TÄRÄ Salmos ye tärä bäri ere tä Bibliabätä, känti kansion deme Ngöbö kräke tä tikani. Aune kansion deme Ngöbö kräke ye tikani kä 1,000 näre te. Nitre kansion ye tikaka nämene tödeke krubäte ye mikani gare kwetre kukwe bä nuäre niebare kwetre yebiti. Ja nämene ruin ño ietre ye tikani kwetre, ñodre kä nämene juto bätätre aune nämenentre ja tare nike, nämenentre debe bien, aune ja nämene ruin ngite ietre, kantabare kwetre aune namanintre ulire ye tikani kwetre. Nitre ye jökrä nämene Ngöbö tarere krubäte aune ja nämene ruin Ngöbö ken ietre. Kukwe meden meden kädrieta tärä Salmos yebätä ye ani mike gare ruäre jai.

Jehová aibe Gobranka kri kä jökräbiti ye nikwe käikitadrekä aune mikadre täte. Salmo 83:18 tä mike gare metre: “Mä kä Jehová; mä aibe Kri kä tibien ye jökräbiti ta”. Kä kwinta, muke, ni bätä jondron nire Kä tibienbätä aune ni ngrabare ye Jehovakwe sribebare kwin krubäte yebätä niara käikitakata Salmo keta kabre yete (Salmos 8, 19, 139, 148). Ngöbökwe nitre mikaka täte metre kriemikani aune mikani kwäre yebätä mikani ütiäte kri nieta Salmos yete (Salmos 18, 97, 138). Nitre mikata ja tare nike ye kräke Ngöböta kukwe ükete metre aune nitre töi käme mikata ja ngie nuin kwe yebätä kantabare ie Salmos mada mada yekänti (Salmos 11, 68, 146).

Nire nire tä Jehová tarere ye niarata dimike aune töi mike jäme. Ni raba niere salmo 23 ye gare bäri nitre ie, ñobätä ñan aune yete Davidkwe ni Rün kä kwinbiti bämikani ni oveja ngübaka tä oveja jie ngwen, kriemike aune ngübare kwin krubäte ye kwrere. Salmo 65:2 yekänti ngwanta törö nie Jehová ye “Ni orasion Kukwe Nuaka”. Ne madakäre, nitre kukwe blo nuainbarera krubäte ye Salmos 39 aune 51 tä kukwe niere dimikakäre. David ie ja namani ruin ngite kukwe blo nuainbare kwe yebätä aune Ngöbökwe ngite juain tabiti yei nämene tö ngwen ye mikata gare salmos yete arato. Aune Salmo 55:22 tä ni mike tö ngwen Jehovai aune kukweta ni kisete ye nikwe mikadre gare ie nieta kwe arato.

Jehovakwe Jesukristo dianinkä Reire ye köböire kä bä nuäre mikai nemen bare kwe. Mesías, Rei käbämikani yebätä blitata krubäte Salmos yete. Ñodre, juta meden käkwe ja mikai Gobran ye rüere ye gaite nieta Salmo 2 yekänti. Mrö nika, kukwe blo nuainta aune kukwe mada bätäkä ngwarbe nuainta nitre mikakäre ja tare nike ye diainkä gobran yekwe nieta Salmo 72 yekänti. Ngöbökwe rü ye mikai krüte aune jondron rükäre ye mrükaite burere kwe Jesukristo dianinkä Reire ye köböire ye Salmo 46:9 tä mike gare. Ne madakäre, nitre töi käme ye ñaka rabaira nüne kä bä nuäre yete aune nitre kukwe kwin nuainkä nünain jäme kärekäre aune keteitibe nieta Salmo 37 yekänti.

(Dianinkä tärä Salmos yebätä.)