Jesús ye töi metre, aisete ni kä nebätä tä ja tuen kukwe kri ben aune töbikakwe yebätä yebe Jesús ñaka ja tuani. Akwa niara töbikabare bökän nitre yebätä aune ja di ngwani kwe kä jutobiti nitre dimike. Sribi meden nämene niara kisete ye ñan aibe nuainbare kwe, ñakare aune kukwe mada nuainbare. Ñodre, nuainbare ño kwe ye tä mikani kapitulo 32, 37, 57 aune 99.

Jesús ñan bikabare kri, ñakare aune nämäne nuäre blitakäre ben, nitre bati aune nitre umbre nämene ja kete Jesube töi jämebiti. Nitre nämäne ja kete Jesube ie ja nämäne nemen ruin kwin ñobätä ñan aune Jesús töi nämäne bökän bätätre yebätä. Ño niara ja ketani kwin nitre yebe ye tä mikani kapitulo 25 27, 95.

Käre Jesús nämene orare brukwä bökänbiti, kaibe aune nitre kwati Ngöbö mikaka täte ye okwäbiti arato. Nämäne orare bä kabre, ñan mrö ye aibe känenkri. Nämene orare yebiti nämäne Rün kwe käikitekä aune kukwe kwin diankäre nuaindre jai. Ari mike ñärärä dre nieta yebätä kapitulo 24, 34, 91, 122, 123 yete.

Ruäre ngwane ja dükadre ye Jesús nämä ribe jai. Akwa jondron ye mikani ja bäre kwe nitre mada dimikakäre. Niara ñan käbäre. Nekänti niara kukwe kwin bämikani ni käne. Nuainbare ño kwe ye tä mikani kapitulo 19, 41, 52 yete.

Ñobätä ütiäte ni tädre juto biare ngite juankäre ta ni madabiti ye ñan aibebätä blitabare kwe, ñakare aune nuainbare kwe nitre ja tötikaka kwe ben yebe aune nitre mada arato. Nuainbare ño kwe ye ari tuen kapitulo 26, 40, 64, 85, 131.

Nitre judío ñan Jesús kai ngäbiti aune nitre ja mikaka niara rüere Jesús murie ketai ye nie nämene profecía yete. Aisete Jesús raba kukwe kia kia nuainne. Akwa ja di ngwani kwe kukwe mikata täte metre ye mike gare. Yebiti kukwe kwin bämikani nikrä kwe ja mikata ni rüere aune ni kukwe ñan ka ngäbitita nitrekwe ngwane. Dre nieta kapitulo 16, 72, 103 yebätä ari töbike.

Jesús ye bäri kri ni kä nebätä ye ngwä, ñodre niara töbätä bäri aune kukwe gare krubäte ie. Niara töi metre aisete ni ñan iti jire raba ja gain niarabe. Akwa yebiti ta ja töi mikani bobre kwe aune sribibare ni mada kräke kwe. Ni raba ja kite kukwe nebätä kapitulo 10, 62, 66, 94, 116.

Jesús käre nitre ja tötikaka kwe aune nitre mada ye ngibiabare bätärekä, niaratre ñan Jesús kukwe mikaba täte o kukwe bämikani kwe ye erere niaratre ñan nuainbare. Dre nuaindre ja ketakäre Jehovabe ye Jesús ngwaninta törö ietre bätärekä. Jesús ni mada ngibiabare bätärekä ye mikata kapitulo 74, 98 , 118, aune 135.