Kukwe ükaite käi näire abokänbätä blitata Bibliakwe ye ngwane dre rabai bare ye bämikata ño ja okwäte nitre kwatikwe, meden erere üaita mikani kise ruenkri. Nitre kwati krubäte ükaninkrö kürä gobrankäre ngöbökwe ye känenkri kukwe meden nuainbare kwetre ye ükatekäre bentre, ye nitre tä bämike ja okwäte: ruäre jä näin nüne kä kwinbiti, mada abokän mikai ja tare nike kä ñukwäre yete. Akwa Köbö te kukwe ükaite ye abokän kukwe blo nuainta käbiti tibien ye diainkäkäre täte mikata gare Bibliakwe (Salmo 96:13). Ngöbökwe Jesús dianinkä kukwe ükatekäre metre ni kä tibienbätä kräke (ñäkädre Isaías 11:1-5 aune Hechos 17:31 yebätä).

Adankwe ja mikani Jehová rüere. Niara köböite mräkätre jatäri tä ja mike ngite, ja tare nike aune krüte (Romanos 5:12). Kukwe ye ükatekäre, nitre kwati krubäte krütani ye Jesukwe mikaita nire. Ye rabai bare kä mil krati te Jesukwe gobrandi ngwane, mikata gare tärä Revelación o Apocalipsis yete (ñäkädre Apocalipsis 20:4, 11, 12 yebätä).

Nire nire gaikrota ye ben kukwe ükaite, akwa kukwe nuainbare kwetre krütadre känenkri ye ñan aibätä. Ñakare aune Revelación kapitulo 20 tä niere erere, kukwe täi rollobätä mikai gare ngwane, nitre yekwe dre nuaindi ye ererebätä kukwe ükaite bentre (Romanos 6:7). Nitre ie ja nire biainta aune kä biain ietre kukwe mikakäre gare jai Ngöböbätä, yebätä Apóstol Pablokwe kukwe niebare ngwane “nitre kukwe metre nuainkä aune nitre ñaka kukwe metre nuainkä” yebätä blitabare kwe (ñäkädre Hechos 24:15 yebätä).

Nitre krütani ie Jehová ñan namani gare aune ñan mikani täte ye ie kä biainta Jehová mikakäre täte. “Gaikröta nünankäre” bämikai kwetre Jehová mikai täte kwetre yebiti. Akwa nire gaikröta ye ñaka tö rabai Ngöbö mikai täte ngwane, “kukwe ükaite bentre” (ñäkädre Juan 5:28, 29 aune Isaías 26:10; 65:20 yebätä).

Kä mil krati te kukwe ükaite nitre ben ye käi näin ta ngwane, Jehovakwe nitre ja mräkäre sribebare metre kena erere, ja nire metre biainta kwe ni kä tibienbätä ie (1 Corintios 15:24-28). ¡Kukwe kwin rabai nitre yekwe ja mikabätä täte! Kä mil te Diablu täi ketaninkä kä timonbiti, Ngöbökwe ribiaikäta ni nuatekäre mrä. Satanakwe ja di ngwain nitre diankakäre jakri, akwa nirekwe ñaka ja mikai satanakri ye rabai nüne kärekäre kä tibienbätä (ñäkädre Isaías 25:8 aune Revelación 20:1, 7-9 yebätä).

Köbö kukwe ükatekäre madabätä Bibliata blite. Kukwe jökrä kä nengwane mikai krüte yebätä blitata. Köbö ye ie nitre kwain jäme, Ñü Kri Noé näire käkwe nitre blo kwati ganinte ye erere. Nitre käme ye gate köböra, ye ngwane nitre ja ngwanka metre ye aibe rabai nüne (ñäkädre 2 Pedro 3:6, 7, 13 yebätä).