JESÚS nikaninta kä kwinbiti ye köböi nikani köbö jätä ta, ye bitikäre fiesta Pentecostés nuainbare nitre judío yekwe kä 33 yete, ye ngwane nitre ja tötikaka 120 nämene ja ükaninkrö ju kwati te Jerusalén. Batibe, murie ngö ye erere kä ngö namani, ye ngwane nitre ja tötikaka namanintre blite kukwe jene jene ñaka nämene gare käne ietre yebiti. ¿Dre nämene nakainkä? Ngöbökwe üai deme biani ietre.

Nitre juta keta kabre känti nämene juta yete fiesta ye nuainkäre. Nitre ye töi namani ñan krütare, ñobätä ñan aune nitre ja tötikaka Jesukwe ye namanintre blite bentre kukwe kwetre yebiti. Joel ni Ngöbö kukwei niekä käkwe niebare Ngöbökwe üai deme ye mikai nitre niara mikaka täte yebiti, aune Ngöbökwe niaratre mikai kukwe ütiäte nuainne ye Pedrokwe ngwaninta törö ietre, ne kwe kukwe namani bare ye rükadre gare ietre (Joel 2:28, 29). Niaratre namani jondron ñan tuabare nuainne ye käkwe mikani gare metre niaratre ye namani konkrekasion kristiano abokän kräke Ngöbö namani kukwe kwin nuainne, aune ñaka namanina juta Israel. Ye medenbätä, kä ye näire ja käne nire törbadre Ngöbö mikai täte yekwe ja mikadre kristiano.

Akwa, nitre ja mikaka Jesús rüere ye jatani ja mike nitre ja tötikaka ye rüere. Bati, nitre ye ruäre kitani ngite, akwa ángel nükani iti deu niaratre mike kwäre aune niaratre rabadre kukwe driere jankunu niebare kwe ietre. Kä jatani ngwen angwane, nikanintre templote aune namanintre blite Jesubätä. Nitre ji ngwanka kukwebätä namanintre rubun krubäte, yebätä kukwe drie ye ñäkäibare kwetre ietre. Akwa nitre apóstol ñaka kä jürä ngwani jabätä niekäre ietre: “Bäri kwin Ngöbö mikadre täte nunkwe, ni kä tibienbätä ne kräke” (Hechos [Sribebare] 5:28, 29, Ngöbö Täräe, tärä okwä ükaninte).

Nitre ja mikaka niaratre rüere ye ñaka namanintre kwekebe, ñakare aune bäri ja mikani kwetre rüere. Nitre judío ruäre Esteban kitani ngise aune täkäni jäbiti. Monso bati, Saulo de Tarso, brukwä nämene nitre kristiano kräke ye okwäbiti Esteban murie ketani. Kukwe namani bare ye bitikäre Saulo de Tarso nikani Damasco nitre jökrä kristiano ye kakäre ngite. Akwa nikani ji ngrabare ye ngwane, käträ kä kwinbiti käkwe kä dikaninte okwäte. Ye ngwane ni kukwei juruabare ie: “¿Saulo, ñobtä mata näin kisere kore ti jiebti ti mikakäre ja tare nike yere?”. Namani kä debe te, aisete ngwanintari kwe: “¿Ma abko nire ti Dänkien?”. Ni ye käkwe niebare mada: “Ti abko Jesu” (Hechos 9:3-5).

Köbö nikani köbömä ta ye bitikäre, ni ja tötikaka kädeka nämene Ananías ye Jesukwe juani känti, ne kwe rabadre kä miketa tuin ie. Saulo ja ngökani ñöte aune jatani kukwe driere kä jutobiti. Ja känenkäre, kädekani apóstol Pablo, aune namani kristiano sribi misionero nuainne.

Kena, nitre ja tötikaka ye nämene kukwe Gobran Ngöbökwe yebätä driere nitre judío aune samaritano ye aibe ie. Akwa, Cornelio ni nitre rükä romano jie ngwanka abokän nämene tö ngwen Ngöbö metre ie, yei ángel iti ja mikani tuare aune apóstol Pedro ye kärädre kwe jakänti niebare kwe ie. Pedro ye nükani nitre mada ja tötikaka yebe aune kukwe driebare kwe Cornelio ie aune mräkätre yei. Apóstol ye nämene blite nitre yebe angwane üai deme namani nitre yebiti, aune Pedrokwe ngökamanabare ñöte Jesús käbiti. Yete ja käne, nitre kä jökrä känti yekwe ja nire kärekäre raba nemen. Erametre, kukwe kwin ye driedi juta jökrä te.

(Dianinkä Hechos 1:1–11:21 yebätä.)