KÖBÖ medente metrere Jesús därebare ye Biblia ñaka mike gare metre nie. Akwa tä kukwe keta kabre mike gare nie, abokän köböire Jesús ñaka därebare sö diciembre yete nüke gare nie.

Juta Belén yekänti Jesús därebare, ¿sö diciembre ye ngwane kä nemen ño kä yekänti? Calendario nitre judío kwe yete sö kädekata kislev tä tikani, ye sö noviembre aune diciembre ye gärätä, sö ye näire kä tibo aune ñü näkäin tibien. Ye jiebitikäre sö tebet ye tä, ye abokän sö diciembre aune enero, sö yebätä kä bäri tibo aune nieve näkäin tibien kä ngutuäre yekänti. Kä yekänti kä nemen ño ye Biblia tä driere ye ani mike gare jai.

Esdras, ni Ngöbö kukwei tikaka tä mike gare sö kislev ye näire kä tibo aune kä ñüre. Tä niere “köbö gre sö krä ökänkäre [kislev], yete” nitre kwati krubäte käkwe ja ükaninkrö Jerusalén, ye ngwane nitre namani “grükekä [...] ñü nämene jobe tibien yebätä”. Ne madakäre, tä mike gare arato nitre kwati nämene ja ükaninkrö kä yekänti käkwe kukwe ne niebare: “Nengwane  ñüta näkäin jobe tibien, aune ni ñaka raba nemen jubäre” (Esdras 10:9, 13; Jeremías 36:22). Erametre, sö diciembre nämenena nemen ja ken angwane, nitre oveja ngübaka kä yekänti nämene oveja kwe ye den gwä ne kwe ñaka rabadre nüne jubäre deu.

Akwa, Biblia tä niere Jesús därebare ye näire deu nitre oveja ngübaka ye nämene oveja ngübare jubäre. Lucas, ni Biblia tikaka tä mike gare, kä Belén ye ken nitre oveja ngübaka ye “nämene nüne jubäre [...] aune nämene oveja kwetre ngübare dibire ta” (Lucas 2:8-12, TNM). Ni raba mike ñärärä, niaratre nämene jubäre rare aune nämene nüne yete arato. Niaratre nämene oveja tuenmetre jubäre deu. Juta Belén yekänti sö diciembre ye näire kä tibo aune kä ñüre krubäte, ¿erametre sö ye näire nitre oveja ngübaka ye nämene nüne jubäre? Ñakare. Yebätä, Jesús därebare angwane kukwe namani bare kädrieta ye kätä mike gare niara ñaka därebare sö diciembre yete. *

Ñongwane Jesús murie ketani ye Ngöbö kukwei tä mike gare metre, akwa ñongwane därebare ye abokän ñaka mike gare metre. Ne tä kukwe niebare rei Salomón käkwe ye ngwen törö nie: “Ni kä ye rabadre kwin ye bäri ütiäte aceite kwin ye kräke, aune köbö te nita krüte ye bäri kwin köbö te nita därere ye kräke” (Eclesiastés 7:1). Kukwe nebiti raba nüke gare nie, ñobätä Biblia tä blite bäri kukwe driebare Jesukwe yebätä, aune niara murie ketani yebätä aune ñaka köbö te niara därebare ye kädriere krubäte.