Evangelio Mateokwe 13:1-58
-
GOBRAN NGÖBÖKWEBÄTÄ KUKWE BÄMIKANI (1-52)
-
Ni nura nökaka (1-9)
-
Jesús nämäne kukwe bämike dirikäre (10-17)
-
Ni nura nökaka ye dre gärätä mikata gare (18-23)
-
Trigo aune kri mu käme (24-30)
-
Mostaza nurai aune levadura (31-33)
-
Kukwe bämikani yebiti profecía namani bare (34, 35)
-
Trigo aune kri mu käme ye dre gärätä mikata gare (36-43)
-
Jondron ütiäte aune perla ütiäte krubäte (44-46)
-
Krade gwa kitara (47-50)
-
Jondron ütiäte mrä aune ngututu (51, 52)
-
-
Jesús ñan ka ngäbitita käite (53-58)
13 Köbö yete, Jesukwe kämikaninkä gwi aune namani täkäni ñö okwä kri* ye kräbätä.
2 Aune nitre nükani kwatí krubäte, yebätä Jesús nankwani rute aune namani täkäni tibien. Nitre kwatí krubäte ye abokän namani nünaninkä ñö okwä kri ye kräbäre.
3 Kukwe bämikani kwe yebiti nikani kukwe keta kabre driere ietre. Niebare kwe: “¡Ne kukwe nuin! Ni iti nura nökaka nikani nura nökö.
4 Aune nikani nura nökö ngwane, nura ngwä ruäre betaninkä ji kräbäre aune nukwä jatani käkwe kwetani.
5 Mada abokän betaninkä jäkwatabiti, jäkwata yebiti dobro ñaka krubäte, aisete mu betaninkä jötrö ñobätä ñan aune dobro ñaka ngetobo yebätä.
6 Akwa, ñänä jatani kwin ngwane, nura mu kiakia ye bä ngrötaninkä aune ngätri ñan nämäne mente nguse yebätä ngatani.
7 Mada abokän betaninkä kri tukwäre ngätäite, kri tukwä ye ririabare aune yekwe ñan tuanimetre nirien jankunu.
8 Mada abokän betaninkä kä kwin te aune ngwä namani bäri ere nökani ye kräke. Ruäre 100, mada 60 aune mada 30.
9 Nire olo tärä yekwe olo ketate kwekebe ni kukwe nuakäre”.
10 Aisete nitre ja tötikaka krötabare ken aune ngwanintari kwetre ie: “¿Ñobätä mäta kukwe bämike blitakäre bentre?”.
11 Niebare kwe ietre: “Kukwe bäin deme Gobran kä kwin yebätä ye mikata nüke gare munye, akwa niaratre ie ñakare.
12 Nire ie kukwe nüke gare yei kukwe mikai nüke gare bäri aune kä rikai ta ngwane, kukwe rabai gare bäri ie. Akwa nire ie kukwe ñan nüke gare aune kukwe nüke gare braibe ie, ye jögrä Ngöbökwe diainkä kän.
13 Ye medenbätä, tita kukwe bämike blitakäre bentre, ñobätä ñan aune kä tuin ietre, akwa metrere kä ñan tuin ietre. Aune ni kukwei ruin ietre, akwa metrere ni kukwei ñan ruin ietre aune kukwe ñan nüke gare ietre arato.
14 Ni Ngöbö kukwei niekä Isaiabiti kukwe niebare ye nemen bare niaratrebätä: ‘Ni kukwe juruai munye, akwa kukwe ñan rükai gare jire munye. Munkwe nikrai, akwa kä ñan jutuai jire munye.
15 Niaratre tä ja okwä jue mike aune tä ja olo gudike, ne kwe kä ñan jutuadre ietre aune ni kukwe ñan juruadre ietre. Ye köböite dre ribeta bätätre ye ñan nüke gare ietre, aisete ñan kiteta ti kokwäre ne kwe tikwe mikadreta räre’.
16 Akwa, mun okwä ie kä tuin aune mun olo ie ni kukwe ruin, yebätä kä juto.
17 Ñobätä ñan aune ti niere metre munye, nitre Ngöbö kukwei niekä aune nitre ja ngwanka metre kwatí, tö namani kukwe tuata munkwe ye tuai, akwa ñan tuani kwetre. Aune dre kukwe nuata munkwe ye niaratre tö namani kukwe nuai akwa ñan kukwe nuani kwetre.
