Kukwe kira 5

Namanintre nüne tare

KÄ BÄ nuäre Edén ye bäre Adán bätä Eva käkwe tare nikabare krubäte. Sribibare ja dibiti kwetre mrökäre. Kri ngwä kwin ñan namanina ñakare aune kritukwä aune krimu käme aibe namani nirien. Kukwe ne namani bare Adán bätä Eva käkwe ñaka Ngöbö mikani täte ye ngwane aune ñaka namanina ja kete Ben.

Kukwe bäri tare namani bare, Adán bätä Eva ñaka namanina nünankäre käre. Ngwen törö jai: niaratre käkwe kri ngwä kwetai angwane krütai, Ngöbö niebare ie. Ye  erere, kri ngwä kwetani kwetre ye näire bätärekä jatäri jatani umbre aune mrä krütani. Ngöbö ñaka mikani täte kwetre ye ngwane, ¡ja ngwani tö ñaka kwetre!

Ngöbökwe Adán bätä Eva juanintari kä Edén bäre ye bitikäre, monsoi jökrä ye därebare. Yebätä monsoitre jatani umbre biti krütani arato.

Adán bätä Eva käkwe Jehová mikadre täte akrä, niaratre bätä monsoitre käkwe nünandre kwin. Kä jutobiti nünandre kärekäre kwetre Kä tibienbätä. Ni ñaka rabadre umbre, bren aune krüte.

Ngöbö tö ni tuai nüne kärekäre kä jutobiti, aune ye erere tä käbämike. Kä tibien ñan aibe rabai bä nuäre, ñakare aune ni jökrä ñaka rabai bren. Ni jökrä rabai ja kete kwin bätä Ngöböbe.

Eva ñaka namanina ja ketamuko Ngöbökwe. Yebätä monsoi namani därere angwane namani ja tarenike. Ñaka Jehová mikani täte kwe yebätä namani ja tarenike krubäte, ¿ñan ererea?

Adán bätä Eva monsoi namani kwati krubäte brare aune merire. Monsoi kena ye kädekani kwetre Caín. Monsoi nibukäre kädekani kwetre Abel. ¿Dre namani bare monsotre nebätä gare mäi?

Génesis 3:16-23; 4:1, 2; Revelación 21:3, 4.