Evangelio Marcokwe 13:1-37
13 Jesús nikani templo bäre mento ngwane, ni ja tötikaka iti kwe käkwe niebare ie: “Dirikä, ¡jä bä nuäre aune kä ngöi jökrä templote bä nuäre ye mike ñärärä!”.
2 Akwa Jesukwe niebare ie: “¿Ju krikri templote ne tuin mäi? Jä jökrä tä nete ye jökrä dikainte aune jire kwati rabai ükaninte jabiti”.
3 Niara nämäne täkänintubu ngutuä Olivos yebiti, okwä templo yebätä ngwane, Pedro, Santiago, Juan aune Andrés käkwe ngwanintari kaibe ie:
4 “¿Ñongwane kukwe ye rabai bare aune jondron jökrä ne kitera krüte ye dre käkwe bämikai ye niere nunye?”.
5 Aisete Jesús nikani niere ietre: “Munkwe ja ngwan mokre. Ñan ja ngökamana.
6 Nitre kwatí jatai ti käbiti aune rabaitre niere, ‘Ye ti ara’ aune nitre kwatí ngökai kwetre.
7 Ne madakäre, rü rabai nakainkä mun bäre aune rü rabai nakainkä mente kädrie mun olote ngwane, ñan ja ngwan nikenkä, ñöbätä ñan aune kukwe ne tä rakadrekä, akwa kä krüte jämi nüke.
8 Ñobätä ñan aune nitre käkwe rüdi nitre mada rüere aune juta* käkwe rüdi juta mada rüere, bätä dobo krikri rabai mate kä jene jene känti, arato mrö nika rabai. Kukwe ne tä ja tare nikai kri krubäte ye krire kömike.
9 Munkwe ja ngübabiti, mun jänäin kwetre tribunal ye ngwärekri aune mun metai kwetre sinagogate aune ja tötikabätä tibe, mun mikai ja dibiti kwetre niken gobrantre aune reitre ngwärekri. Ye köböire munta tödeke tibiti ye rabai gare ietre.
10 Ne madakäre, kä krüte jämi nüke ye känenkri, käne kukwe kwin ye driedre nitre jökrä ie.
11 Akwa, mun kai ngite ngwankäre nitre kukwe ükatekä ngwärekri ngwane, munkwe dre niedi yebätä munkwe ñan ja töibika, ñakare aune yete munkwe dre niedre rabadi gare munye ye erere munkwe nie, ñobätä ñan aune mun ñan aikwe blitai, ñakare aune üai deme.
12 Ne madakäre, ni ja etebare käkwe eteba kwe biain kämikakäre aune ni rüne käkwe monso kwe biain kämikakäre. Aune monsotre rikwitaite rün kwe rüere aune kämika manain kwe.
13 Ti kä ngwanbätä jabätä,* nitre jökrä brukwä rabadi mun kräke. Akwa nirekwe kä ngwandi nüke jai nememe mrä ye rabai kwäre.
14 Ne madakäre, jondron käme krubäte aune kä juanka ngwarbe jutua munye nünaninkä ñan tädre yekänti ngwane (ni ñäkäkä kukwe nebätä käkwe mika nüke gare jai), nire täi Judea, ye gitia ngutuä kokwäre.
15 Nire täi jubiti kwin, ye ñan rika timo aune ñan rikata ja juete jondron tuakäre jire.
16 Aune nire täi tirete ye ñan rikadreta ja jiebiti dänkwä kri kitata dänbiti jai ye tuakäreta.
17 ¡Meritre täi murore o täi monsotre mike kianbätä kä ye ngwane, ye bobre jakän!
18 Munkwe ora jankunu ne kwe, ye ñan rabadre bare kä tibo aune kä ñüre näire.
19 Ñobätä ñan aune kä ye näire ja tare nikai kri.* Ngöbökwe ni kä nebätä sribebare yete nükebe nengwane ja tare nika ñaka ye erere, aune ñaka ja tare nikai jire ye erere.
20 Kä ye ñan krötadre Jehovakwe* ngwane, ni jire iti raba nemente kwäre. Akwa nitre dianinkä kwe yebätä kä ye krötai kwe.
21 Arato, ni iti käkwe nie munye ‘¡Nikren, Kristo tä nete!’ o ‘¡Nikren, tä sete!’ ngwane, munkwe ñaka mika era jai.
22 Ñobätä ñan aune kristo ngwarbe aune ni ngöbö kukwei niekä ngwarbe rükai, abokän käkwe kukwe ñan tuabare nuaindi nitre ngökakäre, aune raba nitre dianinkä Ngöbökwe ngökö ngwane, niaratre ngökai kwe arato.
23 Aisete munkwe ja ngübabiti, tita kukwe jökrä mike gare munye jämi nemen bare ye känenkri.
24 Akwa köbö ye ngwane, ja tare nikai ye bitikäre, ñänä gidiaite, sö trä ñan rabai jankunu,
25 muke kä kwinbiti ye rabai betekä timo aune di kri tä kä kwinbätä ye ngrükaite.
26 Ye ngwane Ni Kä Nebätä Monsoi ye jutuai ietre kite mutabiti di kri yebiti aune bä nuäre kri.
27 Niarakwe angeletre juain aune angeletre ye käkwe nitre dianinkä Ngöbökwe kä kiakia jökräbiti tibien ye ükaikrö, kä tibien nemen krüte, nememe kä kwin nemen krüte yete.
28 Higokrie yebätä ja kite. Krä mrä tä nemen därebe aune käta nemenkä ye ngwane, kä moren tärä nemen no ye tärä nemen gare munye.
29 Ye erere arato, kukwe ne jutua munye ngwane, Ni Kä Nebätä Monsoi nibira no jukwebätä ye rabadre gare munye.
30 Nitre kä ne näire jämi nekä jökrä ye känenkri, kukwe ne rabai bare jökrä ye ti mike gare metre munye.
31 Kä kwin aune kä tibien ye riaikä, akwa ti kukwei ye täi kärekäre.*
32 Akwa köbö ñongwane aune hora nuäi ye ñan gare ni jire iti ie, ñan gare angeletre kä kwinbiti ie, aune ñan gare Ngöbö Monsoi ie, gare ti Rün aibe ie.
33 Munkwe ja ngwan mokre, munkwe ja ngwan ngwäte, ñobätä ñan aune kä kitani ñongwane ye ñan gare munye.
34 Ne abokän ni brare iti, nikani juta madate ye kwrere, ju kwe tuanimetre kwe ngwane, nitre klabore mikani kwe ngübarebiti aune itire itire ie sribi biani kwe, aune jukwe ngübabitikä ye rabadre käre ja ngwen mokre niebare kwe ie.
35 Aisete käre munkwe ja ngwan mokre, ñobätä ñan aune ju bäkänkä rükaita ñongwane ye ñan gare munye, derekri o kä ruäre deu o kä jämi ngwen dekä* o dekä ngwarbe.
36 Nane mada bátibe jatadreta ngwane, mun kwandre kümien ie.
37 Tita kukwe niere munye ye tita niere ni jökrä ie: käre munkwe ja ngwan mokre”.
Nota
^ Lit. “reino”.
^ O “dikakabätä tibe”.
^ Ye abokän, rabai bare.
^ Lit. “antlan tä ngwäne ngwane”.
