Evangelio Mateokwe 24:1-51
-
KRISTO KÖBÖI NO BÄMIKAKA (1-51)
24 Jesús nämäne templote aune nikani mento ngwane, nitre ja tötikaka kwe nikani kokwäre aune kise kitani kwetre templobätä ie.
2 Aisete Jesukwe niebare ietre: “¿Jondron jökrä ne tuin munye? Ti niere metre munye, jä jökrä tä nete ye jökrä dikainte aune jire kwati rabai ükaninte jabiti”.
3 Niara nämäne ngitianinkä ngutuä Olivos yebiti ngwane, nitre ja tötikaka kwe nikani kokwäre aune ngwanintari kaibe kwetre ie: “¿Ñongwane kukwe ye rabai bare aune mä köböi no* bätä kä ne* krüte* ye dre käkwe bämikai? Ye niere nunye”.
4 Jesukwe niebare ietre: “Munkwe ja ngwan mokre. Ñan ja ngökamana.
5 Ñobätä ñan aune nitre kwatí jatai ti käbiti aune rabaitre niere, ‘Ti abokän Kristo ara’ aune nitre kwatí ngökai kwetre.
6 Rü rabai nakainkä mun bäre, aune rü rabai nakainkä mente kädrie rabai mun olote. Akwa munkwe ja ngübabiti, ñan ja ngwan nikenkä, ñobätä ñan aune kukwe ne tä rakadrekä, akwa kä krüte jämi nüke.
7 Ñobätä ñan aune nitre käkwe rüdi nitre mada rüere aune juta* käkwe rüdi juta mada rüere, aune mrö nika bätä dobo krikri rabai mate kä jene jene känti.
8 Kukwe jökrä ne tä ja tare nikai kri krubäte* ye krire kömike.
9 Ye ngwane, nitrekwe mun biain ne kwe mun mikadre ja tare nike, aune mun krärä ketai aune juta jökrä brukwä rabai mun kräke ti kä ngwanbätä jabätä.*
10 Aune nitre kwatí käkwe Ngöbö tuainmetre,* ja kitai ngise kwetre rüei kwärikwäri aune brukwä rabai jakrä kwärikwäri.
11 Nitre kwatí ngöbö kukwei niekä ngwarbe rabai, ye käkwe ni kwatí ngökai.
12 Aune kukwe käme ririai bäri, yebätä nitre ñan rabai Ngöbö aune ni mada tarere.
13 Akwa nirekwe kä ngwain nüke jai* nememe mrä, ye rabai kwäre.
14 Aune kukwe kwin Gobran* Ngöbökwebätä ye driedi kä jökräbiti tibien ne kwe kukwe ye rabadre gare nitre jökrä ie,* aune ye ngwane kä krüte ye rükai.
15 Ye medenbätä, jondron käme krubäte aune kä juanka ngwarbe abokänbätä ni Ngöbö kukwei niekä Danielkwe blitabare ye jutua munye nünaninkä kä deme känti ngwane (ni ñäkäkä kukwe nebätä* käkwe mika nüke gare jai),
16 nire täi Judea, ye gitia ngutuä kokwäre.
17 Nire täi jubiti kwin, ye ñan rika timo ja tribe tuakäre gwi.
18 Aune nire täi tirete, ye ñaka rika dänkwä kri kitata dänbiti jai ye tuinta.
19 ¡Meritre täi murore o täi monsotre mike kianbätä kä ye ngwane, ye bobre jakän!
20 Munkwe ora jankunu ne kwe ñan rabadre gitiadre munye kä tibo aune kä ñüre näire o köbö ja dükakäre* yete.
21 Ñobätä ñan aune kä ye ngwane, ja tare nikai kri krubäte.* Ni kä nebätä sribebare yete ja käne nükebe ne ngwane ja tare nika ñaka ye erere, aune ñaka ja tare nikaita jire ye erere.
22 Kä ye ñan krötadre ngwane, ni jire iti* raba nemente kwäre, akwa nitre dianinkä Ngöbökwe yebätä kä ye krötai.
23 Kä ye ngwane, ni iti käkwe nie munye ‘¡Nikren, Kristo tä nete!’ o ‘¡Tä sete!’ ngwane, munkwe ñaka mika era jai.
24 Ñobätä ñan aune kristo ngwarbe aune ni ngöbö kukwei niekä ngwarbe rükai, abokän käkwe kukwe krikri ñan tuabare nuaindi nitre ngökakäre, aune raba nitre dianinkä Ngöbökwe ngökö ngwane, niaratre ngökai kwe arato.
25 Kukwe ye jämi nakainkä känenkri tita mun mike mokre.
26 Ye medenbätä, ‘¡Tä kä ngwarbe nötare te!’ nie munye ngwane, mun ñan rika, ‘¡Tä gwi!’ nie munye ngwane, mun ñaka mika era jai.
