Jän, meritre millón kwati tärä kä jökräbiti tibien. Tä ükaninte kwati krubäte kä jökräbiti tibien kukwe driekäre Gobran Ngöbökwe yebätä, mikani gare profecía Salmo 68:11 erere, yete Jehová tä niere: “Meritre tä kukwe kwin mike gare ye nitre rükä kwati krubäte”.

Sribi mikata nemen bare meritre testiko Jehovakwe ne ñan ja erebe meritre mada tä jie ngwen kukwe mada ngwarbebätä ye erere. ¿Kukwe meden ñaka tä nuainne ja erebe?

Käne, tä blite nitre jene jene ben. Meritre kukwe ngwarbebätä tä iglesia ye jie ngwen ye medenbätä nitre tä ja ükaninkrö iglesia kwetre ye aibe tä kukwe nuin. Akwa meritre testiko Jehovakwe abokän tä kukwe driere ni jökrä ie ju ju te aune kä mada känti, akwa ñaka dirire konkrekasionte.

Kukwe mada ñaka ja erebe tätre nuainne konkrekasionte. Meritre kukwe mada ngwarbebätä tädre nitre konkrekasion kwetre yete jie ngwen aune dirire iglesia kwe yete. Nitre brare ja ngökabarera ñöte, ñodre ni ni tuabitikä konkrekasionte nitre brare tä kädekani dirikä tärä ngwane, aibe raba dirire. Aune meritre testiko ñaka dirire konkrekasionte (1 Timoteo 3:2; Santiago 3:1).

Bibliabätä mikata gare nitre brare aibe raba konkrekasion jie ngwen. Apóstol Pablo kukwe ne mikani gare ni konkrekasion tuabitikä Tito ie: Ye medenbätä tikwe mä mikateba kä Creta yete, ne kwe juta kwatire kwatire yekänti mäkwe ni mikadre niaratre jie ngwanka tikwe nieba mäi (Tito 1:⁠5). Ye bitikäre, nieba kwe “Nitre ni jie ngwianka abko ni nüne era metre, aisete kukwe ñakare kwe, btä ni mda mda raba kite ngise abko ni krörö mika sribire makwe” (Tito 1:⁠6). Ji ngwandre ño yebätä apóstol ye käkwe kukwe bä kwrere tikani Timoteo ie. “Nire tö ja mikai nitre tödekaka Jesubti jie ngwianka, ye abko tö sribi kuin nuein. Nire erere tö sribi ye nuein abko [...] tädrera nüne metre ni mda mda okwäbti. Nebtä ni mda mdakwe ñan kädrie blo. Arato meri itibe kwe” (1 Timoteo 3:​1, 2).

Akwa, ¿ñobätä nitre brare aibe rabadre konkrekasion jie ngwen? Pablo käkwe mikani gare: “Nitre tödekaka Jesubti käta gätäre, ye känti ni merire käkwe ñan diri jire ni brareye. [...] Ñobtä ñan angwane Ngöbökwe Adán dätebare käne. Abti Eva dätebare kwe” (1 Timoteo 2:12, 13). Kukwe madabiti, ni raba niere ni merire aune brare sribebare kena kwe yebiti mikani gare kwe tö namani nire tuai ji dokwä ngwen aune dirire konkrekasionte.

Nire nire tä sribire Jehová kräke ye jie ngwanta Jesukristokwe yebätä nitre jökrä ye tä ja kite niarabätä. Ni ja tötikaka Jesukwe Lucas mikani gare: “Ngöbö jatanina nüke gobrane nibti abko kukwe kuin Jesu nikani niere juta krikrite amne juta kiakiate”. ¿Jesukwe nitre ja tötikaka niarabe juani kukwe ye arabe driere ngwane dre nuainbare kwetre? “Nikani juta kwatirekwatire kä ngrabare temen kukwe kuin Jesubtä ye kädriere” (Lucas 8:1; 9:​2-6).

Ye erere arato, nitre sribikä Jehovabe kä nengwane, nitre brare aune merire, tä kukwe niebarera ye mike nemen bare kä jutobiti. Mateo 24:14, TNM yete Jesukwe niebare: “Kukwe kwin Gobran Ngöbökwe yebätä ye driedi kä jökräbiti tibien kukwe mikakäre gare nitre juta jökrä te ie; aune ye ngwane kä krütai ye köböi rükai”.