Evangelio Marcokwe 12:1-44
-
Ni nura nökaka ni murie ketaka yebätä kukwe bämikata (1-12)
-
Ngöbö aune Rei Romano (13-17)
-
Ni mikaita nire yebätä kukwe ngwantarita (18-27)
-
Kukwe ketebu nuain mananbare bäri ütiäte (28-34)
-
¿Kristo kite nirekri? (35-37a)
-
“Mun ja ngübabiti nitre escriba yebätä” (37b-40)
-
Ngwian chi kubu meri bobre kän muko krütani yekwe (41-44)
12 Ye bitikäre blitakäre bentre nikani kukwe bämike ietre. Niebare kwe ietre: “Ni iti kä bäkänkä käkwe uva nökani biti ketaninkä kwe. Ne madakäre, yete kä uva tükakakäre* sribebare kwe aune ju mente kwin sribebare kwe. Ye bitikäre ni ye käkwe uva tirei ye alquilabare nitre nura nökaka ruäre ie biti nikani juta madate.
2 Kä nükani ngwane, kä bäkänkä käkwe ni klabore iti kwe juani uva ngwä biandre ie, nitre nura nökakakwe ye tuin.
3 Akwa neketaninte nitre nura nökaka yei, metani kwetre aune juaninta kise tökare kwetre ja jiebiti.
4 Kä bäkänkä käkwe ni klabore kwe mada juani, ne metani dokwäte kwetre aune ñan mikani ütiäte kwetre jai.
5 Ye bitikäre kä bäkänkäkwe mada juani, akwa murie ketani. Aune ni klabore mada juani bäri kwatí kwe, akwa nitre nura nökakakwe niaratre ruäre metani aune mada abokän kämikani kwetre.
6 Ni iti nämäne juandre ie, ye abokän ngobo tare kwe. Mrä mada ngobo juani kwe, ñobätä ñan aune namani niere: ‘Ti ngobo mikai ütiäte kwetre jai’.
7 Akwa nitre nura nökaka ye käkwe niebare jai: ‘Ni nekwe jondron rünkwe rabai. Aisete ani kämike, ye köböire jondron rabai kwe ye rabai nikwe’.
8 Aisete nakani ietre, kämikani kwetre aune kitani kwetre uva tire ye bäre mento.
9 ¿Dre nuaindi uva tirei bäkänkä yekwe? Jatai aune nitre nura nökaka ye murie ketai kwe aune uva tirei ye biain kwe nitre madai.
10 ‘Nitre ju sribekäkwe ñaka jä kani ngäbiti, jä ye namani bäri ütiäte’,* nieta Ngöbö Kukweibätä, ¿yebätä munkwe ñan ñäkäbare jire?
11 ‘Jä ye kite Jehovakri* aune ni kräke kukwe ye ñan tuabare tä nemen bare ni okwäbiti’, ¿yebätä munkwe ñan ñäkäbare?”.
12 Nitre ja mikaka rüere ye ben töbätä,* Jesús nämäne kukwe bämike ye nükani gare jabätä ietre, aisete tö namanintre kai ngite, akwa nitre kwatí ye jürä namani bätätre. Aisete tuanimetre kwetre aune nikanintre mento.
13 Ye bitikäre nitre fariseo ruäre aune nitre reketaka Herodekri ruäre juani kwetre, ne kwe Jesús nämäne blite ño yebiti rakadre* ietre yekäre.
14 Namanintre ngwane, niebare kwetre ie: “Dirikä, gare nunye, käre mäta kukwe metre niere aune nitrekwe mä kadre ngäbiti ye mä ñan tä ngübare, ñobätä ñan aune nitre ño ye mä ñan töibikaire, ñakare aune mäta kukwe metre Ngöböbätä driere. Impuesto ütiä biandre Rei Romano* ie, ¿ye kwin o ñakare?
15 ¿Nunkwe ütiä biandre o nunkwe ñan ütiä biandre?”. Akwa niaratre nämäne kukwe ngwentari töi blobiti ye nämäne gare ie, aisete niebare kwe ietre: “¿Ñobätä munta ti nuinte? Denario* ngwen kwati tuadre tie”.
16 Aisete jatanintre ngwena ie aune niarakwe ngwanintari ietre: “¿Nire üai aune nire kä tä tikani nete?”. “Rei Romano üai aune kä tä tikani yete”, niebare kwetre.
17 Jesukwe niebare mada ietre: “Jondron Rei Romanonkwe ye erere biandre Rei Romano ie, akwa jondron Ngöbökwe ye erere biandre Ngöböi”. Aune niaratre töi namani niä niarabätä.
18 Ye ngwane nitre saduceo,* abokän tätre niere ni ñan gaikröta, ye jatani aune ngwanintari kwetre ie:
19 “Dirikä, Moisekwe kukwe ne tuanimetre tikani nunye, ni iti, eteba krütadre aune muko rabadre ie, akwa monso ñan rabadre kwe ngwane, ni ne rabadre ja mäkete meri namani kaibe yebe ne kwe rabadre monso bien eteba mre krütani yei.
20 Bati ni ja etebare nämäne ni kükü. Ni ja etebare ye mubai käkwe ja mäkäninte, akwa monsoi ñaka ngwane krütani.
21 Aune eteba nibukäre yekwe ja mäkäninte meri namani kaibe yebe, akwa monsoi jämi nemen ngwane, krütani arato, ye erere namani bare eteba nimäkäre yebätä.