18 Kukwe bämikata ni nura nökakabätä ye dre gärätä ye kukwe nuin mada.
19 Kukwe Gobran Ngöbökwe yebätä ye nire tä kukwe nuin, akwa ñaka nüke gare ie ngwane, Diablu tä kite aune kukwe nökani brukwäte ye tä jäkekä. Nura ne abokän tä nökani ji kräbäre.
20 Nura ngwä nökani jäkwatabiti ye abokän ni iti tä kukwe Gobran Ngöbökwe yebätä ye kukwe nuin aune bengwairebe tä kain ngäbiti kä jutobiti.
21 Akwa ngätri ñaka mente nguse brukwäte aune tä näin jankunu ja käne kä ruäre te. Tä ja tuin kukwe tare ben o ja mikata rüere kukwe Gobran Ngöbökwe yebätä ngwane, bengwairebe tä ngoto ritete.*
22 Nura ngwä nökani kri tukwäre ngätäite ye abokän, ni iti tä kukwe Gobran Ngöbökwe yebätä ye kukwe nuin, akwa töbikakwe kä nebätä* aune jondron ütiäte kä nebätä yei tä ja murie ötakamana, ye medenbätä nura ye ngwä ñan tä nemen.
23 Aune nura ngwä nökani kä kwin te ye abokän tä kukwe Gobran Ngöbökwe yebätä ye kukwe nuin aune ye dre gärätä tä nüke gare ie. Ye meden abokän ngwäta nemen. Ruäre ngwä tä nemen 100 biti bäri ruäre abokän 60 aune ruäre abokän 30”.
24 Ye bitikäre kukwe mada ne bämikani kwe niaratre ie: “Gobran kä kwinbiti ye bämika raba ni iti käkwe nura ngwä kwin nökani tirete jai ye kwrere.
25 Nitre nämäne ja dükani ngwane, rüe jatani käkwe kri mu käme nökani trigo ngätäite biti nikaninta.
26 Trigo mu namani aune ngwä namanibätä ye ngwane arato kri mu käme ye namani.
27 Aisete ni klabore jatani käkwe niebare ni ju bäkänkä gwi ie: ‘Däkien, ¿mäkwe nura kwin nökani tirete, se ño amare nura käme tä ngwäre se?’.
28 Niarakwe niebare ietre: ‘Ni iti ja rüekä tibe abokän käkwe kukwe ye nuainbare’. Nitre klabore käkwe ngwanintari ie: ‘¿Nun rikadre aune nunkwe jäkädrekä ie mä tö?’.
29 Niarakwe niebare ietre: ‘Ñakare, ñobätä ñan aune nane mada kri mu käme jäkäkäbätä trigo jäkäkä raba bengwaire.
30 Tuenmetre nirien gwaire nememe ötadre ye ngwane. Aune öta käi ye näire tikwe niedi nitre ötaka yei, käne rabadre kri mu käme ye jäkekä biti mäkete jabätä kukwakäre aune biti rabadre trigo ye ükekrö aune üke gwi nura ngwä ükakrö käi tikwe yekänti’”.
31 Arato kukwe mada ne bämikani kwe ietre: “Gobran kä kwinbiti ye abokän ni iti käkwe mostaza nurai chi diani, aune nökani kwe tirete jai ye kwrere.
32 Nura ngwä ne abokän metrere, nura ngwä bäri chi mada ye kräke, akwa tä nirien ngwane, tä nemen bäri kri nura mada tirete ye kräke. Tä nemen kri kri ye kwrere aune nukwä kwitekä kwinta tä nüke ja kriemike kri küde ye ngrabare”.
33 Kukwe mada bämikani kwe ietre: “Gobran kä kwinbiti ye abokän meri iti käkwe levadura diani aune mritani kwe harina ere* ben ye kwrere. Mrä mada masa ye jökrä ririabare”.
34 Jesukwe kukwe jökrä ne driebare nitre kwatí yei kukwe bämikani kwe yebiti. Käre nämäne kukwe bämike ietre blitakäre bentre.
35 Ye kwrere kukwe rabai bare niebare ni Ngöbö kukwei niekäkwe ye namani bare, ni Ngöbö kukwei niekä niebare: “Tikwe kukwe bämikadi dirikäre, kenanbe kukwe nämäne ükani ye tikwe mikadi gare”.
36 Nitre kwatí ye juaninta kwe ye bitikäre nikani gwä. Nitre ja tötikaka kwe nikani kokwäre aune niebare kwetre ie: “Kri mu käme tiretebiti mäkwe kukwe bämiri ye dre gärätä ye mike gare nunye”.
