Kukwe kira 3

Ni sribebare kena

¿DRE üaita mikani nete abokän ñan ja erebe? Jän, nitre tuin yete. Ni brare bätä meri sribebare kena. ¿Nire käkwe sribebare? Ngöbö. ¿Niara kädekata ño gare mäi? Jehová. Ni brare aune meri ye kädekani Adán bätä Eva.

Ngöbö Jehová käkwe Adán sribebare krörö: dobro diani kwe yebiti ni sribebare töi metre kwe. Biti mürie täkäni insonte kwe aune Adán namani nire.

Ngöbö Jehová käkwe sribi biani Adán ie. Adán käkwe jondron nire ye jökrä kädekadre niebare kwe ie. Adán käkwe ja tötikani kä kwati te jondron nire yebätä kädekakäre kwin raba ruin. Adán nämene sribi ne nuainne angwane, kukwe keteiti käkwe ngwani töbike. ¿Dre gare mäi?

Jondron nire jökrä nämene krobu krobu. Elefante nidan bätä möre nämene, aune kwra lion nidan bätä möre nämene. Akwa Adán muko ñaka nämene. Ye medenbätä, Jehovakwe Adán mikani ja düke nguseta, biti krona dianinkä krati kwe. Krona yebiti Jehovakwe meri sribebare Adán kräke abokän namani niara mukore.

¡Kä namani juto krubäte Adán yebätä! Aune Eva namani kä bä nuäre nünankrä te, ¡ye käi namani jutobätä! Ye ngwane monsoi namani bätä namani nüne keteitibe kä jutobiti.

Jehová tö namani Adán bätä Eva tuai nüne kärekäre. Kä tibien ye jökrä sribedre bä nuäre kwetre kä Edén ye erere ie Ngöbö tö namani. ¡Adán bätä Eva yebätä kä namani juto nuainkäre! Mä tädre yete akrä, ¿mä törbadre Kä tibien ye sribei bä nuäre arato? Akwa Adán bätä Eva käkwe ñaka nünanbare kärekäre kä jutobiti. Ñobätä, ye ani mike gare jai.

Salmo 83:18; Génesis 1:26-31; 2:7-25.