Evangelio Marcokwe 8:1-38
-
Jesuta nitre brare 4 mil buke (1-9)
-
Kukwe ñan tuabare nuaindre ribeta ie (10-13)
-
Levadura nitre fariseokwe aune Herodekwe (14-21)
-
Tä ni ie kä ñan tuin miketa kwin Betsaida (22-26)
-
Jesús ye Kristo nieta Pedrokwe (27-30)
-
Jesús krärä ketai mikata gare kwe (31-33)
-
Kukwe ngübata ni ja tötikaka Jesukwe yebätä (34-38)
8 Kä ye ngwane nitre kwatí käkwe ja ükaninkröta bobukäre. Mrö ñan namani kwetadre ietre, aisete Jesukwe nitre ja tötikaka kwe kärä mananbare aune niebare kwe ietre:
2 “Nitre kwatí ne nibi tuin bobre krubäte tie, ñobätä ñan aune köbömära tätre tibe aune mrö ñan kwetadre ietre.
3 Tikwe juainta mröi ja gwirete ngwane, kä rötaitebiti ji ngrabare. Ñobätä ñan aune nitre ruäre ye kä mente känti”.
4 Yebätä nitre ja tötikaka kwe käkwe niebare ie: “Akwa, kä ne tä kaibe mentokwäre, ¿se medente ni iti raba pan den nitre kwatí bukakäre trine?”.
5 Aisete niarakwe ngwanintari ietre: “¿Pan tä kwäbe munkwe?”. Niaratrekwe niebare ie: “Kwä kükü”.
6 Aune niarakwe täkä mananbare tibien nitre kwatí yei. Ye bitikäre niarakwe pan kwä kükü ye diani, debe biani kwebätä Ngöböi, ötaninkä kwe biti nikani bien nitre ja tötikaka kwe ie, ne kwe döräidre kwetre nitrebiti. Niaratre nikani döräire mada nitre kwatí yebiti.
7 Aune gwa kia nämäne ruäre kwetre arato, aisete, orabare kwe ye bitikäre, döräidre kwetre arato niebare kwe ietre.
8 Aisete mröbare kwetre aune namanintre trine. Aune pan oto namaninte ye ükaninkrö kwetre kutuä krikri kwä kükü ye kwáti.
9 Nitre brare 4 mil nämäne. Ye bitikäre Jesukwe juaninta.
10 Ye bengwairebe nankwani rute nitre ja tötikaka kwe ben aune nikani kä Dalmanuta yekänti.
11 Aune nitre fariseo jatani aune nikani ñäke ben jai aune niarakwe kukwe ñan tuabare nuaindre Ngöbö käbiti ye namani ribere ie, niara nuatekäre.
12 Niarakwe murie jäkäbare kri aune niebare kwe: “¿Ñobätä nitre kä ne näire ye käre tä kukwe ñan tuabare nuaindre ye känene? Ti niere metre munye, nitre kä ne näire yei kukwe ñan tuabare ye ñan mikai tuare”.
13 Ye bitikäre niaratre tuanimetre kwe yete aune nankwaninta rute bobukäre aune nikani ñökrä kwäräkri.
14 Ne madakäre, nitre ja tötikaka kwe rikadre pan ngwena ye käi nikwitaninkä bititre. Pan nämäne kwatibe rute kwetre.
15 Aune niaratre mikakäre mokre niebare metre ta kwe ietre: “Munkwe okwä ngiante kwin. Munkwe ja ngübabiti levadura nitre fariseokwe yebätä aune levadura Herodekwe yebätä”.
16 Aisete nikanintre ñäke jai pan ñan nämäne kwetre yebätä.
17 Jesukwe gani aisete niebare kwe ietre: “¿Ñobätä munta ñäke jai pan ñakare munkwe yebätä? ¿Akräke mun jämi gain? ¿Ñan nüke gare munye? ¿Mun brukwä täbe ribi abokän ie kukwe ñan nüke gare?
18 ‘Mun okwä tärä akwa, ¿kä ñan tuin munye? Mun olo tärä akwa, ¿ni kukwei ñan ruin munye?’ ¿Akräke ñan niena törö munye?
