Nitre tä ükaninte kukwe kwitakäre mantre jetebe ye tä mente oficina kukwe kwitakäre (ORT) yete aune ñaka sukursalte. ¿Ye köböire kukwe meden kwin tä nemen bare? ¿Nitre kukwe kwitaka tä ORT yete ye tätre dre ribere jai? ¿Ñobätä kukwe kwitata ORT yete ye köböire kukwe kwitata bäri kwin?

 Oficina kukwe kwitakäre tä mente, ye köböire nitre kukwe kwitaka raba nüne nitre blitaka kukwe yebiti ye ngätäite. Karin, abokän kukwe bajo alemán yebiti tä kukwe kwite, tä niere: “Nunkwe ja kwitaba ORT Cuauhtémoc, Chihuahua (México) yete ngwane, nunta blite kukwe bajo alemán yebiti käre. Nitre kukwe kwitaka ben o nunta niken kukwe driere ye ñan aibe ngwane nunta blite ja kukweibiti, ñakare aune nunta niken jondron kökö ye ngwane arato. Nitre blitaka kukwe yebiti ye aibe nun bäre. Kukwe meden nun ñaka kukwe nuabare mekerabe ye nunta kukwe nuinta. Aune nitre tä blite ño mantre jetebe ye niena gare nunye”.

 James nünanka Ghana aune tä sribire nitre kukwe kwitaka kukwe Frafra yebiti ben. Ja mräkätre nünanka Betelte ye ulieita kwe mikata gare kwe. Akwa tä kukwe ne niere arato: “Tita ORT nete ye tuin kwin krubäte tie. Tita kukwe driere nitre nünanka yete ye kukweibiti aune kukwe kwin Ngöbökwe ye nitre tä kain ngäbiti ño ye tita tuen, ye tä kä mike juto krubäte tibätä”.

 ¿Medente ORT mikadre ye rabadre kwin ye ñokänti tä nemen gare? Joseph, sribikä Departamento Mundial de Diseño y Construcción tä Warwick (Nueva York) yete, niara tä niere krörö: “Kukwe ruäre ben nunta ja tuen ye abokän kä ruäre känti ñö o electricidad ye ñaka käre aune internet tä yete yebiti jondron dianka ñaka raba jai kukwe kwitakäre. Aisete, ORT mikadre medente ye känenkri, kä keta kabre känti blitata nitre ye kukweibiti ye nunta mike gare kwin jai”.

 Ruäre ngwane, ORT ye mikadre Ju Ja Ükarakrö yete, Ju Gätä Kri kräke yete, o ju nitre misionero kräke yete, ye bäri jötrö aune ñan ngwian kitakata krubäte, ye köböire nitre kukwe kwitaka kräke raba nemen nuäre rükakäre yete. Akwa kukwe ne erere ñan raba nemen bare ngwane, ja mräkätre raba kukwe ribere ju keteiti o oficina keteiti kökakäre ne kwe ja mräkätre kukwe kwitaka ye raba sribire aune nüne te. Nitre kukwe kwitaka ye tä kukwe mada mada ribere jai ngwane, ju ye rürübäin raba aune ngwian yebiti dre mada ribeta ye nuain raba.

 Kä 2020 ye näire ngwian kitaninkä 13 millones ORT ye ngibiakäre. Nitre kukwe kwitaka ye tä computadora, programa ükaninte kwin computadora kräke, jondron kukwe grabakäre, internet aune jondron mada mada ye niaratre tä ribere jai. Ñodre, computadora kökadre, rabadre ükaninte kwin aune programa rabadre mikani te yekäre ngwian ribeta 750 näre. Ne madakäre, nitre kukwe kwitaka ye tä programa Watchtower Translation System ye ribere jai, sribi ükatekäre aune kukwe meden ribeta kwetre jai kwitakäre ye känänkäre.

 Nitre kukwe kwitaka ie jondron grabakäre oficina kwetre te ye biani ietre arato. Kukwe ye namani kwin krubäte bren tare COVID-19 nükani ye näire, ñobätä ñan aune nitre kukwe kwitaka kwati nikani jondron ye ngwena ja gwirete aune ye köböire täräkwata aune video keta kabre ye niaratre nikani kwite jankunu.

 Ne madakäre ja mräkätre nünanka yete ye kwati tätre ja mräkätre dimike kukwe kwitata ye tuinte aune oficina ye ngibiakäre. Cristin tä sribire oficina kukwe kwitakäre afrikáans Ciudad del Cabo (Sudáfrica) yete, niara tä niere: “Kukwe gare ja mräkätre aune ja mräkätre sribikä prekursor regular ie, ye niaratre raba sribire nete arato.

 Ja mräkätre sribikä yete yebätä käta nemen juto krubäte. Ñodre, sribidre ORT yete ye abokän “murie tipo ngösöi nibätä ye kwrere” meri testiko iti tä niere . Ja mräkätre nünanka yere ye ruäre tä ja kukwei ye grabare. Veracruz (México) yete, Juana, tä sribire kukwe kwitakäre kukwe totonaco yebiti, niara tä niere: “Nunta nüne nitre blitaka nun kukweibiti ye ngätäite, ye köböire nemen bäri nuäre ja mräkätre kräke jatakäre audio täräkwata kräke aune video ye grabare”.

 Akwa ¿erametre sribita ORT yete ye köböire kukwe kwitata bäri kwin? Nitre kwati ñäkäkä täräbätä tä jän niere. Cédric, tä kukwe kwite kukwe Congo yebiti República Democrática del Congo yete, niara tä niere: “‘Watch Tower’ yebiti nun nämä kukwe kwite congo yebiti nie nämä ja mräkätrekwe nunye, ñobätä ñan aune niaratre kukwei ño ye erere ngö ñaka nämä nemenkä. Akwa nengwane nunta kukwe kwite congo erametre yebiti nieta kwetre, ñobätä ñan aune blitata ño köbö kwatire kwatire ye erere ngö nemenkä”.

 Andile tä kukwe kwite kukwe xhosa yebiti aune kukwe ye erere nemen bare Sudáfrica yete ye niara tä niere: “Kukwe kwita ñaka niena käne erere ye ja mräkätre kwati tä gain. Monsotre kia nämene ñäke käne täräkwata La Atalaya inglere yebätä, akwa nengwane tä ñäke täräkwata xhosa yebätä. Biblia Traducción del Nuevo Mundo tuaninteta ye tuen kwin ja mräkätre ie ñobätä ñan aune ngö nemenkä bäri kwin”.

 Ju sribeta ORT yete, ngübata aune ja mräkätre tä sribire yete, ye jökrä ütiä bianta ngwian bianta ja töi jeñebiti sribi Ngöbökwe nuainkäre kä jökräbiti tibien yebiti aune ngwian bianta donate.pr418.com yebiti arato.