37 Niarakwe niebare ietre: “Ni Kä Nebätä Monsoi ye abokän ni nura kwin nökaka.
38 Tire ye abokän nitre kä tibienbätä. Nura kwin ye abokän nitre näin Gobran kä kwinbiti te. Kri käme ye abokän Satana monsoi.
39 Aune rüekwe kri mu käme nökani ye abokän Diablu. Nura ngwä ötata ye abokän kä ne* kitera krüte* meden gärätä. Aune ni nura ngwä ötaka ye abokän angeletre.
40 Kri mu käme jäkäkäta biti kukwata ñukwäte ye erere rabai bare kä ne* krüte te.*
41 Ni Kä Nebätä Monsoi käkwe angeletre kwe juain, aune niaratre käkwe jondron jökrä tä ni ngwen ngoto ritekä aune nitre ja töi mikaka kukwe käme nuainne ye denkä Gobran kwe yete.
42 Aune kitai ñukwäte kwetre, yete ja muaidi kwetre aune tu ukwadi kwetre ja tare nikabätä.
43 Kä ye näire nitre ja ngwanka metre ye rabai trä nebetekä Gobran Rünkwe yete, ñänä trä ye kwrere. Nire olo tärä yekwe olo ketate kwekebe ni kukwe nuakäre.
44 Gobran kä kwinbiti ye abokän jondron ütiäte nämäne ükani kä keteiti känti abokän kwani ni brare iti ie ye kwrere. Ni brare ye käkwe ükaninta aune käi namani juto krubätebätä, aisete nikani aune jondron nämäne kwe ye jökrä rürübäinbare kwe biti kä ye kökani kwe.
45 Gobran kä kwinbätä ye abokän ni iti jondron rürübäinkä nikani mente perla ütiäte känene ye kwrere arato.
46 Perla ütiäte krubäte kwani ie, aisete nikani aune bengwairebe jondron jökrä nämäne kwe ye rürübäinbare kwe aune kökani kwe.
47 Gobran kä kwinbiti ye krade gwa kitakäre ye kwrere arato, abokän kitani mrente te gwa bätäkä ngwarbe nakani.
48 Gwa namani krade kwáti ngwane, jäkäni jate nememe mren kräbätä, nitre gwa kitaka ye namani täkänintubu aune gwa kwin ye mikani kwetre ngwäte, akwa gwa ñan kwin ye abokän kitaninkä kwetre.
49 Ye erere rabai bare kä ne* krüte näire.* Angeletre jatai aune nitre käme ye mikai jenena kwe nitre kwin yebätä.
50 Aune kitai ñukwäte kwetre, yete ja muaidi kwetre aune tu ukwadi kwetre ja tare nikabätä.
51 ¿Kukwe ne dre gärätä ye nü gare jökrä munye?”. Niaratrekwe niebare ie: “Jän”.
52 Aisete niebare kwe ietre: “Ye erere ngwane, ne rabadre gare munye: ni dirikä jökrä ie kukwe metre Gobran kä kwin yebätä tä nemen gare, ye abokän ni iti ju bäkänkä gwi abokän tä jondron ütiäte kwe ngätäite jondron mrä aune jondron ngututu denkä ye kwrere”.
53 Jesukwe kukwe jökrä ne bämikani ietre ye bitikäre, kämikaninkä kwe yete.
54 Namaninta ja käite ngwane, nikani dirire sinagogate kwetre yete aune nitre töi mikani ñan krütare kwe. Nitre namani niere: “¿Nirekwe ni ne mikani töbätä aune ja di biani ie kukwe ñan tuabare ne nuainkäre?
55 ¿Ni kri dätekä jondrone* ye ñan ai ngobo ne? ¿Meye kwe ye ñan ai kädekata María, aune Santiago, José, Simón aune Judas ye ñan niara etebatre?
56 ¿Aune ngwaitre kwe ye ñan jökrä tä nüne nibe nete? Aisete, ¿ñokänti jondron jökrä ne namani kwe?”.
57 Aune ye käkwe niaratre ngwani ngoto ritekä aune ñan tödekabare kwetre ie. Akwa Jesukwe niebare ietre: “Ni Ngöbö kukwei niekä mikata ütiäte jai kä jökrä känti, akwa käite aune juete mika ñan ütiäte jai”.
58 Aune niaratre ñan nämäne tödeke yebätä, niarakwe ñaka kukwe ñan tuabare nuainbare krubäte yete.
