Evangelio Mateokwe 6:1-34
-
KUKWE KÄDRIEBARE NGUDREBITI (1-34)
6 “Kukwe kwin nuainta,* ne kwe nitrekwe tuadre yebätä munkwe ja ngübabiti. Ñobätä ñan aune munkwe ye erere nuaindi ngwane, mun Rün kä kwinbiti ñan ütiä biandi jire munye.
2 Mäkwe jondron bian ni bobre ie* ngwane, mä ñaka rika trompeta jüke nitre ja bämikaka jerekäbe tä niken nuainne sinagogate aune ji ngrabare, ne kwe nitrekwe käikitadrekä ye erere. Ütiä biandre ietre ye namanina jökrä kwetre ye tita mike gare metre munye.
3 Akwa mä abokän tä jondron bien ni bobre ie ngwane, mä kise ruinkri tä dre nuainne ye ñan rabadre gare mä kise ngeberekri ie.
4 Ye köböire mäta dre bien ni bobre ie, ye ñan rabai gare ni madai. Aune mä Rün ie jondron jökrä tuin yekwe ütiä biain mäi.
5 Arato munta orare ngwane, mun ñan ja ngwan nitre ja bämikaka jerekäbe erere, niaratre ye töta nemen oradi nünaninkä krö sinagogate aune ji krikrite* ne kwe nitre jökrä käkwe tuadre. Ütiä biandre ietre ye namanina jökrä kwetre, ye tita mike gare metre munye.
6 Akwa, mä abokän rika orare ngwane, mä rika cuartote, mäkwe jukwe dika, ye bitikäre, mäkwe ora mä Rün kä kwinbiti ie.* Aune mä Rün ie jondron jökrä tuin yekwe ütiä biain mäi.
7 Mäkwe ora ngwane, mäkwe ñaka kukwe arabe kädekate bati bobu, nitre käbiti tibien tä nuainne erere. Niaratre tä kukwe kabre niere köböire kukwe juruai nütüta kwetre.
8 Mun ñan ja ngwan niaratre erere. Munta dre ribere jai ye niena gare mun Rün ie mun jämi kärere ie ye känenkri.
9 Munkwe oradre ne kwrere:
‘Nun Rün tä kä kwinbätä mä kä mikadre deme jai.
10 Gobran mäkwe jatadre, mä tö dre ie ye erere rabadre bare kä kwinbätä arato kä tibienbätä.
11 Mäkwe mrö* bian nunye köbö matare kräke.
12 Aune ngite nunkwe ye juen ta nunbiti, nunta ngite ni madakwe juen tabiti ye erere.
13 Aune ñan kukwe tuametre* nun mike ja mike ngite, ñakare aune nun mike kwäre Satana yebätä’.
14 Ñobätä ñan aune munkwe ngite juain ta ni madabiti ngwane, mun Rün kä kwinbiti ngite juain ta munbiti arato.
15 Akwa munkwe ñan ngite juain ta ni madabiti ngwane, mun Rün ñan ngite juain ta munbiti arato.
16 Munta ja töi mike ñan mröre kä ruäre* te ngwane, ñan ja ngwäre mika ulire,* nitre ja bämikaka jerekäbe tä nuainne erere. Niaratre ñan tä ja ükete ne kwe niaratre tä ja töi mike ñan mröre kä ruäre te ye jutuadre nitre ie yekäre. Ütiä biandre ietre ye namanina jökrä kwetre ye tita mike gare metre munye.
17 Akwa mä, tä ja töi mike ñan mröre kä ruäre te ngwane, mäkwe aceite rä mane mika ja dokwäbiti aune mä ja ngwäre bätäte.
18 Ne kwe mäta ja töi mike ñan mröre kä ruäre te, ye ñan jutuadre nitre ie, ñakare aune mä Rün tua ñan raba ye aibe ie jutuadre. Aune mä Rün ie jondron jökrä tuin yekwe ütiä biain mäi.
