TÄRÄ mrä Bibliabätä kädekata Revelación, o Apocalipsis ye tä nitre kä tibienbätä mike tö ngwen kukwe kwin ie. Apóstol Juan käkwe tärä ye tikani, kukwe rabadre bare ja känenkäre tuani köböre kwe aune Jehová töita ño ye mikai nemen bare kwe ye nieta mrä tärä yebätä.

Jesukwe konkrekasion keta kabre ie kukwe niebare dimikakäre aune mäträbarebätä ye mikani tuare kena köböre Juan ie. Köböbare bobukäre kwe ye ngwane, kürä gobrankäre Ngöböi kä kwinbiti ye tä ükaninte ño aune nitre ja üaire tä Jehová käikitekä tuani kwe ye tä mike gare.

Ngöbö töita ño ye jataira nemen bare jökrä ye ngwane, rollo täi ketaninkä bä kükü ye biain Jesukristo ie. Ketabokä käne ye metaite kwe angwane, nitre jatai nibokä mädäbiti. Ni kena nänkä mädäbiti ye abokän Jesús ara, niara kädekani Reire aune tä näin mädä ngwenbiti. Nitre nimä ye tä näin mädä bä jene jenebiti, ye abokän bämikata rü, mrö nika aune bren yebätä, kukwe ye erere tä nemen bare akwa mika köböra krüte. Rollo ketaninkä keta kükükäre ye metaite angwane, trompeta ngö mikai bä kükü, ye abokän Ngöbökwe kukwe keta kabre nuaindi ye meden gärätä. Ye abokän kukwe keta kükü tare mikai nemen bare Ngöbökwe meden gärätä.

Ye bitikäre, monso därebare tuani Juankwe, ye abokän Gobran Ngöbökwe ükaninte kä kwinbiti bämikani. Rü kri nakaninkä, aune Satana bätä chokalitre ye juanintari kä kwinbiti aune kitani kä tibienbätä. Ye ngwane ni kukwe juruabare kri: “Aingwaree mun nünanka kä temenbtä”. ¿Ñobätä? Ñobätä ñan aune kä nebera chi Diablu käne ye gare ie aune tä rubun krubäte (Apocalipsis 12:12).

Jesús namaninta kä kwinbiti cordero kwrere, aune nitre 144,000 dianinkä “gobran[käre] [...] ben” ye tä ken. Meri ngäbriäntre ketebukäre kädrieta ye abokän nitre 144,000 kä tibienbätä ye meden gärätä ye mikata gare tärä Revelación yebätä (Apocalipsis 14:1; 20:6).

Ye bitikäre, gobrantre Kä tibienbätä ye käkwe ja ükaikrö rü Armagedón kräke, o “rükäre köbö kri Ngöbö dite jökräkwe näire”, aune nitre yekwe rüdi ni nänkä mädä ngwenbiti aune nitre rükä ja üaire nänkä ben yebe. ¿Rü krütai ño? Gobrantre gaite aune Satana mäkäite. Jesús aune nitre 144,000 ye käkwe gobrandi Kä tibienbiti kä 1,000 te, aune kä 1,000 krati krütai ye ngwane, Satana gaite arato (Apocalipsis 16:14; 20:4).

¿Jesús gobrandi kä 1,000 te ye ngwane dre nuaindi kwe ni kä tibienbätä Ngöbö mikaka täte ye kräke? Juan mikani gare: “Angwane Ngöbökwe niaratre okwä ñöi sökadite jökrä ietre amne ni ñan krütadre jire iti mda amne ñan ja müaidre jire chi mda amne ñan ja müaidre ja tare nikabtä, ñobtä ñan angwane kukwe nämane ükaninte ño känekäne, erere nikanina jökrä ta” (Apocalipsis 21:4). Ye tä mike gare metre, ¡Kä tibien kwitaita bä nuäre!

Ne kwrere tärä Apocalipsis tä kukwe Bibliabätä mike gare mrä: Rei Dianinkä Ngöbökwe yebiti niarakwe ja kä ye mikaita kwin merebe aune niara aibe rabadre gobrane kärekäre ye mikai gare metre kwe.

(Dianinkä tärä Apocalipsis yebätä.)