KÖBÖ Jehovakwe kukwe ükatekäre, ¿ye mätä bämike ño ja töibätä? Nitre kwati tä nütüre, ni mil kwati krubäte rükai itire itire kürä gobrankäre Ngöböi ye känenkri ne kwe kukwe ükadrete bentre. Nitre ruäre yei ja nire biain nünankäre kä kwinbiti aune nitre mada abokän mikai ja tare nike kärekäre, niaratre tä nütüre arato. Akwa, Biblia tä mike gare Köbö Jehovakwe Kukwe Ükatekäre ye ñaka rabai ye erere: ye ñaka rabai jürä ngwandre jabätä, ñakare aune köbö yete kukwe kwin aune metre mikai nemen bare.

Revelación [Jondron tä rakadrekä täräi] 20:11,12, (Ngöbö Taräe, tärä okwä ükaninte) yekänti, apóstol Juan käkwe Köbö Jehovakwe Kukwe Ükatekäre ye bämikani krörö: “Täkrä [...] kri bä nuäre ngwenbrere jutuaba tie, angwane ni nämä täkäni täkäräbiti nete, jutuaba tie. Ni ne meden dre ngänikaire kä tibien, aune kä kwin ngitiaba; angwane kä ñakare rababa niaratre kräke. Ni kri kia ngatani nämä nünaninkä krö Ngöbö ngwärekri, tikwe tuaba. Angwane tärä metateba ruäre; aune arato tärä mada metateba, tärä ne abrä ja nire kräke. Angwane nitre ngatani ne ben kukwe ükateba, jondron nuainbare kwetre nämä tikani täräbätä, yebätä [o ye ererebätä]”. ¿Ni kukwe ükatekä nämene täkäni kürä gobrankäre yete ye abokän nire?

 Ngöbö Jehová ye ni Kukwe Ükatekä Bäri kri ni kä tibienbätä kräke. Akwa niarakwe ni mada mikani kukwe ükatekäre. Hechos 17:31 (NGT) tä niere ye erere, apóstol Pablo käkwe niebare “Ngöbökwe köbö kitani kukwe ükatekäre jai nitre jökrä ben ja kukwei metrebiti, ni diani iti kwe jai, ye köböire”. Aune ni Kukwe Ükatekä ye Jesukristo (Juan 5:22). Akwa, ¿ñongwane Köbö Jehovakwe Kukwe Ükatekäre ye kömikai aune nuadi kwe kä nuäi te?

Tärä Apocalipsis tä mike gare Köbö Jehovakwe Kukwe Ükatekäre ye kömikai rü kri Armagedón ye näire, ye ngwane nitre gobrainta Satanakwe ye gaite * (Apocalipsis 16:14, 16; 19:19–20:3). Armagedón ye bitikäre Satana bätä chokalitre ye kitai ngite kämäkäte, yete nuadi kwe kä mil krati te. Kä ye ngwane, nitre 144,000 dianinkä nänkäre kä kwinbiti yekwe kukwe ükaite nitre ben aune niaratre “gobran[di] kä mili krati Kristobe gwaire” (Apocalipsis 14:1-3; 20:1-4; Romanos 8:17). Aisete, sribi nuainta ora krä grebiti kräbokä te, ye erere ñaka rabai bare Köbö Jehovakwe Kukwe Ükatekäre yete, ñakare aune nuadi kwe kä mil krati te.

Kä mil krati ye näire, Jesukristo käkwe “nitre nire aune ngwakare ben kukwe ükaite” (2 Timoteo 4:1, NGT). Kukwe “nitre nire” ye abokän “nitre kwati krubäte” gärätä, nitre ye rabaite nire rü Armagedón ye bitikäre (Apocalipsis 7:9-17). Apóstol Juan käkwe “nitre ngatani” nämene “nünaninkä krö Ngöbö ngwärekri” tuabare ne kwe kukwe ükadrete bentre. Jesukwe käbämikani erere “nitre jökrä tä dobote ngwanta törö jai, yei [Kristo] kukwei juruai aune jataita kä merebiti” o gaikröta (Juan 5:28, 29, TNM; Hechos 24:15). Ne madakäre, nitre ye jökrä ben kukwe ükaite angwane, ¿drebätä kukwe ükaite niaratre yebe?

