Kukwe kira 7

Ni itibätä kä jürä ñaka

NITRE namani nirien bäri kwati Kä tibienbätä ye angwane, jökrä bäsi käkwe kukwe käme nuainbare Caín ye erere. Akwa ni nämene iti abokän töi ñaka nitre mada ye erere. Ni ye kädeka nämene Enoc. Niara yebätä kä jürä ñaka nämene. Nitre nünanka niara bäre ye töi nämene käme, akwa niara nämene Ngöbö mike täte jankunu.

¿Ñobätä nitre nämene kukwe käme nuainne krubäte ye gare mäi? Töbike kukwe nebätä: ¿Nirekwe Adán bätä Eva töi mikani kri ngwä ye kwete aune ñaka Ngöbö mike täte? Ángel iti töi käme. Kädekata Bibliabätä Satana. Aune niara tö ni jökrä töi mikai käme.

Ngöbö Jehová käkwe Enoc mikani kukwe mike gare, ye nitre ñaka tö namani kukwe nuai. Kukwe ne niebare kwe: ‘Ngöbökwe nitre töi käme ye jökrä gaite.’ Kukwe yebätä nitre namani rubun krubäte. Tö namani Enoc mürie ketai. Akwa, Enoc käkwe ñaka kä jürä ngwani jabätä, Ngöbö tö namani dre nuaindi ye niekäre.

Ngöbökwe ñaka Enoc tuanimetre nüne raire nitre käme ye ngätäite. Niarakwe nünanbare kä 365 aibe te. ¿Ñobätä nünanbare kwe kä “365 aibe” nieta? Ñan ñobätä aune, kä ye ngwane nitre nämene bäri dite yebätä nämene nüne bäri raire. ¡Matusalén Enoc monsoi käkwe nünanbare kä 969 te!

Enoc krütani ye bitikäre, nitre töi namani bäri käme. Biblia kätä niere ‘kukwe käme aibe nämene käre niaratre töibätä,’ aune ‘kukwe käme aibe nuain nämene Kä tibienbätä.’

¿Ñobätä tarenika nämene krubäte gare mäi? Satana käkwe nitre töi mikani kukwe käme nuainne. Kukwe meden ye ani mike gare jai.

Génesis 5:21-24, 27; 6:5; Hebreos 11:5; Judas 14, 15.