Evangelio Mateokwe 18:1-35
18 Ye ngwane, nitre ja tötikaka Jesukwe ye nükani ken aune ngwanintari kwe ie: “¿Nire bäri ütiäte Gobran kä kwinbiti yete?”.
2 Niarakwe monso chi käräbare aune mikani kwe ja ngätäite.
3 Aune niebare kwe ietre: “Ti niere metre munye, munta ja ngwen ño ye mun ñan kwite aune mun ñan nemen monso kia erere ngwane, mun ñaka rikai jire Gobran kä kwinbiti yete.
4 Ye medenbätä, nire käkwe ja töi mikai bobre monso chi ne erere, ye rabai bäri ütiäte Gobran kä kwinbiti yete.
5 Aune nire tä monso chi ne kwrere kain ngäbiti ti käbiti, ye tä ti kain ngäbiti arato.
6 Akwa nire käkwe monsotre kia tä tödeke tibiti ne iti ngwandre ngoto ritekä, ni monso ngwanka ngoto ritekä ye kräke rabadre bäri kwin jä oto kri* mäkädre rorobätä biti kitadre mrente.
7 Nitrekwe ñan tödekadre yekäre nitre kä nebätä tä kukwe dätere,* ¡nitre yebätä kukwe tare rabai bare! Bäkänä, nitre ruäre käkwe ni mada ngwain ngoto ritekä tödekabätä, akwa nire käkwe nuaindi yebätä, ¡kukwe tare rabai bare!
8 Ye medenbätä, mä kise o mä ngoto tä mä ngwen ja mike ngite* ngwane, mäkwe tikaka aune kitaka mobe. Ja nire rabadre mäkwe mä kise otorebiti o mä ngüre otorebiti ye rabadre bäri kwin, mä kitadre ñukwä jutra käre te mä kise krobu o ngüre krobu ben ngöi ye kräke.
9 Arato, mä okwä tä mä ngwen ja mike ngite* ngwane, mäkwe dianka jai aune kitaka mobe. Ja nire rabadre mäkwe mä okwä kwatibebiti ye rabadre bäri kwin, mä okwä kubu ben ngöi mä kitadre Gehena* ñukwäre te ye kräke.
10 Munkwe ja ngübabiti ne kwe, nitre ngäbäkre kia kwrere ye munkwe ñan mikadre tuin ngwarbe jai. Ñobätä ñan aune ti niere munye, angeletre niaratrekwe tä kä kwinbiti ye käre tä ti Rün kä kwinbiti ye ngwäre tuin.
11 *
12 ¿Munkwe dre niedre? Ni iti kwe oveja tädre 100 aune riadrete krati kän, ¿ni ye ñaka oveja 99 ye mikadrete ngutuäbätä biti rikadre oveja krati nianinte ye känenentari?
13 Aune kwandretari ie ngwane, käi rabai bäri jutobätä oveja 99 ñaka nianinte kän ye kräke, ye ti niere metre munye.
14 Ye erere arato, nitre ngäbäkre kia kwrere, ye iti riadrete yei ti Rün kä kwinbiti ñaka tö.
15 Aisete, mä eteba iti käkwe ja mika ngite mä rüere ngwane, mäkwe blita kaibe ben aune dre nuainbare kwe ye mäkwe mika gare ie. Mä kukwe nuai kwe ngwane, mäkwe mä eteba dimikani kukwe kwin nuainne.
16 Akwa, ñaka mä kukwe nua kwe ngwane, mä rika ni iti o nibu ngwena jabe, ne kwe ni nibu o nimä tä kukwe niere* ye köböire kukwe jökrä rabadre ükaninte.
17 Ñan niaratre kukwe nua kwe ngwane, mäkwe mika gare konkrekasion ie. Aune ñaka konkrekasion kukwe nua jire kwe arato ngwane, mäkwe ni ye mika tuin jai nitre käbiti tibien* aune nitre impuesto ütiä käräkä ye kwrere.
18 Ti niere metre munye, jondron jökrä munkwe mäkäite kä tibienbätä ye rabaira mäkäninte kä kwinbätä aune jondron jökrä munkwe tikaite kä tibienbätä ye rabaira tikaninte kä kwinbätä.
