Kukwe kira 99

Kwarto mobe kwin känti

KÖBÖ nikani köböbu ta ye bitikäre, köbö juebe deu Jesús bätä nitre apóstol ni jätäbiti nibu nükani kwarto kri mobe kwin känti mrökäre Paskwa yete. Judas Iscariote nikani mento. Nitre sacerdote raba Jesús kain ño ngite ye nikani niere ietre.

Köbö ye känenkri, Judas niebare ietre: ‘¿Tikwe mun dimikai Jesús kain ngite aune, munkwe dre biain tie?’ Niaratre niebare ie: ‘Nunkwe ngwian mününe biain 30 mäi.’ Biti Judas nikani niaratre yebe ngwankäre Jesús nämene yekänti. ¡Kukwe käme krubäte! ¿ñan ererea?

Mrö paskwa kräke krütani. Akwa Jesús mrö mada ütiäte kömikani. Ban biani kwe nitre apóstol kwe ie aune niebare kwe: ‘Munkwe kweta, ñobätä ñan aune ne ti ngätä abokän ti biain mun ütiäre.’ Biti vino biani kwe basote ietre aune niebare kwe: ‘Munkwe ña, ñobätä ñan aune ne ti därie abokän ti biain mun ütiäre.’ Biblia tä mrö ne kädeke ‘ni Dänkien käkwe mröbare.’

Nitre Israel nämene Egipto aune ángel Ngöbökwe ‘nikani’ niaratre jue känti ta aune ñaka monsoi kämikani kwe, akwa nitre Egipto monsoi mubai kämikani kwe, ye ngwankäre törö jai nämene mröre Paskwa yete. Akwa Jesús ja nire biani nitre nänkä jiebiti ütiäre ye tö namani tuai ngwenta törö jai. Yekrä mrö ne nuainta kä kwatire kwatire te.

Ni Dänkien käkwe Mröbare ye bitikäre, Jesús niebare nitre apóstol kwe ie, niaratre ja ngwandre dite tödeka yebiti. Mrä kantabare kwetre biti nikani mento. Köbö yete kä namanina kä ruäre biti bäri deu. ¿Medente nikanintre?

Mateo 26:14-30; Lucas 22:1-39; Juan kapitulo 13-17; 1 Corintios 11:20.