Kukwe kira 32

Kukwe 10 tare

KWADRO mike ñärärä. Kukwe tare jene jene ne Jehovakwe mikani nitre Egipto yebiti. Kena Aaronkwe krimana kwe yebiti ñö Nilo metani. Ye ngwane ñö nikwitani därire bätä gwa ngatani aune ñö rä namani kure.

Biti Jehovakwe gwre mikani näin kä mrebiti ñö Nilo yete. Horno, jondron ban mritakrä, jänbiti, kä jökrä känti gwre namani. Gwre ngatani angwane, nitre Egipto käkwe ükaninkrö, aune kä rä namani kure kä jökräbiti.

Biti Aarón dobro metani krimanabiti, dobro münü nikwitani tu o ngiba kia ni därie duaka ye erere. Ne abokän kukwe tare ketamä.

Kukwe tare mräkä namani nitre Egipto ye aibebiti aune ñaka nitre Israel yebiti. Kukwe tare ketabäkä, ye abokän munkä krikri nikani nitre Egipto jue ye jökrä te. Kukwe tare ketarike käkwe jondron nire kämikani. Nibi bätä obeja aune kabra kabre nitre Egipto yekwe ngatani.

Biti Moisés bätä Aarón käkwe ngübrün diani chi kisete aune kitani kwinta kwe, ye käkwe bren solan kwrere mikani nitre aune jondron nire yebätä. Ne abokän kukwe tare ketati.

Biti Moisekwe kise kaninkä kunkwäre aune Jehovakwe unsuli bätä ñü järe mikani näkäin tibien. Ñaka nemen bare kä Egipto känti ye erere namani bare.

Tröda namani kwati krubäte ye abokän kukwe tare ketakwä. Ñaka tuabare ye erere namani bare. Ñü järe käkwe ñaka kri juani ngwarbe ye tröda käkwe kwetani jökrä.

Kä namani drüne ye abokän kukwe tare keta ükän. Köbömä te kä namani drüne kä jökräbiti, akwa nitre Israel nämene nüne yekänti kä nämene ngwen.

Mrä, Ngöbökwe niebare nitre Israel ie, niaratre käkwe kabra o obeja ngäbä ye därie mikadre jukwebätä jai. Ángel iti Ngöbökwe nikani nitre Egipto ngätäite ta. Däri namani tuin ie angwane, ñaka namani nitre gwi kämike. Akwa däri ñaka namani tuin ie angwane, namani jondron nire kena bätä monso mubai ye kämike. Ne abokän kukwe tare keta jätä.

Kukwe tare ne bitikäre Faraonkwe nitre Israel juani, niaratre namanina juto aune köbö ye näire deu kä mikaninkä kwetre kä Egipto känti.

Éxodo kapitulo 7-12.