Biblia niaratre töi kwitani

Monso chi merire ja tuani kukwe tare ben, ¿yekwe kukwe kwin meden namani? Ni político ni mada nuainkä tare, ¿ye ño köböire namani ni kukwe driekä töi jäme? Niaratrekwe kukwe mikai gare nie.

“Ja töi mikadre kwin ti kräke aune ti taredre ye ie ti tö nämä” (INNA LEZHNINA)

DÄREBARE: 1981

JUTA: RUSIA

KUKWE MADA: NÄMÄNE CHI NGWANE JA TUANI KWE KUKWE TARE BEN

TIKWE JA NGWANI KRÖRÖ: Ti rün aune ti meye ye olo ngidianinte aune ti däreba olo ngidianinte. Kä nämä juto tibätä, akwa kä rababa kwä ti tibiti ngwane, ti rün aune ti meye ja tuanmetreba. Ti nämä chi krubäte, akwa dre rababa bare ye rükaba gare tie aune rababa tare krubäte tie. Ti rün aune ti meye ja tuametreba ye bitikäre ti rün aune ti ngwai umbre rababa Troick aune ti meye rikaba ti ngwena jabe Cheliabinsk. Kä rikaba ta ye bitikäre, ti meye ja mikabata gure. Ti rünkrä ye nämä dröbanike krubäte aune käre nämä nun nibu mete.

Kä 1993 ye ngwane, ti ngwai umbre ye murie reketaba ñöte. Ye rababa tare nun jökrä ie. Ti meye jataba dö ñain krubäte aune jataba ti nuainne tare arato. Nüna kwin ie ti tö nämä. Ja töi mikadre kwin ti kräke aune ti taredre ye ie ti tö nämä. Ti töi mikadre jäme yekäre ti rikaba iglesia kabre te, akwa ye erere ñan rababa bare tibätä.

BIBLIAKWE TI TÖI KWITANI ÑO: Kä nämä 13 tibiti ngwane, monso merire nänkä kwelate tibe ye käkwe kukwe nakaninkä Bibliabätä ruäre ye mikaba gare tie. Noé aune Job käkwe ja tuani kukwe tare ben, akwa yebiti ta Ngöbö mikani täte jankunu kwetre ye nämä tuen kwin tie. Kä rikaba braibe ta ngwane, ti rababara ja tötike Bibliabätä aune kwen gätäbätä.

Kukwe metre kwin krubäte ye rababa gare tie kukwe Ngöbökwe yebätä. Ngöbö kä tärä jeñe aune dre dre rabai bare kä krüte näire ye Bibliakwe mikani gare metre ta, ye käkwe ti töi mikaba niä (Salmo 83:18; 2 Timoteo 3:1-5). Nitre krütanina gaikröta rababa gare tie ye kämikaba juto tibätä. ¡Tikwe ti ngwai tuaita ye käi nuäre tibätä! (Juan 5:28, 29).

Akwa dre käi nämä juto tibätä ye ñan käi nämä juto nitre jökräbätä. Ti meye aune ti rünkrä nämä ja mike nitre testiko Jehovakwe rüere aune nämäntre ja di ngwen tikwe ñan ja tötikadre jankunu Bibliabätä yekäre. Akwa dre nämä nemen gare tie ye käi nämä juto tibätä aune ti töi nämä ñan tuanmetrebätä.

Ti mräkätre nämä ja mike ti rüere, kukwe yebe ñan rababa nuäre ti kräke ja tuakäre. Kukwe mada tare rababa bare: ti ngwai bäri bati, nämä nemen tibe gätäbätä, murie reketaba ñöte arato. Akwa nitre testiko Jehovakwe nämä yete ti dimikakäre. Ja tare aune ja töi mikadre kwin ti kräke ti nämä ribere jai, ye niaratrekwe bämikaba tie. Niaratre nämäntre kukwe metre mike täte rababa gare tie, aisete kä 1996 ye ngwane tikwe ja ngökaba ñöte ja mikakäre testiko Jehovakwe.

KUKWE KWIN NAMANI TIKWE: Kä kwä ti te, tikwe ja mäkäninte Dimitry ni töi kwin yebe. Nun nibu tä sribire sukursal San Petersburgo nitre testiko Jehovakwe yete. Kä rikaba ta ngwane, ti rün aune ti meye jataba ja töi mike kwin kukwe mikata täte tikwe yebätä.

¡Jehová namani gare tie yebätä tita debe bien krubäte! Tita niara mike täte yebätä ja ruin kwin tie.

“Kukwe keta kabre ti nämä ngwentari jai” (RAUDEL RODRÍGUEZ RODRÍGUEZ)

DÄREBARE: 1959

JUTA: CUBA

KUKWE MADA: REBELDE POLÍTICO

TIKWE JA NGWANI KRÖRÖ: Ti däreba La Habana (Cuba) aune kä bobre känti ti ririaba, yete käre nitre ngedain jabätä ji ngrabare. Deporte yudo aune mada mada känti ja ga nämä ye nämä tuen kwin tie.

