Evangelio Mateokwe 25:1-46
25 “Gobran kä kwinbiti ye bämika raba meritre bati* ni jätä, käkwe ñotra diani kisete aune nikani ni brare ja mäkätekä ngäbiti ye kwrere.
2 Meritre ye nirike töbätä aune nirike abokän ñan töbätä.
3 Meritre töi ñaka ye nikani ñotra ngwena jai, akwa ñan nikani aceite ngwena jai ñotra kräke.
4 Akwa töbätä, ye abokän nikani ñotra ngwena jai, aune nikani boteate aceite ngwena jai ñotra kräke.
5 Ni brare ja mäkätekä ñan namani nüke, yebätä jökrä ie köbö namani aisete nikanintre ja düke.
6 Akwa kä ruäre deu ni ngwänänkwe juruabare: ‘¡Ni brare ja mäkätekä kitra! ¡Mun jakwe kain ngäbiti!’.
7 Aisete meritre bati ye jökrä nükani krö aune ñotra jakwe mikani juto kwetre.
8 Meritre ñan töbätä ye käkwe niebare töbätä yei: ‘Aceite ngwen chi nunye, ñobätä ñan aune ñotra nunkwe nibira nötöte’.
9 Meritre töbätä ye käkwe niebare ietre: ‘Nane mada ñan raba täte munbiti aune nunbiti. Yebätä bäri kwin mun nän kökö nire tä rürübäine yei’.
10 Akwa, niaratre nikani kökö ngwane, ni brare ja mäkätekä ye jatani. Meritre bati nämäne juto ye nikani gwä niara ben, mrö sribebare ere ja mäkäte kräke yebätä, aune jukwe ngidiani jite.
11 Ye bitikäre, meritre bati mada ye jatani aune niebare kwetre: ‘¡Däkien,* däkien, jukwe tike nunye!’.
12 Akwa niarakwe niebare ietre: ‘Ti niere metre munye, mun ñan gare tie’.
13 Aisete käre munkwe ja ngwan mokre, ñobätä ñan aune köbö ñongwane aune hora nuäi ngwane ye ñan gare munye.
14 Ni brare iti jämi niken juta madate känenkri, nitre klabore kwe ye kärä mananbare kwe, aune jondron jakwe ye mikani kwe ngübadre ie, ye kwrere Gobran kä kwinbiti ye bämika raba arato.
15 Iti ie talento biani kwe kwärike, madai biani kwe kubu aune madai kwati. Itire itire raba dre nuainne ye ererebätä biani kwe ietre, biti nikani juta madate.
16 Ni klabore ie talento biani kwärike, ye bengwairebe nikani aune negocio nuainbare kwe talento yebiti, ye köböire talento mada kwärike ganainbare kwe.
17 Erere arato, ni ie talento biani kubu ye käkwe mada kubu ganainbare.
18 Akwa ni ie talento biani kwatibe ye nikani, kä muani kwe aune ngwian biani bäkänkäkwe ie ye ükani kwe.
19 Kä nikani kabre ta ye bitikäre, nitre klabore ye bäkänkä nükaninta aune kukwe ükaninte kwe bentre.
20 Ni klabore ie talento biani kwärike ye nükani talento kwärike mada ngwena aune niebare kwe: ‘Däkien, mäkwe talento kwärike bianba tie, akwa tuin, tikwe talento mada kwärike ganainba’.
21 Bäkänkäkwe niebare ie: ‘¡Kwin krubäte, ni klabore kwin aune ja ngwanka metre! Tö ngwan raba mäi ye mäkwe bämikani jondron braibebätä, aisete tikwe mä mikai jondron kabre ngübare. Jakwe kä ngwen juto jabätä mä bäkänkä ben’.
22 Ye bitikäre ni klabore ie talento biani kubu ye nükani aune niebare kwe: ‘Däkien, mäkwe talento kubu biani tie aune mike ñärärä, tikwe mada kubu ganainbare’.
23 Bäkänkäkwe niebare ie: ‘¡Kwin krubäte, ni klabore kwin aune ja ngwanka metre! Tö ngwan raba mäi ye mäkwe bämikani jondron braibebätä, aisete tikwe mä mikai jondron kabre ngübare. Jakwe kä ngwen juto jabätä mä bäkänkä ben’.
24 Mrä mada, ni klabore ie talento biani kwatibe ye nükani käkwe niebare: ‘Däkien, mä kukwe ribere krubäte, aune mä ñan nura nökö känti mäta ngwä ötö, aune mä ñan trigo juenkä* känti mäta ükekrö ye nämä gare tie.
25 Ye medenbätä kä jürä rababa tibätä aisete tikwe talento mäkwe doboi mikaba. Ngwian mäkwe ne’.
26 Bäkänkäkwe niebare ie: ‘Ni klabore käme aune krene. ¿Jondron nöka ñan tikwe abokän ötata tikwe aune trigo juanka ñan tikwe abokän ükakröta tikwe nämä gare mäi ñaña?