19 Arato ti niere metre munye, mun nibu kä tibienbätä töi täi ja erebe jondron ütiäte käräbätä ngwane, ti Rün tä kä kwinbiti ye köböire dre ribeta munkwe ye rabai bare metre mun kräke.
20 Ñobätä ñan aune ni nibu o nimä tä ja ükaninkrö ti käbiti, ye ngätäite tita siba”.
21 Ye bitikäre, Pedro nikani kokwäre aune ngwanintari kwe ie: “Däkien, ti eteba käkwe ja mikadre ngite ti rüere ngwane, ¿bäbe tikwe ngite kitadre tabiti? ¿Nemen bä kükü?”.
22 Jesukwe niebare ie: “Ñakare, ti ñan tä nemen bä kükü niere mäi, ñakare aune nemen bä 77.
23 Ye medenbätä Gobran kä kwinbiti ye bämika raba rei iti, tö namani kukwe ükaite nitre klabore kwe ben ye kwrere.
24 Nikani kukwe ükete ngwane, ni klabore itibiti rürübän ütiä nämäne 10 mil talento* kwe ye jäntani ie.
25 Ja ütiä biana ñaka nämäne ni klabore yekwe, yebätä reikwe, niara, muko, ngäbriänkä aune jondron jökrä kwe ye rürübäin mananbare, rürübän ütiä biankäre.
26 Akwa ni klabore ye nikani ngitiekä ngodokwäbiti rei ngwärekri, aune ribebare kisere kwe ie: ‘Ti ngübare bätärekä aune tikwe ja ütiä biain jökrä mäi’.
27 Yekwe rei moto mikani bobre kräke, aisete ni klabore ye tuanimetre nikenta kwe aune rürübän ütiä nämänebiti ye kitani jökrä tabiti kwe.
28 Akwa, kämikaninkä kwe yete ye bitikäre, ni klabore ye namani ngätäi ni klabore mada ben. Ni klabore mada yebiti rürübän ütiä nämäne 100 denario kwe, aisete nakani ie aune nikani roro kekete, namani niere ie: ‘¡Rürübän ütiäta mäbiti ye ütiä bien jökrä!’.
29 Akwa ni klabore ye nikani ngitiekä ngodokwäbiti niara ngwärekri aune ribebare kisere kwe ie: ‘Ti ngübare bätärekä aune tikwe ja ütiä biain mäi’.
30 Akwa niarakwe ñaka kukwe nuani. Nikani aune kita mananbare kwe ngite, nememe ja ütiä biandre kwe ngwane.
31 Kukwe nakaninkä ye namani gare nitre klabore mada yei ngwane, namanintre rubun krubäte aune nikanintre niere jökrä rei ie.
32 Aisete, reikwe kärä mananbare aune niebare kwe ie: ‘¡Ni klabore käme! Tikwe rürübän ütiä kitadre ta mäbiti, mäkwe ribeba tie ngwane, tikwe kitaba ta mäbiti.
33 Mä ñan rabadre ni klabore mada ye mike tuin bobre jai, ¿tikwe mä mikaba tuin bobre jai ye erere?’.
34 Rei namani rubun krubäte kräke aisete kita mananbare kwe ngite,* nememe ja ütiä biandre jökrä kwe ngwane.
35 Ye erere arato ti Rün kä kwinbiti käkwe nuaindi munbätä mun ñaka ngite kitai ta ja brukwä tätebiti mun etebabiti ngwane”.
Nota
^ Burro nämäne jä ye däkwite ta, yebiti trigo ukwa nämäne.
^ Lit. “ngoto ritekä”.
^ Lit. “ngoto ritekä”.
^ Lit. “ngoto ritekä”.
^ Nota Mateo 17:21 tuadre.
^ Lit. “kadabiti”.
^ Ye abokän, nitre ñaka Ngöbö mikaka täte.
^ 10 mil talento ye abokän denario 60 millones.
^ Lit. “biani kwe nitre ni kitaka ngitei”.
