Karito yebiti kukwe drie niena kä kwäjätä te. Karito ye nitre tä gain jötrö ngwarbe kä jökrä känti. Nunta kukwe driere karitobiti ngwane, nun abokän nire tä nüke gare nitre ie. Ñan bä nuäre aibe, ñakare aune nuäre kukwe driekärebiti. Meri testiko kädekata Asenata, nünanka Polonia, niebare: “Karito ye ñan sribebare jondron bätäkä ngwarbebiti, akwa bä nuäre krubäte. ¡Aune nuäre ngwankäre kwäräkwära!”.

 ¿Ño köböire karito ye nuainta aune sribebare ño?

 Ja mräkätre Francia raba kukwe driere jondron madabiti, ñodre exhibidor yebiti ye Nitre Braibe Konkrekasion Jökrä Ngübabitikä niebare kä 2001 ye ngwane. Ja mräkätre kukwe driebare maletabiti aune karito jondron kökakäre yebiti, yete täräkwata mikani tuare kwetre aune ükaninte te kwetre. Biti, sukursal Francia käkwe diseño keteiti sribebare aune yebiti ja mräkätre kukwe driebare kä kwati te.

 Jondron yebiti kukwe driebare Francia ye namani bare kwin krubäte. Aisete kä 2011 ye ngwane, Nitre Braibe Konkrekasion Jökrä Ngübabitikä kukwe ükaninte ne kwe juta Nueva York (Estados Unidos) yete, kukwe driedre karito aune mesabiti nitre jökrä ngwärekri. Karitobiti kukwe drieta kwin namani gare nitre prekursor kukwe driebare karitobiti ye ie. Ñodre ngwan namani kwin kwäräkwärä. Akwa ükate raba bäri kwin nükani gare ietre arato. Yebätä kukwe ruäre kwitadre niebare kwetre. Kena karito ye sribebare kribiti aune ñan nämene nemen nuäre ngwankäre kunkwäre aune kalerabätä kwintubu. Aisete karito ye sribebare bäri juto akwa murie matadre ngwane ñan rikwitadrekä tibien. Llanta bäri kri mikanibätä ye köböire rabadre bäri nuäre ngwankäre ji ñaka kwin teta. Ne madakäre, cajón mikanibätä täräkwata ngwankäre bäri ere.

 Kukwe mrä ükaninte kukwe driekäre yebiti kukwe kwin namani bare. Aisete kä 2012 ye ngwane, karito yebiti kukwe driedre kä jökräbiti ye ükaninte Nitre Braibe Konkrekasion Jökrä Ngübabitikä yekwe. Karito sribedre kabre jondron ñan dobokobiti aune ñan rikadre ngwarbe jötrö, yekäre blitabare ni iti ben.

 Kä nikani ta ngwane karito ye ükate jatani bäri kwin. Ñodre kä 2015 ye ngwane, täräkwata plástico mikanibätä kriemikakäre ñübätä. Kukwe ye tuen kwin krubäte meri testiko kädekata Dina, nünanka Georgia ie. Niarata niere: “Täräkwata plástico tä karitobätä ye köböire tä kriemikani”. Kä 2017 ye ngwane, cartel magnético mika jatani nitre blitaka kukwe ruärebiti kräke. Ja mräkä nünanka Polonia kädekata Tomasz tä niere: “Cartel adhesivo kwitadre ye ñan nuäre. Akwa cartel magnético yebiti sribita kwin krubäte”. Kä 2019 ye ngwane, karito sribe jatani jondron bäri ribi yebiti aune ñan rikadre ngwarbe jötrö yekäre.

 Ni itibe tä karito jökrä ye sribere, biti karito ye döröita kä jökräbiti tibien. Karito kratire kratire ye ütiä 43 dólar, juandre aune rürübän ütiä mada kräke ye kräke ngwian kitakata, ye nuäi ñan tänta nete. Exhibidores portátiles 420,000 biti bäri juanina konkrekasion ie kä jökräbiti tibien aune karito yebätä ngwian kitaninanka 16 millón biti bäri.

 Ngwian bianta ye ñan kitakakäre ngwarbe, karito ye kökata kabre krubäte. Ne madakäre, pieza karito yekwe tä niken ngwarbe ngwane, konkrekasion keteitire keteitire tä pieza ye kökö karito ye ükatekäre. Ye köböire karito mrä ñan kökata.

 Käta nemen juto ja mräkätrebätä kukwe driekäre karitobiti. Martina nünanka Ghana tä niere: “Nita niken kukwe driere ngwane, nita niken nitre yekänti. Akwa karito yebiti kukwe drieta ngwane, nitre ye tä kite nikanti, kukwe ye tuen kwin tie. Ni jökrä tä niken ta aune karito tuata kwetre, yebiti kukwe mikata gare ietre”.

 Juta mada África yete, ni iti nikani karito kukwäre aune täräkwata niara kukweibiti ye nikani ngwena ruäre jai. Bämän nikani krati ta ngwane, janamanenta karito yekänti aune niebare kwe ja mräkätre ie. “Täräkwata jökrä yebätä tikwe ñäkäbarera. Kukwe nietabätä ye ütiäte krubäte, aisete ti bike nikenta ti käite ti mräkätre käkwe ñäkädrebätä yekäre”. Ni ye mräkätre nämene nüne 500 kilómetro näre mentokwäre. Sö nikani krubu ta ye bitikäre, ni ye namaninta karito känti aune niebare kwe ja mräkätre ie: “Nitre ti käite yekwe ñäkäbarera täräkwata jökrä yebätä aune kukwe nietabätä ye tuen kwin krubäte ietre. Niaratre tö ja mikabätä testiko Jehovakwe. Akwa kukwe ruäre ngwantarita kwetre. Ñodre, ja ngökakäre ñöte ni ngökadre täte ñöte gare ietre. Akwa niaratre käite ñö kri ñakare jire. ¿Yebätä jatadre nete ja ngökakäre ñöte?”. Ja mräkätrekwe kukwe ükaninte ne kwe prekursor iti blitaka ni ye kukweibiti blitadre ben yekäre. Yete ja käne niaratre nibu ye tä blite käre jabe.

 Karito yebiti ‘kukwe kwin Gobran Ngöbökwe yebätä ye drieta kä jökräbiti tibien kukwe mikakäre gare nitre juta jökrä te ie’, ¡ye kwin krubäte! (Mateo 24:14). Ngwian bianta ja töi jeñebiti kä jökräbiti tibien, metrere donate.pr418.com yebiti, ye köböire karito ye kökata. ¡Munta ja töi mike mantiame yebätä tä debe krubäte!