27 Ño meraträ* tä trä nen kädrikri, trä täbe nen nememe nedrini ye kwrere rabai bare Ni Kä Nebätä Monsoi rükaita käi näire.*
28 Ni ngwaka o jondron ngwaka täi medente, ye erere känti mü ja ükaikrö.
29 Ja tare nikai kä ye ngwane ye bitikäre, ñänä gidiaite, sö trä ñan rabai jankunu, muke kä kwinbiti betaikä timo aune di kri kä kwinbätä ye ngrükaite.
30 Aune Ni Kä Nebätä Monsoi jatai, ye bä rabai kä kwinbiti aune nitre kä jökräbiti tibien rabai ulire yebätä ja metai mäträräbätä kwetre aune Ni Kä Nebätä Monsoi ye jutuai ietre kite mutabiti di kri yebiti aune bä nuäre kri.
31 Trompeta ngö kribiti niarakwe angeletre kwe juain aune angeletre ye käkwe nitre dianinkä Ngöbökwe kä kiakia jökräbiti tibien ye ükaikrö, kä kwin krüte kwäräkri nememe kä kwin krüte kwäräkri.
32 Higokrie yebätä ja kite. Krä mrä tä nemen därebe aune käta nemenkä ye ngwane, kä moren tärä nemen no ye tärä nemen gare munye.
33 Ye erere arato, kukwe jökrä ne jutua munye ngwane, Ni Kä Nebätä Monsoi nibira no, jukwebätä ye rabadre gare munye.
34 Nitre kä ne näire jämi nekä jökrä ye känenkri, kukwe ne rabai bare jökrä ye ti mike gare metre munye.
35 Kä kwin aune kä tibien ye riaikä, akwa ti kukwei ye täi kärekäre.*
36 Akwa köbö ñongwane aune hora nuäi ye ñan gare ni jire iti ie, ñan gare angeletre kä kwinbätä ie, aune ñan gare Ngöbö Monsoi ie, gare ti Rün aibe ie.
37 Ñobätä ñan aune kä nämäne ño Noé näire, ye erere rabai bare Ni Kä Nebätä Monsoi rükaita käi näire.*
38 Ñobätä ñan aune Ñü Kri jämi näkäin tibien ye känenkri, nitre nämäne mröre aune tomana ñain, nitre brare aune merire nämäne ja mäkete, nememe köbö te Noé nikani arcate ngwane.
39 Aune niaratrekwe ñan ja mikani täte nememe Ñü Kri näkäni tibien ngwane, aune ye käkwe niaratre ganinte jökrä. Ye erere rabai bare Ni Kä Nebätä Monsoi rükaita käi näire.
40 Ye ngwane, nitre brare nibu täi tirete: iti jänäin aune iti abokän tuainmetre.
41 Meritre nibu täi jondron ukwe jä jondron ukwarabiti:* iti jänäin aune iti tuainmetre.
42 Aisete käre munkwe ja ngwan mokre, ñobätä ñan aune, mun Däkien kwainta ñongwane ye ñan gare munye.
43 Töbike kukwe nebätä: ni gokä rükai hora nuäi deu, ye rabadre gare ju bäkänkä ie ngwane, ngwätedre kwe aune ñan ni gokä ye tuadremetre kwe niken gwi jai.
44 Ye medenbätä mun tädre juto arato, ñobätä ñan aune hora te mun ñan Ni Kä Nebätä Monsoi ngübare ngwane, rükaita.
45 ¿Nire metrere ni klabore ja ngwanka metre aune töbätä,* abokän ju bäkänkä käkwe mikani sribikätre jakwe gwi ngübare, ne kwe rabadre buke kä debe näre te?
46 ¡Ni klabore yebätä kä juto, bäkänkäkwe sribi nuain mananbare ie ye erere täi nuainne ngwane!
47 Ti niere metre munye, bäkänkä käkwe mikai jondron jakwe ye jökrä ngübarebiti.
48 Akwa, ni klabore ye käkwe kukwe käme nuaindre aune niedre kwe ja brukwäte ‘Ti bäkänkä tä ngrötöte krubäte’.
49 Aune rikadre sribikätre ben ye nuainne tare aune mröre aune dö ñain nitre dröba nikaka ben.
50 Aune ni klabore bäkänkä ye jataita köbö te ñan ngübare yete aune hora ñan gare ie yete.
51 Aune mikai ja ngie nuin kri kwe aune nitre ja bämikaka jerekäbe ben tä ja ngwen ño ye erere ja ngwain kwe ben. Yete ja muaidi kwe aune tu ukwadi kwe ja tare nikabätä”.
Nota
^ Lit. “reino”.
^ Lit. “monsota därere merikwebätä tä ja tare nike”.
^ O “dikakabätä tibe”.
^ Lit. “ngoto ritaite”.
^ O “ja ngwain metre”.
^ O “ne kwe nitre kä jökräbiti tibien ye ie juruadre”.
^ Ye abokän, profecía Danielkwe.
^ Lit. “ngätä jire”.
^ O “rua, unsuli”.
^ Ye abokän, rabai bare.
^ Ye abokän, jä jondron ukwara ne däkwita nämäne kisebiti.
^ O “töbikaka kwin käne”.