Ti ni ja tötikaka töi ngitiekä kwin, aisete ti rün aune ti meye ti töi mikaba niken universidate. Ti nämä yete ngwane gobran nämä ño juta tikwe te, ükadrete jataba ruen tie, yebätä tikwe ja mikaba nitre ji dokwäte rüere. Ti aune ni iti nänkä kwelate tibe nun rikwitaba jabätä policía ben krü goikäre kän aune nunkwe nuainba tare dokwäte. Yebätä nun kitaba ngite aune nun kämikadre nieba nunye. ¡Kä nämä krire 20 tibiti aune ti murie keta jababara!

Ti ketaninkä yete ti nämä kaibe ngwane, nitre dianinkä ni mada murie ketakäre (o pelotón de fusilamiento) yebe tikwe ja tuai ño, yebätä ti nämä ja kite, ñobätä ñan aune kä jürä nämä tibätä ye ti ñan tö rababa bämikai. Akwa kukwe keta kabre ti nämä ngwentari jai, ñodre, ¿ñobätä nitreta kukwe blo nuainne o nita nüne ye aibe ngörä?

BIBLIAKWE TI TÖI KWITANI ÑO: Kä rikaba ta ngwane, gata ñäkäibare nun kräke ye ükateba aune nun kitai ngite kä 30 te mikaba gare. Yete nitre testiko Jehovakwe ruäre rababa gare tie, kukwe mika nämä täte kwetre yebätä kitani ngite. Ngwarbe kitani ngite akwa ñan nämäntre rubun, ñakare aune töi nämäntre jäme aune nämäntre ja ngwen dite ye käkwe ti töi mikaba ñan krütare.

Ngöbö tö kukwe kwin nuaindi ni kä tibienbätä kräke. Kä tibien kwitai bä nuäre kwe, yete ja ñan nuaindi tare aune kukwe blo ñan nuaindi. Nitre töi kwin aibe käkwe nünandi kä kwin yete aune nüna kärekäre rabai kwetre, ye nitre testiko Jehovakwe käkwe mikaba gare tie Biblia yebiti (Salmo 37:29).

Nämäntre dre driere ye nämä tuen kwin tie, akwa ti ñan ñämä ja ngwen niaratre erere. Ti ñan raba ja ngwen neutral política yete o ja ngwäre kwärä mike metadre nämä ruen tie, aisete tikwe ja töi mikaba ñäke Bibliabätä. Nitre kristiano kena nämäne ja ngwen ño, ye erere nitre testiko Jehovakwe aibe nämä ja ngwen rababa gare tie, tikwe ñäkäba täte Bibliabätä ye ngwane.

Tikwe ja töi ükadrete rababa gare tie ja tötika Bibliabätä ye köböire. Ti nämä blite ño ye erere tikwe ñan blitadre mada, ñobätä ñan aune ti nämä kukwe ñaka kwin niere. Ka oto dua ye tikwe tuadremetre aune tikwe ñan ja mikadre política yete. Ñan rababa nuäre tikrä, akwa Jehová diebiti bätärekä bätärekä kukwe ye rababa tie.

Ti brukwä rubun ye ñan nemen nuäre tikrä gobrankäre. Yebätä Ngöbökwe ti dimikadre ja gobraine ye tita ribere ie. Bersikulo ruäre, ñodre Proverbios 16:32 ye kwrere ye tä ti dimike, tä niere: “Nire ñaka nemen rubun jötrö ngwarbe ye abokän bäri kwin ni dite krubäte ye kräke aune nire tä ja di ngwen ja töi mikakäre jäme ye bäri kwin ni tä juta den jai ye kräke”.

Barril o tanque te ñö nämä ti nämä kitani ngite yekänti, yete tikwe ja ngökaba ñöte ni testiko Jehovakwe erere kä 1991 ye ngwane. Kä rikaba kwati ta ye bitikäre, nun ngite ruäre mikaba kwäre aune nun juanba España, ñobätä ñan aune nun mräkätre nämä yete yebätä. Ti rababa España ngwane, ti janama gätäbätä aune ja mräkätre konkrekasionte käkwe ti ka ngäbitiba kwin, ti nämäna gare ietre mekerabe ye erere. Aune ti dimikaba kwetre kukwe kwin nuainne.

KUKWE KWIN NAMANI TIKWE: Nengwane käta juto tibätä aune tita Ngöbö mike täte ti muko aune ti ngänbriänkä merire ben. Tita kä denkä krubäte jai kukwe metre Bibliabätä ye driekäre nitre madai. Ruäre ngwane, tita nikrenta ja jiebiti, ti nämä bati bäsi ti kämikaba, ye bitikäre kukwe kwin keta kabre namanina tikwe yebätä tita töbike aune tita debe bienbätä. Ñan tita nire jerekäbe, ñakare aune tödekara tärä tikwe. Kä bä nuäre käbämikata, känti kukwe metre nuaindi aune “gata ñaka rabaira” ye rükadre ie tö (Revelación [Apocalipsis] 21:3, 4).

[Comentario]

“Ngöbö kä tärä jeñe [...] ye käkwe ti töi mikaba niä”

[Üai]

Kukwe Bibliabätä ye ti aune ti muko nunta mike gare kä jutobiti nitre olo ngidianinte ie