19 Tikwe pan kwärike ñäkäbitiba nitre brare 5 mil kräke, ¿ye ñan törö munye? ¿Kutuä kwäbe pan oto rabateba ükakröba munkwe?”. Niaratrekwe niebare ie: “Kwä jätäbiti kubu”.
20 “Aune pan kwä kükü tikwe ñäkäbitiba nitre brare 4 mil kräke ngwane, ¿pan oto rabateba ye munkwe ükakröba kutuä krikri kwäbe?”. Niaratrekwe niebare ie: “Kwä kükü”.
21 Aisete ngwanintari kwe ietre: “¿Jämi nüke gare munye?”.
22 Aune namanintre Betsaida, yete ni brare iti ie kä ñan tuin jäntani ie aune niarakwe kise ketadrekäbätä ribebare kisere ie.
23 Niarakwe ni ie kä ñan tuin ye kani kisebiti, aune nikani ngwena juta bäre mento, käli kitani kwe okwäte ye bitikäre, kise mikani kwebiti aune ngwanintari kwe ie: “¿Kä tuin chi mäi?”.
24 Ni ye käkwe dokwä ganinkä aune nikrabare kwe, käkwe niebare: “Ni nibi tuin tie, akwa kri* kwrere nibi tuin dikekä tie”.
25 Aisete Jesukwe kise mikaninta bobukäre ni ye okwäbiti, aune kä jutuabare mrebe ie, okwä namaninta kwin aune kä jutuabare bängrabe ie.
26 Biti juaninta kwe ja gwirete aune niebare kwe ie: “Mä ñan rika jutate”.
27 Ye bitikäre Jesús nikani nitre ja tötikaka kwe ben juta Cesarea Filipo yekänti aune ji ngrabare nikani ngwentari ietre: “Nitre tä niere erere, ¿ti abokän nire?”.
28 Niaratrekwe niebare ie: “Juan Bautista.* Akwa nitre mada tä niere, mä abokän Elías. Aune nitre mada tä niere, mä abokän ni Ngöbö kukwei niekä mada”.
29 Aune niarakwe kukwe ne ngwanintari ietre: “¿Ti abokän nire ruin munye?”. Pedrokwe niebare ie: “Mä abokän Kristo”.
30 Aisete niaratrekwe ñaka niedre jire ni madai ye Jesukwe ribebare metre ta ietre.
31 Aune Ni Kä Nebätä Monsoi ja tare nikadi krubäte, aune nitre ji ngwanka judío, sacerdote ütiäte ütiäte aune escriba ñaka kai ngäbiti, arato krärä ketai aune mikaita nire* köbömä bitikäre, ye nikani driere ietre.
32 Namani kukwe ne niere metre ta. Akwa, Pedro nikani ngwena kä kaibe te aune nikani ñäke ie.
33 Niara nikwitaninte aune nikrabare kwe nitre ja tötikaka kwebätä, aune ñäkäbare kwe Pedro ie: “¡Näinte ti trökri, Satana! Ñobätä ñan aune Ngöböta töbike ño ye erere mä ñan töbike, ñakare aune mäta töbike ni kä nebätä erere”.
34 Ye bitikäre nitre kwatí ye käräbare kwe nitre ja tötikaka kwe yebe, aune niebare kwe ietre: “Nire tö ja mikai ja tötikaka tibe ye käkwe ñaka nüna jankunu ja kräke, ni ye rabadre kri oto ja tare nikakäre* jakwe den aune jatadre jankunu ti jiebiti.
35 Ñobätä ñan aune nire tö ja nire jakwe mikai kwäre yekwe ja nire riaite, akwa ja tötikabätä tibe aune kukwe kwin ka ngäbitibätä nire kän ja nire riaite yekwe ja nire mikai kwäre.
36 Erametre, ni iti kwe jondron jökrä kä tibienbätä rabadre, akwa yebätä ja nire kwe riadrete ngwane, ¿ye raba dimike ño?
37 Ñobätä ñan aune, ¿ni iti raba dre bien ja nire kwe ütiäre?
38 Aune nire käkwe, ti aune ti kukwei gaidi nitre kä ne näire ñan ja ngwen metre aune ja mikaka ngite ne ngätäite ngwane, Ni Kä Nebätä Monsoi arato käkwe gaidi jataita Rün kwe die kri bä nuäre yebiti angeletre deme kwe ben ngwane”.