22 Aune nitre ni kükü yekwe monsotre ñan namani. Krütani jökrä ye bitikäre, merire ye krütani arato.
23 Köbö te nitre mikaita nire ngwane, ¿meri ye rabai niaratre ni kükü ye medenkwe? Ñobätä ñan aune niaratre ni kükü yekwe ja mäkäninte meri yebe”.
24 Jesukwe niebare ietre: “Ngöbö Kukwei aune Ngöbö die nuäi ye ñan gare munye yebätä mun töita blo, ¿ye ñan tuin munye?
25 Nitre gaikröta nitre ngwakare ye ngätäite ngwane, nitre brare aune merire yekwe ñaka ja mäkäite, ñakare aune niaratre rabai angeletre tä kä kwinbätä ye kwrere.
26 Akwa nitre ngwakare mikaita nire* yebätä, tärä Moisekwebätä Ngöbökwe niebare ie kri chi yete: ‘Ti abokän Ngöbö Abrahankwe, Ngöbö Isaackwe aune Ngöbö Jacobkwe’, ¿yebätä munkwe ñan ñäkäbare?
27 Niara ye ñaka Ngöbö ni ngwakarekwe, ñakare aune niara Ngöbö ni nirekwe. Munta kä ikote”.
28 Ñäkä nämäne jai ye escriba iti nükani käkwe kukwe nuani. Jesukwe kukwe mikani gare kwin ietre ye jutuabare ie ngwane, ngwanintari kwe ie: “¿Kukwe nuain mananbare jökrä ye meden abokän käne?”.
29 Jesukwe niebare: “Kena ye abokän: ‘¡Kukwe nuin, Israel! Jehová, Ngöbö nikwe, ye Jehová itibe.
30 Mäkwe Jehová Ngöbö mäkwe, tare ja brukwä tätebiti, ja nire tätebiti, ja töi tätebiti aune ja die tätebiti’.
31 Aune ketebukäre abokän ne: ‘Mäkwe ni mada tare mäta ja tarere ño ye erere’. Kukwe ketebu nuain mananbare nebiti ta mada ñan bäri ütiäte”.
32 Escriba yekwe niebare ie: “Dirikä, kukwe metre ererebätä, mäkwe kukwe era nini: ‘Ngöbö itibe aune Ngöbö mada ñaka’,
33 aune taredre ja brukwä tätebiti, kukwe nüke gare tätebiti aune ja die tätebiti, ni mada taredre ja tareta ño ye erere, ye bäri ütiäte jondron bianta kukwadre aune jondron nire bianta kämikadre ye kräke”.
34 Aune kukwe töbätäbiti blitabare kwe ye jutuabare Jesús ie ngwane, niebare kwe ie: “Mä ñan tä mente Gobran Ngöbökwe yebätä”. Yete ni mada ie ja ñan nükani törö jire kukwe ngwantarikäre ie.
35 Akwa Jesús abokän nämäne dirire jankunu templote käkwe ngwanintari: “¿Se ño amare nitre escriba tä niere Kristo kite Davidkri?
36 Üai deme diebiti David ara käkwe kukwe ne niebare: ‘Jehovakwe nieba Däkien tikwe ie: “Täke ti kise ruinkri nememe tikwe mä rüe mikai mä ngoto täni ngwane”’.
37 David ara tä kädeke Däkien, ¿se ño amare Kristo kite Davidkri nie raba?”.
Aune nitre kwatí krubäte yebätä kä nämäne nuäre kukwe nuakäre.
38 Nämäne dirire ngwane, niebare kwe ietre: “Mun ja ngübabiti nitre escriba yebätä, niaratre töta nemen basai dän nga aune bä nuäre te aune köbö kwin niedre ie kä jondron rürübäinkäre yekänti,
39 aune täkärä tä käne sinagogate yete niaratre töta nemen täkäi aune mröta* ngwane, niaratre töta nemen täkäi kä bäri ütiäte yekänti.
40 Meritre muko krütani yekän tätre jondron* denkä aune ja bämikakäre tätre orasion nga niere. Niaratre mikai ja ngie nuin bäri ni mada kräke”.
41 Aune namani täkäni känti caja ngwian kitara ye nämäne tuin ie, aune nitre nämäne ngwian kite ño te ye nämäne mike ñärärä aune nitre ngwian bäkäne krubäte ye nämäne ngwian mününe kite ere te.
42 Ye ngwane, meri bobre kän muko krütani jatani abokän käkwe ngwian mününe chi kubu ütiäte ñakare kitani.
43 Niarakwe nitre ja tötikaka kwe käräbare aune niebare kwe ietre: “Ti niere metre munye, meri kän muko krütani bobre, ne käkwe ngwian kiti bäri ere cajate nitre jökrä mada ye kräke.
44 Ñobätä ñan aune niaratre jökrä ye ie dreta nemente ye tä bien, akwa niara abokän bobre, käkwe ngwian jakwe jökrä kiti, dreta nünankrä ie ye jökrä bini kwe”.
Nota
^ O “ye ben töite”.
^ O “kain ngite”.
^ Lit. “César”.
^ Lit. “gaikröta”.
^ O “mrö sribeta ere derekri”.
^ Lit. “ju”.
