Ni kökataribare ye köböire kukwe keta kabre kwin rabai nikwe yebätä nikwe töbikadretari Jesús Ja Nire Biani Ngwanta Törö Jai ye ngwane. Kukwe keteiti abokän nitre gaikröta. Jehová ñaka tö namani ni tuai krüte jire chi. Yebätä, ni mräkä tare nikwe tä krüte nikän ye nemen tare krubäte nie (1Co 15:26). Nitre ja tötikaka Jesukwe nämene Lázaro muaire ye namani tare Jesús ie arato (Jn 11:33-35). Jesús ye töi Rün kwe ye erere, yebätä nita ni mräkä tare nikwe krütani muaire ye nemen tare Jehovai arato (Jn 14:7). Nitre nämene Jehová mike metre täte krütani ye Jehová tö gaikröta, aune ni tö kukwe ye tuai nemen bare arato (Job 14:14, 15).

Kukwe ükateta kwin jatäri ye ütiäte krubäte Jehová kräke, yebätä nitre gaikröta ye rabai bare jatäri raba ruin nie. (1Co 14:33, 40). Nitre doboi metata ye ngwane nita muen ye erere ni ñaka rabaira, ñakare aune nitre gaikröta ye nikwe kai ngäbiti kwin aune nikwe käi ngwain juto jabätä. ¿Kukwe käbämikata yebätä mätä töbiketari, metrere nita krüte ye ngwane? (2Co 4:17, 18). ¿Nitre gaikröta aune nitre ngwakare rükaita nire mikata gare Jehovakwe Bibliabätä nie yebätä mätä debe bien ie? (Col 3:15).

• ¿Mä tö mä mräkä meden o ja ketamuko mäkwe meden tuaita metrere?

• ¿Nitre nämene Ngöbö mike mekera täte ye meden ben mä tö ja tuai aune blitai?