“Kukwe kwin Gobran Ngöbökwe yebätä ye driedi”

“Kukwe kwin Gobran Ngöbökwe yebätä ye driedi kä jökräbiti tibien kukwe mikakäre gare nitre juta jökrä te ie aune ye ngwane kä krütai ye köböi rükai” (MATEO 24:14, TNM)

¿Dre gärä nämäne Jesukwe? Tärä Evangelio lucakwe tä niere: “Ngöbö jatanina nüke gobrane nibti abko kukwe kuin Jesu nikani niere juta krikrite amne juta kiakiate kä Galileate ta temen” (Lucas 8:1). “Ngöbö kite gobrane ni ngätäite, ye tikwe mikadre gare juta ketareketare te, abkokäre Ngöbökwe ti juani” niebare kwe (Lucas 4:43). Kenanbe nitre ja tötikaka kwe ye juani kwe kukwe driere juta känime te akwa ye bitikäre niebare kwe ietre: Mun “näin kukwe kuin tibtä ye niere [...]. Kä jökräbti temen” (Hechos 1:8; Lucas 10:1).

Nitre kristiano kena kukwe bämikani. Nitre ja tötikaka Jesukwe ye drekebe ngwarbe nikanintre sribire. Hechos 5:42 ye nieta: “Niaratre namani jankunu kukwe kwin Kristo Jesús yebätä driere bätä mike gare köbö kwatire kwatire templote aune ju ju te”. Sribi ne ni ruäre ye ñan aibe nämäne nuainne, ñakare aune itire itire nämänentre nuainne. Ni kukwe kira täinkä kä August Neander tä niere, “ni sribikä lananbätä, zapatobätä, batanero, nitre ñan janamane kwelate, nitre töi ñaka ye nämäne töi kwatibebiti kukwe driere, nitre ye kötaibare Celso ni kukwe tikaka kena ni kristiano rüere yekwe”. Jean Bernardi, tärä Les premiers siècles de L’Église (Los primeros siglos de la Iglesia) sribekä tä niere, ni kristiano ye “rabadre blite ni jökrä ben, kä jökrä känti, ji ngrabare, jutate, kä jondron rürübäinkäre yete, ju ju te. Kä kwin näire aune kä tare näire”. Ni tärä sribekä ye tä niere ja käne erere, namani rükadre ietre “kä kia kia jökrä känti”.

¿Nire tä ye erere nuainne ne ngwane? “Kukwe ñan kwin tä nemen bare ne ngwane ja üairebiti ye Iglesia ñaka ja töi mike nitre tötike ye köböite” nieta ni párroco anglicano David Watsonkwe. José Luis Pérez Guadalupe tärä sribebare kädekata, ¿Por qué se van los católicos?, yete tikani kwe: “Nitre testiko Jehovakwe tä ja ükaninte kwin aune tä nike ju ju te”, ye erere nitre evangélicos, adventistas aune nitre kukwebätä ñaka nuainne.

Kukwe metre niebare Jonathan Turleykwe informe del Cato Institute yete ye tä ni töi mike niä: “Ni testiko Jehovakwe nieta ni mada olote ngwane, nitre tä nüke jukwe mete kukwe Ngöbökwe driekäre ngüba ñaka ye ngwane, ye tä nüke drekebe nitre kwati ye töite. Tätre dre mike täte ye ñan ai drieta niken kwetre ju ju te ñakare aune yebiti tätre tödeke ye bämikata kwetre, ye kwrere kräketre” (Cato Supreme Court Review, 2001-2002).

[Recuadro]

¿Nire ye nibira gare mäi?

Kukwe nieta Bibliakwe ererebätä, ni kristiano metre ye abokän ye mikata gare kukwe ja tötikara känenbätä. ¿Nire kristiano metre ye nüra gare mäi? Nitre kwati tä ja ükaninte abokän tätre niere niaratre abokän kristiano metre. Akwa Jesukwe nitre ja tötikaka kwe mikani mokre ye ngwen törö jai: “Nire nire käkwe ‘Däkien, Däkien’ niedi tie ye ñan aibe köböire Gobran kä kwinbätä ye rabai kwe, ñakare aune nire nire käkwe ti Rün töi nuaindi ye aibe” (Mateo 7:21, TNM). Ye medenbätä, kukwe kwin rabai bare Gobran Ngöbökwe ie ye rabadre nikwe yekäre, nire tä ni Rün töi nuainne, ye abokän ni kristiano metre ye ni rabadre mike gare jai aune nemen siba yete bentre. ¿Mä törba kukwe mikai gare bäri jai Gobran nebätä aune dre mikai nemen bare kwe yebätä? (Lucas 4:43.). Nunta mä nübaire blite nitre käkwe tärä ne biani mäi yebe ye abokän nitre: Testiko Jehovakwe.