Kukwe kira 37

Ju Ngöbö mikakäre täte

¿JU NE drekäre gare mäi? Ju ne sribebare Jehová mikakäre täte. Kädekata tabernáculo. Nitre Israel käkwe kä mikaninkä Egipto ye bitikäre, kä kwatibe te sribebare kwetre. ¿Ju sribedre ye nirekwe niebare gare mäi?

Ye Jehovakwe niebare. Moisés nämene ngutuä Sinaí yebiti angwane, sribedre ño ye Jehovakwe niebare ie. Sribedre ne kwe rabadre nuäre diandrekä niebare kwe ie. Ye köböire, dianka nämene jene jene aune jänämene niken kä madakänti, biti ükate nämene bobukäre yete. Ye medenbätä, nitre Israel nämene niken kä madakänti kä nötare yebiti angwane nämene niken ju ye ngwena jabe.

Kä ketaninkä chi kä teri yekänti kaja tä mikani. Kaja ne deme. Kaja deme yebätä kerubin o ángel nibu sribebare orore nämene mikani, iti nämene mikani kräbätä kwärikwäri. Ngöbökwe Kukwe keta Jätä ye tikabareta bobukäre jä kwatare kububätä, ñobätä ñan aune Moisekwe jä kena ye ötaninbätä. Jä ye mikani ngwäte kaja deme yete. Arato yete maná mikani ngwäte. ¿Maná ye dre törö mäi?

Jehová käkwe Moisés eteba Aarón ye kädekani sacerdote bäri kri. Niara käkwe juta ye jie ngwani Jehová mikakäre täte. Aune monsotre kwe ye kädekani sacerdote arato.

Kwarto bäri kri ju yete ye mike ñärärä. Ye abokän bäri kri kwarto chi yekrä. ¿Kaja chi känti ngübüta nen kunkwäre ye tuin mäi? Kä ükaninte ye jondron kukwakrä, känti nitre sacerdote nämene jondron rä mane ye kukwe. Ñotra krä ye mike ñärärä arato, ñotra krä kükü tä mikani biti. Mesa ye jondron ketamäkäre nämene ju yete, abokänbiti ban krä jätäbiti krobu nämene mikani.

Tabernáculo yekänti jubäre ñö ngwä kri mikani te ñöta kwati. Yete nitre ji ngwanka käne nämene jondron bätete. Yete kä ükaninte kri jondron kukwakrä yeta mikani arato. Kä yekänti jondron nire kämikani ye kukwata Jehová kräke. Nitre Israel ja jue mikani ye ngätäite ju ye tä mikani, aune niaratre tä nüne bäre ta.

Éxodo 25:8-40; 26:1-37; 27:1-8; 28:1; 30:1-10, 17-21; 34:1, 2; Hebreos 9:1-5.