27 Ye erere akräke, mäkwe ngwian tikwe mikadre bancote. Ye köböire ti rükadreta ngwane, rabadre bäri ere tikwe’.
28 Bitikäre niebare kwe: ‘Talento ye denkä kän aune ni klabore kwe talento tä kwäjätä yei bien.
29 Ñobätä ñan aune dre tärä ni itikwe yei biain bäri, aune rabai bäri ere kwe, akwa ni itikwe dre ñakare, ye kän dre tä kwe ye jögrä diainkä kän.
30 Aune ni klabore ngwarbe ñan ütiäte, ye kite jubäre kä ikote. Yete ja muaidi kwe aune tu ukwadi kwe ja tare nikabätä’.
31 Ni Kä Nebätä Monsoi ye jatai die kri bä nuäre yebiti, angeletre jökrä ye ben ngwane, rabai täkäni kürä Gobrankäre bä nuäre kwe yebiti.
32 Nitre kä jökräbiti tibien ye ükaikrö niara ngwärekri aune niarakwe nitre diainkä jene jene, ni oveja ngübaka tä oveja denkä jenena cabrabätä ye erere.
33 Oveja mikai kwe ja kise ruinkri, akwa cabra abokän mikai kwe ja kise ngeberekri.
34 Ye ngwane, Reikwe niei nitre tä niara kise ruinkri yei: ‘Mun kräke ti Rünkwe kukwe kwin mikani nemen bare ye jakwe. Ni kä nebätä sribebare kena* yete ja käne Gobran ükaninte mun kräke ye kain ngäbiti.
35 Ñobätä ñan aune mrö rababa tie ngwane, munkwe ti bukaba, tomana rababa tie ngwane, munkwe tomana bianba tie. Ti ni menteni akwa munkwe ti ka ngäbitiba töi mantiamebiti.
36 Ti nämä butiere* ngwane, munkwe ti ngwäkitaba, ti rababa bren ngwane, munkwe ti ngübaba, ti nämä kitani ngite ngwane, mun jataba ti tuin känti’.
37 Ye ngwane nitre kukwe kwin nuainkä käkwe niei: ‘Däkien, ¿ñongwane mrö rababa mäi aune nunkwe mä bukaba? ¿O ñongwane tomana rababa mäi aune nunkwe tomana bianba mäi?
38 ¿Ñongwane mä namani ni menteni aune nunkwe mä kani ngäbiti töi mantiamebiti? ¿Ñongwane mä nämä butiere aune nunkwe mä ngwäkitaba?
39 ¿Ñongwane mä nämä bren o mä nämä kitani ngite aune nun jananba mä tuin känti?’.
40 Aune Reikwe niei ietre: ‘Ti niere metre munye, kukwe jökrä nuainbare munkwe ti etebatre aune ti ngwaitre bäri kia ne kräke ye jökrä munkwe nuainbare ti kräke’.
41 Aune Reikwe niei nitre tä niara kise ngeberekri yei: ‘Mun rüere kukwe tare ñäkäibare, ye kämikekä ti okwä bäre. Ñukwä kärekäre* ükaninte Diablu aune angeletre kwe kräke yete mun nän.
42 Ñobätä ñan aune, mrö rababa tie akwa mun ñan ti bukaba aune tomana rababa tie akwa mun ñan tomana bianba tie.
43 Ti ni menteni akwa mun ñan ti ka ngäbitiba ja gwirete, ti nämä butiere akwa mun ñan ti ngwäkitaba, ti nämä bren aune kitani ngite akwa mun ñan ti ngübaba’.
44 Ye ngwane niaratrekwe niedi arato: ‘Däkien, ¿ñongwane mrö nämä mäi, tomana nämä mäi, mä ni menteni o mä nämä butiere o mä nämä bren o mä nämä kitani ngite aune nun ñan mä tuaba känti?’.
45 Ye ngwane niarakwe niedi ietre: ‘Ti niere metre munye, dre dre ñan nuainbare munkwe ti etebatre aune ti ngwaitre tikwe bäri kia ne kräke ye munkwe ñan nuainbare ti kräke arato’.
46 Niaratre ye krütai kärekäre,* akwa nitre kukwe kwin nuainkä ye nünain kärekäre”.
Nota
^ Meri jämi nemen ni brare ben meden nieta kukwe griegobiti.
^ Nete “Däkien” nieta ni mikakäre ütiäte.
^ Ye abokän, Adán bätä Eva monsoi.
^ O “dän nämä braibe tikwe”.
^ Ne abokän gaite kärekäre gärätä.
^ Lit. “tikaikä”.
