Kukwe kira 24

José etebatre töi gani

JOSÉ eteba ni jätä ye töi nämene käme kräke ye tö namani gai. Yebätä niebare kwe: ‘Mun ye kä tuabitikä. Medente juta nunkwe ñaka kriemikani kwin ye mun jatani mike ñärärä.’

‘Nun ñaka kä tuabitikä,’ niebare kwetre. ‘Nunta blite metre. Nun ni jätä biti nibu jai. Akwa nun eteba iti ñaka niena, aune bäri bati abokän tä nun rünbe gwi.’

Kukwe ye ñaka namani metre José kräke kwrere ja bämikani kwe. Eteba kädeka nämene Simeón ye kitani ngite kwe, aune mräkä ye juaninta kwe mrö ngwankäre ja gwirete. Akwa niebare kwe ietre: ‘Mun jatata angwane mun jata mun eteba bäri bati ye ngwena.’

Niaratre namaninta Canaán angwane, kukwe namani bare ye jökrä niebare kwetre rün Jacob ie. Jacob namani ulire krubäte. ‘José aune Simeón ñaka niena niebare kwe. Tikwe ñaka Benjamín monso tikwe bäri bati ye tuainmetre niken munbe.’ Akwa mrö jatani krüte yebätä Jacob käkwe Benjamín juani Egipto etebatre yebe, mrö mada tuakäre.

José ie etebatre jutuabare. Eteba bäri bati Benjamín jutuabare ie angwane kä namani jutobätä. Akwa, ni ütiäte kri ye abokän José ñaka gare ietre. José käkwe kukwe keteiti nuainbare etebatre ni jätä ye töi gakäre.

Nitre sribikä mikani kwe jondron kwetadre üke sako ye jökrä te etebatre kräke. Akwa gore nitre sribikä ye mikani kwe copa sribebare ngwiane, ye mike Benjamín sakoi yete. Niaratre namanina mente angwane, Josekwe sribikä ye juani jiebiti. Nitre sribikä ye namani jiebiti angwane niebare kwe ietre: ‘¿Ñobätä munkwe copa sribebare ngwiane ye goibare jefe nunkwe yekän?’

Etebatre ye jökrä käkwe niebare, ‘nun ñaka copa kwe ye goire.’ ‘Copa ye tädre nun iti kwe angwane ni ye mürie ketadre.’

Ye medenbätä nitre sribikä ye namani copa ye känene sako jökrä yete, aune Benjamín sakoi yete kwani ietre, bämikani ye erere. Nitre sribikä käkwe niebare: ‘Mun raba niken akwa Benjamín abokän nun bike niken ngwena.’ ¿Etebatre ni jätä ye käkwe dre nuainbare?

Jökrä nikaninta Benjamín yebe José känti. Josekwe niebare etebatre ie: ‘Mun raba nikenta ja gwirete, akwa Benjamín aibe rabai sribire ni klabore erere tikrä.’

Judá käkwe niebare: ‘Ti ñaka rabaita niarabe angwane, ti rün krütai, ñan ñobätä aune niara tare krubäte kwe. Ye medenbätä ti tuenmetre sribire klabore jakrä, aune monso ye juenta.’

José etebatre käkwe ja töi kwitanina ye namani gare ie. Niaratre töi ñaka niena käme. Dre nuainbare Josekwe mada ani mike gare jai.

Génesis 42:9-38; 43:1-34; 44:1-34.