Evangelio Marcokwe 3:1-35
3 Mada bati, niara nikani sinagoga keteiti te, aune yete ni brare iti kise nakwaninkä* nämäne.
2 Köbö ja dükakäre* aisete, Jesukwe ni ye mikaita räre o ñakare ye mikakäre ñärärä, nitre fariseo ñaka namani okwä denkä Jesubätä, ne kwe kitadre ngise kwetre.
3 Ye ngwane ni brare kise nakwaninkä* yei Jesukwe ribebare: “Näin krö aune jakwe kä tetubu nete”.
4 Ye bitikäre niebare kwe ietre: “¿Dre nuain raba köbö ja dükakäre te? ¿Kukwe kwin nuaindre o kukwe blo nuaindre? ¿Ja nire mikadre kwäre o ja nire diandrekä?”. Akwa niaratre namani kwekebe.
5 Jesukwe nikrabare rubune nitre nämäne niara bäre yebätä aune nitre ye brukwä ribi jutuabare ie ye namani tare ie, ye bitikäre niebare kwe ni brare yei: “Kise ngököte”. Aune ni ye käkwe kise ngökaninte ngwane, kise namaninta räre.
6 Ye bitikäre nitre fariseo kämikaninkä yete aune ye bengwairebe nikani ja ükekrö nitre reketaka Herodekri yebe, Jesús murie ketai ño ye ükatekäre.
7 Akwa Jesús nikani nitre ja tötikaka kwe ben ñö okwä kri Galilea* ye kokwäre, aune nitre kwatí krubäte Galilea aune Judea ye nikani jiebiti.
8 Arato nitre Jerusalén, Idumea, Jordán kädrikri aune Tiro bätä Sidón bäre tibien ye kwatí krubäte nükani, ñobätä ñan aune Jesús nämäne dre nuainne ye jökrä kukwe nuani kwetre.
9 Aisete ribebare kwe nitre ja tötikaka kwe ie, rabadre ru chi mike juto niara käne ne kwe nitre kwatí yekwe ñaka niara ketadre dime jabätä.
10 Ñöbätä ñan aune niarakwe nitre kwatí mikaninta räre, nitre jökräbätä bren tare krubäte nämäne ye namani ja kite bitikäre kise ketakakärebätä.
11 Arato üai käme ie niara nämäne tuin ngwane, nämänentre niken ngitiekä ngotobätä tibien aune nämäne ngrente: “¡Mä ye Ngöbö Monsoi!”.
12 Akwa Jesús ye abokän nire ye niaratrekwe ñaka mikadre gare jire ye niebare metre ta kwe ietre bati bobu.
13 Ye bitikäre nikani ngutuä keteitibiti aune nire kärä tö namani kwe ye kärä mananbare kwe, aune nitre yekwe ja ükaninkrö ben.
14 Ye ngwane nitre Ni Jätäbiti Nibu ye dianinkä kwe, abokän kädekani kwe apóstol. Niaratre nämäne dikekä ben aune niara nämäne juen kukwe driere.
15 Aune niarakwe ja di biani ietre chokali juantarikäre.
16 Nitre Ni Jätäbiti Nibu kädekani kwe ye ngätäite Simón nämäne (niarakwe kädekani Pedro arato),
17 Zebedeo ngobo nibu Santiago aune Juan (niarakwe nitre ye kädekani Boanerges arato, abokän “unsuli* ngobo” gärätä),
18 Andrés, Felipe, Bartolomé, Mateo, Tomás, Santiago Alfeo ngobo, Tadeo, Simón abokän cananita,
19 aune Judas Iscariote (abokän käkwe kitani ngise ja känenkäre).
Ye bitikäre Jesús nikani gwä ju kwati te.
20 Mada bati, nitre kwatí käkwe ja ükaninkrö yebätä kä ñan namaninte jire ietre mrökäre.
21 Dre nämäne nakainkä ye namani gare mräkätre kwe ie ngwane, nikanintre tuin ngwankäreta, ñobätä ñan aune namanintre niere: “Kä nibi ngwarbe dokwäbiti”.
22 Ne madakäre, nitre escriba Jerusalén nükani ye namanintre niere: “Belcebú* tä niarabätä. Tä chokali juentari chokalitre däkien ye köböire”.
23 Akwa nitre ye jatadre kokwäre ribebare kwe ietre aune kukwe keta kabre bämikani kwe ietre. Niebare kwe ietre: “¿Ño Satana raba Satana juentari?
24 Gobran keteiti tä rüre ja arabe rüere aune tä ja ñäkebiti ngwane, ñan raba neketete jankunu krö.
25 Aune ni ja mräkäre* gwita tä rüre jabe aune tä ja ñäkebiti ngwane, ñan raba neketete jankunu krö.
26 Ye erere arato, Satanakwe rüdre ja arabe rüere aune ja ñäkädrebiti kwe ngwane, ñan raba neketete krö, aune yete rükai mrä.
27 Erametre ni iti rikadre gwä gokäre ni iti dite yekän ngwane, käne rabadre mäkete. Ye ngwane batibe raba jondron gwi kwe ye goire kän.
28 Ti niere metre munye, kukwe jökrä kitai ta ni kä nebätä monsoitre yebiti, ja mika ngite ño nuaindi kwetre aune kukwe blo krubäte* ño niedi kwetre yebiti ta.
29 Akwa nirekwe ñäkäi käme krubäte* üai deme rüere yebiti ñaka ngite kitai ta. Aune ja mikani ngite kwe yebätä rabai ngite kärekäre”.
30 Ne niebare kwe ñobätä ñan aune niaratre namani niere: “Üai käme tä niarabätä”.
31 Ye ngwane Jesús etebatre nükani meyebe, akwa ja mikaninte kwetre jubäre aune ni iti juani kwetre kärere.
32 Nitre kwatí nämäne täkäni niara bäre. Aune niebare ie: “Mä meye aune mä etebatre tä jubäre aune tätre mä ngwentari”.
33 Akwa niarakwe niebare ietre: “¿Nire abokän ti meye aune ti etebatre?”.
34 Aune nitre nämäne täkäni bäre yebätä nikrabare kwe, käkwe niebare: “¡Nitre ne abokän ti meye aune ti etebatre!
35 Nitre jökrä tä Ngöbö töi nuainne ye abokän ti eteba, ti ngwai aune ti meye”.
Nota
^ Lit. “nötare”.
^ Lit. “nötare”.
^ Ñö okwä kri ne mren kwrere.
^ O “rua”.
^ Ye kwrere nieta Satana ie.
^ Lit. “ju”.