19 Ñan jondron ütiäte kä nebätä ükakrö jankunu, ñobätä ñan aune yete kebe aune jiali tä juen ngwarbe, aune nitre gokä tä niken gore.
20 Ñakare aune jondron ütiäte ükekrö kä kwinbätä, yete kebe aune jiali ñan juen ngwarbe, aune nitre gokä ñan niken gore.
21 Ñobätä ñan aune jondron ütiäte mä kräke tä medente, yete mä brukwä täi arato.
22 Ni okwä ye ñotra ni ngrabare kräke. Yebätä mä okwäta kwekebe* kukwe keteitibätä ngwane, mä ngrabare jökrä rabai trä ngitiekä.
23 Akwa mä okwä käme* ngwane, mä ngrabare jökrä tä kä ikote. Käträ mäbätä ye metrere kä iko ngwane, ¡mäta rä kä ikote!
24 Ni ñaka jire iti raba sribire ni klabore erere ni nibu kräke, ñobätä ñan aune brukwä rabai iti kräke aune iti taredi kwe o ja ngwain metre kwe iti ie aune iti abokän mikai tuin ngwarbe kwe jai. Mun ñan raba nemen klabore Ngöbö kräke aune bengwairebe nemen klabore ngwian kräke.
25 Ye medenbätä ti niere munye: ñan ja töibika jankunu ja nire munkwe yebätä, munkwe dre kwetai aune dre ñai yebätä o ja ngrabare yebätä, dre kitai jabätä yebätä. ¿Ja nire ye ñan bäri ütiäte mrö ye kräke aune ja ngrabare ye ñan bäri ütiäte dän ye kräke?
26 Nukwä kwitekä kwinta ye miketari ñärärä kwin. Ñan nura nökö, ngwä ötö aune ükekrö gwi, akwa mun Rün kä kwinbiti tä buke. ¿Akräke nukwä ye bäri ütiäte mun kräke?
27 ¿Mun meden ja töibikabätä raba nüne bäri biti chi?*
28 Ne madakäre, ¿ñobätä munta ja töibikaire krubäte dän yebätä? Kriblü känsenta tä nirien ño, yebätä kukwe den jai ja töi kräke. Ñan tä sribire ja dibiti aune dän dike.
29 Akwa, ti niere munye Salomón namani ütiäte kri, akwa ñaka ja ngwä kitani kwe jire kriblü kwátibe ye erere.
30 Aisete, Ngöböta kä känsenta ngwäkite kore, matare tä aune jetebe abokän kitata ñukwäte, ¿se ñan mun bäri ngwä kitai kwe? ¿Ñobätä mun tödeke chi krubäte?
31 Yebätä, ñan ja töibika jire aune ñan nie: ‘¿Nikwe dre kwetai?’, o ‘¿Nikwe dre ñai?’, o ‘¿Nikwe dre kitai jabätä?’.
32 Jondron ne bä jiebiti nitre juta madate* tä näin kisere, akwa jondron jökrä ne munta ribere jai, ye gare mun Rün kä kwinbiti ie.
33 Ye medenbätä, käne munkwe Gobran Ngöbökwe aune kukwe ükateta metre kwe ye känä jankunu, aune jondron jökrä ye rabai munkwe arato.
34 Aisete, munkwe ñan jire töbika krubäte köbö jetebe yebätä, ñobätä ñan aune köbö jetebe ye jatai töbikakwe köbö ye näire ngwena. Kukwe niena kabre töbikakäre köbö kwatire kwatire te”.
Nota
^ Lit. “kukwe ükate metre jakwe nuainne”.
^ O “regalo ni mikakäre tuin bobre jai”.
^ O “ji ngetrete te”.
^ O “mä Rün ñan tuin”.
^ Lit. “pan”.
^ Lit. “ñan nun mika”.
^ Lit. “tä ja ngwäre mike jene”.
^ O “kä tuin kwin”.
^ Ye abokän, tä jondron känene krubäte.
^ Lit. “kise mröka krati”.
^ Ye abokän, nitre ñan Ngöbö mikaka täte.