Apóstol Juan käkwe tuani köböre, “tärä metateba ruäre” aune “nitre ngatani ne ben kukwe ükateba, jondron nuainbare kwetre nämä tikani täräbätä, yebätä [o ye ererebätä]” (Revelación [Jondron tä rakadrekä täräi] 20:12, Ngöbö Taräe, tärä okwä  ükaninte). ¿Nitre kukwe nuainbare kirabe ye tä tikani tärä yebätä? Ñakare. Niaratre krütadre känenkri kukwe nuainbare kwetre ye ñan aibätä kukwe ükaite bentre. ¿Ñokänti gare nie? Ñobätä ñan aune Biblia tä niere, “nire ngatanina yebrä niena kwäre ngite” yebätä (Romanos 6:7, NGT). Nitre krütani gaikröta, ye abokän ben kukwe ñaka rabaira ükadrete jire. Yebätä, tärä ye abokän kukwe mrä ükaite nuaindre Ngöbökwe gärätä. Nitre gaikröta aune nitre rabaite nire Armagedón bitikäre yekwe kukwe Ngöbökwe mikadre täte ne kwe nünandre kärekäre kwetre. Kä mil krati te Jehovakwe kukwe ükaite mikadre täte ye jökrä täi yete arato. Ye erere, Köbö Jehovakwe Kukwe Ükatekäre ye näire nitre käkwe dre nuaindi ye ererebätä kukwe ükaite bentre.

Köbö Jehovakwe Kukwe Ükatekäre yete, nitre kwati krubäte ie kä rabai ja kitakäre Ngöbö tö dre nuain yebätä aune kukwe ye mikakäre täte. Yekäre, nitre tötika rabai kä jökräbiti tibien. Erametre, “nitre kä tibienbätä yei kukwe ükateta ño metre ye [rabai] gare” (Isaías 26:9). Akwa, ni kä jökräbiti tibien ye ñaka jökrä törbai Ngöbö mikai täte. Isaías 26:10 tä niere: “Nitre töi käme ye kräke kukwe kwin nuaindi akwa kukwe ükadrete metre ye ñaka rabai gare ietre. Kä tibienbätä kukwe ükateta metre ye ngätäite niaratre ñaka rabai, aune Jehová die kri krubäte ye ñaka tuai kwetre”. Nitre töi käme ye gaite kärekäre Köbö Jehovakwe Kukwe Ükatekäre yete (Isaías 65:20).

Köbö Jehovakwe Kukwe Ükatekäre ye rikai ta angwane, nitre kä tibienbätä tädi nire yekwe ja “nire” metre ye rabaira kärekäre, ñobätä ñan aune niaratre rabai töi metre (Apocalipsis 20:5). Yebätä, Köbö Jehovakwe Kukwe Ükatekäre ye näire, nitre kä tibienbätä rabaita nüne töi metre sribebare kena ye erere (1 Corintios 15:24-28). Ye bitikäre niaratre töi gadi mrä. Yekäre, Satana mikaita kwäre aune tuainmetre nitre kä tibienbätä ngököta mrä (Apocalipsis 20:3, 7-10). Kukwe käbämikata Bibliabätä ne rabai bare ño täte ye nitre käkwe ja mikai Diablu rüere yekwe tuai: “Nitre kukwe metre nuainkä yekwe kä tibien rabai, aune nünandi kärekäre te kwetre” (Salmo 37:29). Erametre, Köbö Jehovakwe Kukwe Ükatekäre yete kukwe kwin rabai nitre Ngöbö mikaka metre täte ye jökrä kwe.