe käkwe orabarera Jehovai ja di käräkäre ie aune niara nämäne dre ribere jai ye Jehovakwe biain ie, ye nämäne gare metre ie niebare kwe bräi chi kwe ie töi mikakäre jäme. Köbö ye arabe te dere, Lusu rikadre mrö tuin jai niebare nitre umbre ji ngwanka konkrekasionte yekwe ie. Niara tä niere: “Jehovata orasion nikwe kukwe nuin ye niena gare ti bräi chi ie, ñobätä ñan aune orasion tikwe kukwe nuabare kwe”.

 Meri iti nünanka República Democrática del Congo yete abokän tä nüne ja mräkätre testiko Jehovakwe ye ken. Ja mräkätre ye ie ja mräkätre testiko mada nämäne niken mrö bien ye jutuabare ie ngwane, niebare kwe: “Bren tare ne rikai ta ngwane, nikwe ja mikai testiko Jehovakwe, ñobätä ñan aune niaratre tä ja mräkätre mada kwetre ye töbikaire kä tare ne näire”. Muko kwe käkwe ngwanintari ie: “¿Aro bolsa kratibebätä mäkwe ja mikai testiko Jehovakwe?”. Niarakwe niebare ie: “Ñaka, ye ñan aibätä. Akwa niaratre tä ja tarere bökän ye niaratre tä bämike aro yebiti”.

 Munta ngwian bien ja töi jeñebiti ye köböire, nitre testiko Jehovakwe tä ja mräkätre kwetre dimike bren tare ne näire. Munta ngwian bien ja töi jeñebiti kukwe jene jene ükaninte donate.pr418.com yekänti yebätä nunta debe bien krubäte munye.