TEXTO ruäre Bibliabätä yekänti ni iti üaire kädekata Miguel. Akwa texto ye jökrä känti käre niara tä jondron nuainne  kädrieta. Tärä Daniel yekänti nieta, nämene rüre angeletre käme yebe; tärä Judas yekänti nieta, niara nämene ñäke Diablu yebe jai, aune tärä Apocalipsis yekänti, niara nämene rüre Satana aune chokalitre yebe nieta. Erametre, käre tä Jehová Rei kri yekri ja mike, aune nitre ja mikaka Ngöbö rüere ye rüere niara tä ja mike arato. Kukwe nebiti niara kätä kä kwe Miguel ye mike bäri ütiäte, Miguel ye “¿Nire abokän Ngöbö kwrere?” gärätä. Akwa, ¿nire abokän Miguel?

Ani töbike, nitre ruäre kä tärä ketebu yebätä. Ñodre, Jacob, namani nitre kwati rüne ye kädeka nämene Israel arato, aune apóstol Pedro ye kädeka nämene Simón (Génesis 49:1, 2; Mateo 10:2). Ye erere, Biblia tä mike gare, Jesukristo rükadre Kä tibienbätä ye känenkri kädeka nämene Miguel aune nikaninta kä kwinbiti ye ngwane kädeka nämene ye erere arato. Akwa kukwe meden kädrieta Bibliabätä köböire kukwe ye raba nüke gare nie, ye ani mike gare jai.

Arcángel. Ngöbö Kukwei tä Miguel ye bämike “arcángel” ye kwrere (Judas 9). Ye abokän “ángel bäri ütiäte” gärätä. Miguel ye kädekata arcángel, ye tä mike gare ángel itibe kädekata ne erere. Ne madakäre, Biblia ñaka ni mada kädeke jire “arcángel”, ñakare aune ni itibe kädekata ye erere. Arcángel tä sribi nuainne yebätä blitata angwane blitata Jesús ye arabebätä. Jesukristo ganinkröta ye käkwe dre nuaindi ye 1 Tesalonicenses 4:16 (NGT) tä mike gare: “Ji dokwäte kri ara kä kwinbätä jatai kwintubu ja kukwei ditebiti, angele kri [arcángel, TNM] kukweibiti”. Texto ne tä niere Jesukwe blitai arcángel kukwei ye erere. Yebätä, Jesús ye arcángel Miguel.

Ji ngwanka. Biblia tä mike gare “Miguel btä angele mda mda käkwe rüba[re] mökata amne angele üai käme kwekwe rüere” (Apocalipsis 12:7). Erametre Miguel ye angeletre rükä Jie ngwanka. Tärä Apocalipsis yekänti Jesús bämikata angeletre rükä ye Jie ngwanka arato (Apocalipsis 19:14-16). Aune apóstol Pablo käkwe blitabare metre “Dänkien Jesu” aune “angele dite dite” yebätä (2 Tesalonicenses 1:7). Miguel aune “angele” kwe yebätä Biblia tä blite aune tä blite arato  Jesubätä aune “angele” Jesukwe yebätä (Mateo 13:41; 16:27; 24:31; 1 Pedro 3:22). Biblia ñaka niere jire angeletre rükä ye tärä ketebu, abokän keteiti Miguel kätä jie ngwen aune mada abokän Jesús kätä jie ngwen. Yebätä, raba nüke gare metre nie, Miguel ye Jesús ara abokän tä sribire kä kwinbiti. *