Kukwe kira 36

Nibi ngäbä sribebare orore

¡MIKE ñärärä! ¿Nitre tä dre nuainne? ¡Tätre orare nibi ngäbä ie! ¿Ñobätä tätre ne nuainne?

Moisés ñan namani nüketa, yebätä nitre käkwe niebare: ‘Dre namani bare Moisebätä ñan gare nie. Ani ngöbö sribere jai ne kwe ni diandrekä kwe kä nekänti.’

Aarón Moisés eteba käkwe niebare: ‘nuain raba.’ Olomie aune jondron orore ye ükökrö, aune ngwen tie. Nitre ye nuainbare angwane, Aaronkwe dükaninte biti nibi ngäbä sribebare orore kwe. Aune nitre käkwe niebare: ‘¡Ne Ngöbö nikwe, käkwe ni dianinkä Egipto!’ Ye ngwane, bieta kri sribebare kwetre aune nibi ngäbä sribebare ye mikani ngöböre kwetre jai.

Jondron ye jutuabare Jehovai angwane, namani rubun krubäte. Aune niebare kwe Moisés ie: ‘Jötrö ngwarbe näntä. Nitre tä kukwe käme nuainne. Ti kukwei käi kwitaninkä jabiti kwetre aune tätre nibi ngäbä orore ye mike ngöböre jai.’

Moisés nämene ngutuäbiti jataninta jötrö ngwarbe. Namani nitre ye ken aune jondron ne jutuabare ie. ¡Nitre nämene kantare aune bailare nibi ngäbä ye bäreta! Moisés namani rubun krubäte, yebätä jä kwatare känti Ngöbö kukwei tikani ye kitani tibien kwe aune nötaninbätä jökrä. Biti nibi ngäbä ye dükaninte kwe; aune juani ngwarbe kwe.

Nitre kukwe käme krubäte nuainbare. Yebätä nitre ruäre käkwe ngitra diandre kisete niebare ie Moisekwe. ‘Nitre käme käkwe nibi ngäbä mikani ngöböre jai ye kämikadre,’ niebare kwe. ¡Yebätä nitre ye käkwe ni 3.000 kämikani! Kukwe ne tä mike gare nie Jehová aibe mikadre täte, aune ñaka ngöbö ngwarbe mikadre täte, ¿ñan ererea?

Éxodo 32:1-35.