“Kärekäre ti kukweibtä”

“Munkwe nünandikä kärekäre ti kukweibtä ne ngwane, mun rabadi ja töitikaka era metre tibe. [...] kukwe era metre Ngöböbtä rükadi gare munye amne kukwe era yebti mun rabadi tikaninte” (JUAN 8:31, 32)

¿Drebätä Jesús nämäne blite? “Ti kukweibtä” Jesukwe niebare ngwane, kukwe driere nämäne kwe yebätä blitabare kwe. Akwa kukwe drie nämäne kwe ye ñan kite niara kri ñakare aune ni bäri kri yekri ye driebare kwe: “Ti Rün tikwe käkwe ti juani ye abko tä dre niemna tie abko erere tita dirire” (Juan 12:49). Bati nämäne orare Ngöbö kwe Jehovai ngwane niebare metre kwe: “Ma kukwei era metre”. Ye medenbätä, niara nämäne dirire ngwane, Ngöbökwe dre niebare nitre niara mikaka täte kira ie ye käre nämäne kädekete (Juan 17:17; Mateo 4:4, 7, 10). Aisete, ¿ni kristiano era metre ye tä kwekebe Jesús kukweibätä ye tä bämike ño? Biblia ye aibe tä kukwe metre mike gare aune aibe tä kukwe metre driere kukwe mikadre täte aune ja ngwandre ño yebätä ye erere mikata tuin jai ngwane, ni kristiano tä kwekebe Jesús kukweibätä tä bämike.

Nitre kristiano kena kukwe bämikani. Apóstol Pablo, niara käkwe tärä bäri kabre tikani, ye nämäne Ngöbö kukwei mike ütiäre jai nuainbare Jesukwe erere. Niebare kwe: “Kukwe jökrä Tikani yebätä Ngöbökwe ja töi mikani” (2 Timoteo 3:16, TNM). Ne madakäre, nitre brere konkrekasionte ye ñaka kukwe mada ñan kite Ngöbökri ye driedre niebare ietre (Tito 1:7, 9). Arato, nitre kristiano ye mikani mokre ne kwe nitre ja töi aune kukwe kä nebätä driekä yekwe ñaka niaratre ngökadre (Colosenses 2:8).

¿Nitre meden tä ye erere nuainne ne ngwane? Constitución dogmática sobre la divina revelación Vaticano käkwe aprobabare 1965 aune ye kädekateta Catecismo de la Iglesia Católica yete mikata gare, “kukwe mikata gare kwetre ye jökrä ñan diankata Kukwe Ngöbökwe yebätä. Ye köböire kukwe ketebu, kukwe kä nebätä mikata deme jai aune kukwe kite Ngöbökri ye mika nämäne ütiäte aune deme jai”. Tärä Maclean’s yete meri ji ngwanka kukwebätä Toronto (Canadá) käkwe niebare: “¿Ñobätä ni rabadre ja jie ngwen kukwe niebare kä 2 mil nikanina ta ye ie? Kukwe kwin tärä nikwe ne ngwane arato, akwa ye ñaka tä nemen ütiäte ñobätä ñan aune Jesukwe kukwe driebare aune Biblia ye ererebätä kukwe nuainta yebätä”.

New Catholic Encyclopedia tä ne niere ni Testiko Jehovakwe yebätä: “Niaratre kräke Biblia ye aibe kukwei mikadre täte aune ererebätä ja ngwandre”. Bitinkä meri Testiko iti nämäne ja kä ye mike gare ni madai ngwane ni brare iti käkwe ñäkäbare kukweite ta, ni yekwe niebare: “Mun abokän nire ye niena gare tie”. Aune kise kitani kwe Biblia nämäne meri kisete yebätä aune niebare kwe: “Tärä ye köböire nemen gare mun abokän nire”.