Evangelio Mateokwe 15:1-39
15 Nitre fariseo aune escriba ruäre Jerusalén nämäne näin, ye jatani Jesús kokwäre aune niebare kwetre ie:
2 “¿Ñobätä nitre ja tötikaka mäkwe ñaka tä kukwe diribare nitre kirakwe ye mike täte? Ñodre, mrödre ye känenkri niaratre ñan ja kise bätete”.
3 Niarakwe niebare ietre: “¿Ñobätä kukwe jakwe mikabätä täte, mun ñan tä kukwe nuain mananbare Ngöbökwe mike täte?
4 Ñodre, Ngöbökwe niebare: ‘Mäkwe mä rün aune mä meye mika ütiäte jai’,* aune ‘Nire tä ñäke käme rün aune meyebätä, ye murie ketai’.
5 Akwa munta niere: ‘Nireta niere rün aune meye ie, “jondron jökrä tä tikwe abokänbiti ti raba mä dimike, ye tä dianinkä regalore Ngöbö kräke”.
6 Ni yekwe rün aune meye mikadre ütiäte jai ye ñan niena ribere’. Ye erere, munta kukwe kirabe mike täte yebiti, munta kukwe Ngöbökwe mike mento.
7 Ja bämikaka jerekäbe, ye arabätä ni Ngöbö kukwei niekä Isaías niebare munbätä:
8 ‘Ja kadabiti juta ne tä mike ütiäte jai, akwa brukwä tä mente tibätä.
9 Ngwarbekäre tätre ti mike täte, ñobätä ñan aune nitre kä tibienbätä tä kukwe nuainmana ye dirita kwetre’”.
10 Ye bitikäre nitre kwatí ye käräbare ja ken kwe aune niebare kwe ietre: “Tita kukwe niere ne kukwe nuin aune mike nüke gare jai:
11 Jondron tä niken ni kadate ye ñan ai tä ni mike käme, ñakare aune dreta betekä ni kadate yebrä tä ni mike käme”.
12 Ye ngwane nitre ja tötikaka kwe jatani, käkwe niebare ie: “Mäkwe kukwe nini ye mati tare nitre fariseobätä, ¿ye mäkwe gari?”.
13 Niarakwe niebare ietre: “Kri ñan nökani ti Rün kä kwinbitikwe ye jökrä jäkäikä ngätri ngöi.
14 Aisete niaratre tuenmetre, niaratre ji ngwanka okwäte kä iko. Aune ni iti okwäte kä iko tä ni mada okwäte kä iko jie ngwen ngwane, nibu ye betaikä kä mäkäte”.
15 Pedrokwe niebare mada ie: “Mäkwe kukwe bämiri ye mike gare nunye”.
16 Jesukwe niebare ietre: “¿Kukwe ye jämi nüke gare munye arato?
17 Ni iti tä jondron kwete, tä niken bulete biti tä kitekä, ¿ye ñan gare munye?
18 Akwa dreta betekä ni kadate ye kite ni brukwäte, ye abokän tä ni mike käme.
19 Ñobätä ñan aune töbika blo, ni murie ketata, ni ja mäkäninte nemen ni madabe,* ni ñan ja mäkäninte nemen jabe,* gota, kukwe ngwarbe nieta aune blita blo krubäte* ye kite ni brukwäte.
20 Kukwe ne tä ni mike käme, akwa mröta kise tube ngöi ye ñan tä ni jire iti mike käme”.
21 Jesukwe kämikaninkä yete aune nikani kä Tiro aune Sidón yekänti.
22 Ye ngwane, meri feniciabu nämäne nüne kä yekänti, jatani aune ngratebare kwe: “¡Däkien, David Mräkä,* ti mike tuin bobre jai! Chokalita ti ngängänbätä aune tä mike ja tare nike krubäte”.
23 Akwa Jesukwe ñan ñäkäbare käre. Aisete nitre ja tötikaka kwe nikani kokwäre aune namanintre ribere kisere ie: “Niara juen mentokwäre, ñobätä ñan aune tä ngrente jankunu ni jiebiti”.
24 Jesukwe niebare ietre: “Ngöbökwe ti juani oveja Israelkwe nianinte ye aibe dimikakäre”.
25 Akwa meri ye jatani, namani ngodokwäbiti niara känenkri aune ribebare kisere kwe ie: “¡Däkien, ti dimike!”.
26 Jesukwe niebare ie: “Pan diandrekä monsotre kän aune kitadre chiki ie ye ñaka kwin”.
27 Meri yekwe niebare ie: “Ye metre, ti Däkien, akwa erametre pan burieta betekä timo mesabätä chiki bäkänkä kän ye kwetata chikikwe”.
28 Aune Jesukwe niebare ie: “Meri, ¡tödeka mäkwe kri krubäte! Mä tö dre ie ye rabadre bare mä kräke”. Aune ye ngwane, ngängän namaninta räre.
29 Jesukwe kämikaninkä yete ye bitikäre, nükani kä känime ñö okwä kri Galilea* yekänti aune nikani ngutuäbätä. Nämäne täkäni yete ngwane,
30 nitre kwatí nikani kokwäre aune nikani nitre ñan raba dikekä kwin, nitre ngrabare ruäre ñaka kwin, kä iko okwäte, mudo aune nitre kwatí mada bren ye ngwena ie. Mika nämäne niara ngoto känti aune nämäne miketa räre.
31 Ni mudo ye namani blite, nitre ngrabare ruäre ñan kwin ye namaninta räre, ni ñan dikekä kwin ye namani dikekä kwin, ni ie kä ñan tuin ye ie kä namani tuin ye jutuabare nitre kwatí ie ngwane, töi namani ñan krütare aune niaratre jökrä namani Ngöbö Israelkwe käikitekä.
32 Ye ngwane Jesukwe nitre ja tötikaka kwe käräbare aune niebare kwe ietre: “Nitre kwatí ne nibi tuin bobre krubäte tie, ñobätä ñan aune köbömära tä tibe aune mrö ñan kwetadre ietre. Ti ñan tö juainta mröi, nane mada ji ngrabare kä rötatebiti”.
33 Akwa nitre ja tötikaka kwe käkwe niebare ie: “Kä ne kaibe mentokwäre, ¿medente nunkwe pan känäin debe näre nitre kwatí krubäte ne bukakäre?”.
34 Aisete Jesukwe niebare ietre: “¿Pan tä kwäbe munkwe?”. Niaratrekwe niebare ie: “Kwä kükü aune gwa kia tä ruäre nunkwe”.
35 Aisete nitre kwatí yei täkä mananbare kwe tibien ye bitikäre,
36 pan kwä kükü aune gwa ye diani kwe, debe biani kwebätä Ngöböi, pan ötaninbätä kwe aune nikani bien nitre ja tötikaka kwe ie, nitre ja tötikaka kwe ye käkwe mada döräibare nitre kwatí yebiti.
37 Aune nitre jökrä käkwe mröbare aune namanintre trine. Aune pan oto namaninte ye ükaninkrö kwetre kutuä krikri kwä kükü ye kwáti.
38 Nitre brare 4 mil käkwe mröbare akwa meritre aune monsotre ye ñan täinbare.
39 Mrä mada, nitre kwatí ye juaninta kwe ye bitikäre, nankwani rute aune nükani kä Magadán yekänti.
