Evangelio Mateokwe 7:1-29
7 “Ñan ñäkä jankunu ni mada rüere, ne kwe ñan ñäkädre mun rüere.
2 ¿Mäta ni mada töi mike nüke gare jai o mäta ñäke rüere? Ye erere arato Ngöbökwe mä mikai tuin jai. Munta ja ngwen ño ni madabe ye erere niaratrekwe ja ngwain munbe.
3 ¿Ñobätä mä okwäta kä burie chi tä ni mada okwäte yebätä, akwa mä ñan kri oto kri tä mä okwäte ye mike ñärärä jai?
4 ¿Kri oto kri tä mä okwäte se ño amare ja nüke törö mäi niekäre mä eteba ie, ‘ti tuenmetre kä burie mä okwäte ye denkä jai’?
5 ¡Ja ruin deme mäi! Käne mäkwe kri oto tä mä okwäte ye dianka, biti kä burie tä mä eteba okwäte ye mä raba denkä ño ie, ye jutuai bäri kwin mäi.
6 Ñan jondron deme bian nukro ie. Arato ñan jondron ütiäte* kita mütü ngwäre känti, ñobätä ñan aune jerekäbe rätäi kwebiti, rikwitai munbe jabätä aune mun dikainte kiakia kwe.
7 Munkwe kärä jankunu aune biain munye, munkwe känä jankunu aune kwain munye, munkwe jukwe meta jankunu aune tikadi munye.
8 Ñobätä ñan aune nire tä kärere yei bianta, nire tä känene yei tä kwen, nire tä jukwe mete yei jukwe tikata.
9 Monso munkwe mrö kärädre munye ngwane, ¿mun meden käkwe jä biandre ie?
10 Aune gwa kärädre kwe munye ngwane, ¿munkwe ñan icha biandre ie ñan ererea?
11 Mun töi ngite, akwa jondron kwin bian gare munye monso munkwe ie, ¡aisete mun Rün tä kä kwinbiti bärira jire käkwe jondron kwin biain nire tä kärere ye ie!
12 Ye medenbätä, mun tö dre nuainmana jakrä ye erere munkwe nuain jökrä ni mada kräke. Ne abokän Lei aune kukwe niebare Nitre Ngöbö Kukwei Niekäkwe* meden gärätä.
13 Näin jukwe krä chi yete ta. Ñobätä ñan aune jukwe kwata kri aune ji kwata kri ye tä niken ni ngwena gata kokwäre aune nitre kwatí tä niken jukwe yete ta.
14 Akwa jukwe krä chi aune ji krä chi ye tä niken ni ngwena ja nire kokwäre aune nitre braibe ie tä kwen.
15 Nitre ja bianka Ngöbö kukwei niekä yebätä munkwe ja ngübabiti, ja ngwä kitani oveja kwrere tä niken mun kokwäre, akwa metrere niaratre lobo rubun krubäte erere.
16 Dre nuainta kwetre yebätä rabai gare. Uva aune higo ye öta ñan raba jire kri tukwäre yebätä, ¿ñan ererea?
17 Erere arato, kri kwin yebätä ngwä kwin tä nemen, akwa kri ngütiete yebätä ngwä käme tä nemen.
18 Kri kwin yebätä ngwä käme ñan raba nemen aune kri ngütiete yebätä ngwä kwin ñan raba nemen.
19 Kri ngwä ñan nemen kwin ye tikakata aune kitata ñukwäte.
20 Ye erere nitre ye tä dre nuainne yebiti niaratre rükai gare munye.
21 Ni ‘Däkien, Däkien’ niekä tie, ye ñan jökrä näin Gobran kä kwinbiti yete, ñakare aune nire tä ti Rün kä kwinbiti töi nuainne aibe rabai yete.
22 Kä ye ngwane, nitre kwati rabai niere tie: ‘Däkien, Däkien, ¿akräke ñan mä käbiti nunkwe kukwe rakaikä ja känenkäre ye mikaba gare, ñan mä käbiti nunkwe chokalitre juantariba mento aune ñan mä käbiti nunkwe kukwe ñan tuabare nuainba?’.
23 Ye ngwane tikwe niedi ietre: ‘¡Mun ñaka gare tie! ¡Mun ja töi mikaka kukwe käme nuainne, kämikekä tibätä!’.
24 Ye medenbätä, tikwe kukwe niebare ye nire käkwe kukwe nuai aune mikai täte, ye abokän rabai ni iti ja ngwanka töbätä* käkwe ju sribebare jäkwatabiti kwin ja kräke ye kwrere.
25 Ñü näkäni tibien, ñö namani kri, murie namani ribi krubäte aune matani ju yebätä, akwa ju ye ñan nikwitaninkä tibien ñobätä ñan aune üra nämäne nökani jäte.
26 Akwa tikwe kukwe niebare ye nire käkwe kukwe nuai aune ñan mikai täte, ye abokän rabai ni iti ñan ja ngwanka töbätä käkwe ju sribebare ümanbiti ye kwrere.
27 Ñü näkäni tibien, ñö namani kri, murie namani ribi krubäte käkwe ju ye ngrükaninte. Ju ye nikwitaninkä tibien aune ngidianinte jökrä”.
28 Jesús kukwe ne niebare ünä ngwane, Jesús nämäne dirire ño yebätä nitre kwatí nämäne yete ye töi namani ñan krütare.
29 Ñobätä ñan aune kukwe kite Ngöbökri ye drie nämäne kwe aune ñan nämäne dirire nitre escriba ye erere.
