Evangelio Mateokwe 3:1-17
3 Kä nikani ta ye bitikäre Juan Bautista* nikani kukwe driere kä ngwarbe nötare Judeate.
2 Namani niere: “Ja töi kwite ñobätä ñan aune Gobran kä kwinbiti nibira no”.
3 Niara ye bä bätä ni Ngöbö kukwei niekä Isaiabiti kukwe ne mikani gare: “Ni iti ngwänänkwe ruin kä ngwarbe nötare känti: ‘¡Ji mikanintubu Jehovakwe ye mike juto! Ji ükete metre niara kräke’”.
4 Camello druen sribebare däne ye Juan nämäne kite jabätä aune nämäne cuero kite ja mrökarabätä. Tröda krikri aune munköi känsenta kweta nämäne kwe.
5 Aune nitre Jerusalén, nitre kä jökrä Judeate aune nitre kä jökrä Jordán käntita nämäne niken känti.
6 Niara nämäne nitre ngökö ñöte,* ñö Jordante aune niaratre nämäne ja mike ngite ye nämäne mike gare nitre jökrä ngwärekri.
7 Nitre fariseo* aune saduceo* kwatí jatani nitre ngöka nämäne ñöte ye käi känti jutuabare Juan ie ngwane, Juankwe niebare ietre: “Ichaoto* ngäbäli, ¿Ngöbökwe kukwe ükaite yebätä nire gitiamanani munye?
8 Käne munkwe ja töi kwitani ye munkwe bämika kukwe nuainta* munkwe yebiti.
9 Mun ñan tö ngwan jire kukwe ne niei kukwe mikakäre jabiti: ‘Nun abokän Abrahán mräkä’. Ñobätä ñan aune tita niere munye, jä oto nokokri Ngöbö raba Abrahán mräkä denkä.
10 Ü nibira juto kri ngätri ken, aisete kri meden ngwä ñan nemen kwin ye tikaikä aune kitai ñukwäte.
11 Ti abokän tä mun ngökö ñöte munta ja töi kwite yebätä. Akwa, ni kite ti jiebiti ye abokän bäri dite tikrä aune ti ñan raba sandalia tikete jire chi ngotobätä. Niarakwe mun bautizai üai demebiti aune ñukwäbiti.
12 Jondron juananka* ye tä kisete aune kä känti* jondron ngokwä munuanta kwe ye mikai mrebe täte kwe. Trigo ngokwä ükaikrö kwe aune mikai gwi kwe. Akwa krä* ye abokän kukwai kwe ñukwä ñan nötöte yebiti”.
13 Ye bitikäre, Jesús nämäne Galilea nikani ñö Jordante ne kwe Juankwe ngökadre ñöte.
14 Akwa, Juan ñan tö namani ngökai ñöte, aisete niebare kwe ie: “Mäkwe ti ngökadre ñöte, ¿se ño amare mä ja ngökamana ñöte tie se?”.
15 Jesukwe niebare mada ie: “Tuenmetre nemen bare kore, ñobätä ñan aune Ngöbökwe kukwe nuain mananbare ye nikwe nuaindre kore ye bäri kwin”. Aisete Juankwe ja töi mikani ngökö ñöte.
16 Jesús ngökani ñöte, aune nükaninta ñöte kä mrebiti* ngwane, kä kwinta ngetrani aune üai deme Ngöbökwe jatani Jesús* bititubu ütü kwrere jutuabare niara* ie.
17 Aune ye ngwane ni kukwei ngitianinkä kä kwinbiti käkwe niebare: “Ni ne abokän ti Ngobo tare tikwe, tita niara kain ngäbiti”.
Nota
^ O “Juan Ni Ngökaka Ñöte”.
^ O “krien täte ñöte”.
^ O “tibi”.
^ Lit. “ngokwä”.
^ O “kroko”.
^ Lit. “jataninta kwin”.
^ Lit. “niara”.
^ Nete blitata Juanbätä raba ruin.
