¿NIKWE Jehová tuanemetre ja jie ngwen ye kwin? Kukwe ye mikakäre gare jai, tä dre niere nie Kukwe kwe yebätä ye nikwe mikadre gare jai. ¿Ye kukwe kwin? ¿Tä ni dimike nüne bäri kwin? Tärä Proverbios yebätä Salomón kukwe keta kabre tikabare nikwe nünandre ño yebätä. Ani mike gare ruäre jai.

Ja keta Ngöböbe. Nikwe ja ketadre kwin Jehovabe yekäre nikwe tö ngwandre ie ye ütiäte krubäte. Salomón niebare: “Mäkwe tö ngwan Jehovai ja brukwä tätebiti aune kukwe nüke gare mäi yei mäkwe ñaka tö ngwan. Mäkwe niara ngwan törö jai kukwe jökrä känti, aune niarakwe mä jie ngwain ji metre yebiti” (Proverbios 3:5, 6). ¿Nita tö ngwen Ngöböi ye nita bämike ño? Nita ja tuenmetre jie ngwandre ie aune nita niara kukwei mike täte. Ye erere nita nuainne angwane, nita kukwe ne bämike: nita kä mike juto ni Rün kä kwinbiti ye brukwäbätä aune Diablu ni ngökö ye nita bämike (Proverbios 27:11).

Ni mräkätre aune ja ketamukotre. Ngöbökwe nitre ja mräkäre jie ngwandre ye tätre ribere bäri jai kä nengwane. Ngöböta mäträre krörö ni brare gure yebätä: “Kä ngwen juto jabätä meri kena mäkwe yebe”, ni brare käkwe ja ngwandre metre muko kwe yei ye ngwanta törö kwe ie (Proverbios 5:18-20). Meri gure rabadre dre nuainne ne kwe muko kwe aune ngäbriäntre käkwe mikadre ütiäte jai aune käikitadrekä ye mikata gare ietre Proverbios kapitulo 31 yebätä. Aune monsotre rabadre rün aune meye kukwei mike täte nieta ietre (Proverbios 6:20). Tärä ye tä niere ja ketadre ye ütiäte krubäte aune nikwe kä mikaikä ni madabätä angwane ni jatai töbike ja aibebätä yebätä tä ni mike mokre (Proverbios 18:1). Nikwe ja ketadre nitre töi kwin ben ye ütiäte krubäte, akwa ni ñaka ja ketadre ni jökrä ben aune nire raba ni mike näin ji blobiti yebe ñaka ja ketadre (Proverbios 13:20; 17:17).

Ja ngwandre kwin. Tärä Proverbios yebätä kukwe keta kabre ütiäte nieta abokän tä ni dimike nüne kwin aune tä ni dimike kukwe ñaka kwin denkä ja töite, tä ni dimike ñaka dö ñain krubäte, ja töi mike kukwe kwinbätä aune sribire bäri kwin (Proverbios 6:6; 14:30; 20:1). Ne madakäre, kukwe ñaka Bibliabätä abokän drieta yei nikwe ja tuainmetre ngökadre angwane, kukwe tare raba nemen bare nibätä yebätä tä ni mike mokre (Proverbios 14:12). Ni ñaka rabadre ja brukwä ye mike käme nieta kwe nie arato, ñobätä ñan aune “yete ja nire tä” (Proverbios 4:23).

Kukwe yekwe nitre kwati krubäte dimikanina, nikwe ja tuanemetre jie ngwandre Jehovai ye bäri kwin ye gare metre ietre.

(Dianinkä tärä Proverbios yebätä.)