Evangelio Mateokwe 2:1-23
2 Jesús därebare Belén kä Judeate, ye bitikäre nitre kukwe mikaka gare mukebiti* kädrikri nükani Jerusalén, kä ye ngwane Herodes* nämäne reire.
2 Aune namanintre niere: “¿Rei nitre judiokwe därebare ye tä medente? Ñobätä ñan aune nun nämä kädrikri ngwane, muke okwä nun jie ngwanba niara kokwäre, aisete nunki niara mike ütiäte jai”.
3 Kukwe ye juruabare rei Herodes ie aune nitre jökrä Jerusalén yete ie ngwane, kä jürä namani bätätre.
4 Rei käkwe sacerdote ütiäte ütiäte aune nitre escriba* jutate ye jökrä ükaninkrö, biti Kristo* däredre medente ye ngwanintari kwe ietre.
5 Niaratrekwe niebare ie: “Belén Judeate, ñobätä ñan aune kukwe ne tikani ni Ngöbö kukwe niekäbiti:
6 ‘Belén kä Judeate, mä ñaka ütiäte ye kwrere juta mada ngätäite, akwa ñakare ye kwrere. Ñobätä ñan aune mä ngätäite gobran iti rabai abokän käkwe juta tikwe Israel jie ngwain’”.
7 Aisete käbube Herodekwe nitre kukwe mikaka gare mukebiti kärä mananbare aune ñongwane muke ye tuani kena kwetre ye mikani gare kwe jai.
8 Biti juani kwe Belén aune niebare kwe ietre: “Mun nän, aune munkwe monso chi ye känä kä jökrä känti, kwan munye ngwane mun jatata aune munkwe mika gare tie. Ne kwe ti rikadre känti mikakäre ütiäte jai arato”.
9 Rei kukwe nuani kwetre ye bitikäre, nikanintre jankunu. Akwa, bátibe, muke okwä tuani kwetre niaratre nämäne kädrikri ngwane, ye nämäne näin käne aune namani nünenkä kwin monso chi brare nämäne yekänti.
10 Muke okwä jutuabare ietre ngwane, kä namani juto krubäte bätätre.
11 Nikanintre gwä ye ngwane, monso chi ye nämäne meye kwe María ben jutuabare ietre. Ye ngwane namani ngodokwäbiti aune mikani ütiäte kwetre jai. Arato caja tikani kwetre aune oro, incienso* bätä mirra* ye biani kwetre ie.
12 Akwa niaratre ñan rikadreta Herodes känti ta mikani gare köböre Ngöbökwe ietre erere, nikanintreta ji madabiti ja käite.
13 Nikanintreta ye täbiti, bátibe, ángel Jehovakwe ja mikani tuare köböre José ie, käkwe niebare ie: “Nüke krö, ngitie monso chi aune meye kwe ben Egipto, mäkwe kä mikadrekä yete tikwe nie mäi ngwane batibe mä rika mento. Ñobätä ñan aune Herodekwe monso chi ye känäin murie ketakäre”.
14 Aisete, José nükani krö deu aune nikani monso chi aune meye kwe ngwena Egipto.
15 Aune namani yete nememe Herodes krütani ngwane, yebiti Jehovakwe kukwe niebare ni niara kukwei niekä yebiti ye namani bare: “Tikwe ti ngobo käräba ne kwe kä mikadrekä kwe Egipto”.
16 Nitre kukwe mikaka gare mukebiti käkwe Herodes ngökani gani kwe ngwane, namani rubun krubäte. Aune ñongwane muke tuani kwetre ye nämäne töbätä* kwe aisete, monsotre brarebiti kä kubu o kä bäri brai nünanka Belén o Belén bäre ye jökrä murie keta mananbare.
17 Ne kwrere ni Ngöbö kukwei niekä Jeremías käkwe kukwe mikani gare ye namani bare:
18 “Ni kukwei aune ni ngetrakwe juruabare Ramá. Ye abokän Raquel, ñan tö namani ja töi mikamana jäme, ñobätä ñan aune niaratre ñaka namanina”.
19 Herodes krütani ngwane, José nämäne Egipto ye ie ángel Jehovakwe ja mikani tuare köböre.
20 Aune niebare kwe ie: “Näin krö, monso chi aune meye kwe ye ngwena kä Israel känti, ñobätä ñan aune nire tö namani monso chi murie* ketai ye krütanina”.
21 Aisete niara nükani krö monso chi aune meye kwe ben aune jataninta kä Israel.
22 Akwa kä jürä namanibätä nänkäre Judea. Ñobätä ñan aune Arquelao, Herodes ngobo nämäne gobrane namani gare ie yebätä. Ne madakäre, Ngöbökwe kukwe niebare köböre ie yebätä nikanintre kä Galilea.
23 Aune namani nünentubu juta Nazaret. Kristobätä kukwe niebare ni Ngöbö kukwei niekäbiti ye erere namani bare: “Kädekadi Nazareno”.*
Nota
^ O “Mesías”, “Ungido”.
^ O “ye ben töite”.
^ O “ja nire”.
^ Ye kite kukwe keteiti hebreokri ruin, abokän ‘bükün’ gärätä.
