Kä nete ja känenkäre, kä rabaite bäri nie ja ükatekäre Kristo Ja Nire Biani Ngwanta Törö Jai ye kräke. Jesús Ja Nire Biani Ngwandre Törö Jai bämän ötare yete ngwane, gätä Nita Dirire aune Ja Ngwen Ño ye ñaka nuaindre. Aune rabadre bare bämän krüte yebätä ngwane, kukwe kädrieta ni jökrä kräke aune Ja Tötika Ni Mikaka Mokre yebätä ye ñaka nuaindre. ¿Ni raba dre nuainne kä rabai ngwarbe nie yete? Namani bare siklo kena yete erere, kä nengwane kukwe keta kabre ükadrete gätä ütiäte krubäte ye nuainkäre (Lu 22:7-13; km 3/15 1). Ne madakäre, ni jökrä rabadre ja brukwä ükete biarebe köbö ye kräke. ¿Ni raba nuainne ño?

• Ni kwandre gätä yete ye ütiäte krubäte yebätä nikwe töbikadretari (1Co 11:23-26).

• Nikwe oradre Jehovai aune nita ja kete ño ben yebätä nikwe töbikadre (1Co 11:27-29; 2Co 13:5).

• Jesús Ja Nire Biani Ngwanta Törö Jai ye dre gärätä abokän kädrieta täräbätä yebätä nikwe ñäkädre aune töbikadretaribätä (Jn 3:16, TNM; 15:13).

Texto Bibliabätä dianinkä Jesús Ja Nire Biani Ngwanta Törö Jai ye kräke yebätä ja mräkätre ruäre tä ñäke, abokän tä Texto Ja Tötikakäre Köbö Kwatire Kwatire yete aune tätre töbiketaribätä. Nitre mada tä ñäke texto ükaninte recuadro yete yebätä. Ja mräkätre mada tä ja tötike kukwe ükaninte täräkwata Ni Mikaka Mokre yebätä, känti blitata Jesús Ja Nire Biani Ngwanta Törö Jai aune Jehová bätä Jesús tä ni tarere yebätä. Mäkwe kukwe ye keteiti diain ja tötikakäre ngwane, mä rabai krötö bäri Jehová aune Monso kwe ye ken.