Kukwe 7

Jesús ganinkröta nemen Pablo kitani ngite ye ngwane

Jesús kämikani ye bitikäre, köbömäkäre te ganinkröta. Ye näire ja mikani tuare kwe nitre nänkä ben ye ie bärike kä jene jene känti. Ja mikani tuare kwe ietre köbö 40 te. Biti nitre ja tötikaka kwe ruäre nämene mike ñärärä angwane, nikani kä kwinbiti. Kä nikani köbö jätä ta angwane Ngöbökwe üai deme ye mikani näkäin nitre ja tötikaka Jesukwe yebiti kä Jerusalén känti.

Ye bitikäre, nitre Ngöbö rüe käkwe nitre apóstol kitani ngite, akwa ángel iti käkwe mikani kwäre. Esteban ja tötikaka Jesubätä ye nitre rüere käkwe kämikani jäbiti. Akwa nitre ye ngätäite Jesukwe ni dianinkä iti sribikä ütiäte jakrä mikata gare, ye abokän kädekani apóstol Pablo. Jesús kämikani ye bitikäre kä nikani komä biti ötare ta angwane, Ngöbökwe Pedro juani kukwe driere Cornelio ni ñaka judío ie, bätä mräkätre kwe ie.

Kä nikani kwä jätäbiti komä ta ye bitikäre Pablo nikani kukwe driere kena. Nikani bobukäre angwane, Timoteo nikani ben. Pablo bätä nitre nänkä ben yebätä kukwe kwin krubäte namani bare nämene Ngöbö kukwei driere ye ngwane. Ye bitikäre, Pablo namani ngite Roma. Kä nikani kubu ta angwane mikani kwäre, akwa biti mikaninta ngite aune kämikani. Kukwe keta KÜKÜ kädrieta yekänti kä nikani 32 ta.