KAPITULO 15
¿Kukwe meden metre ye raba nemen gare ño mäi?
1. Nikwe Ngöbö mikadre ño täte, ¿ye nire aibe raba mike gare nie?
IGLESIA keta kabre tä kukwe metre driere Ngöböbätä nieta kwetre. Akwa ye ñaka metre, ñan ñobätä aune iglesia ye tä kukwe jene driere Ngöböbätä aune nikwe mikadre ño täte yebätä. Aisete kukwe meden metre, ¿ye nire raba mike gare nie? Nikwe Jehová mikadre ño täte ye niara aibe raba mike gare nie.
2. Ngöbö mikadre ño täte rabadre gare mäi yekäre, ¿mäkwe dre nuaindre?
2 Jehovakwe Biblia biani nie ne kwe nikwe niara mikadre ño täte ye rabadre gare nie. Aisete, mäkwe ja tötikadre Bibliabätä ye kwin krubäte. Ngöbökwe mä dimikai kukwe kwe ye mike nüke gare jai, ñan ñobätä aune niara töita krubäte mäbätä (Isaías 48:17).
3. ¿Ngöbö tö ni tuai dre nuainne?
3 Ngöböta iglesia jökrä kain ngäbiti nitre kwati tä niere, akwa Jesukwe ñaka ye erere driebare. Niebare kwe: “Ni jökrä käkwe niedi tie: ‘Däkien, Däkien’, ye ñan aibe köböire rabai nüne gobran Ngöbökwe yete, ñakare aune nire nire käkwe ti Rün kä kwinbiti töi nuaindi ye aibe kwe gobran Ngöbökwe rabai”. Aisete Ngöbö töita ño ye nikwe mikadre gare jai aune mikadre täte. Kukwe ye ütiäte krubäte, ñan ñobätä aune nitre ñaka Ngöbö mike täte ye nitre “kukwe käme nuainkä” niebare Jesukwe (Mateo 7:21-23, TNM).
4. Ni törbai Ngöbö töi nuaindi ngwane, ¿dre rabai bare niebare Jesukwe?
4 Ni törbai Ngöbö töi nuaindi ngwane, ñaka rabai nuäre ni kräke niebare Jesukwe. Mikani gare kwe: “Jukwe ñäi brai känti ta munkwe nän. Jukwe, ji, ni gatekrä abrä niken kwata kri tibien; yekänti ta ni kwati tä näin. Angwane jukwe ñäi brai, angwane ji krä chi tibien ja nire kräke; yekänti ta ni tä näin braibe” (Mateo 7:13, 14, NGT). Ji krä chi ye tä kukwe metre bämike aune tä niken ni ngwena nüna kärekäre kokwäre. Ji kwata kri ye tä iglesia ngwarbe bämike aune tä niken ni ngwena ni gadrete kokwäre. Akwa Jehová ñaka tö ni tuai krüte jire, yebätä tä kä bien ni jökrä ie ne kwe ni rabadre niara mike gare jai (2 Pedro 3:9, TNM).
¿KUKWE MEDEN METRE YE RABA NEMEN GARE ÑO NIE?
5. Nitre tä kukwe metre mike täte, ¿ye raba nüke gare ño mäi?
5 Nitre tä kukwe metre mike täte ye raba nüke gare nie niebare Jesukwe. Yekäre, dre mikata era kwetre jai aune dre nuainta kwetre ye nikwe mikadre gare jai. Jesukwe niebare: “Niaratre tä nüne ño, yebtä rükadre gare munye”. Aune niebare kwe arato: “Kri kuin [...] käre ngwäta nebe kuin” (Mateo 7:16, 17). Ye ñan tä mike gare, nitre Ngöbö mikaka täte ye töi metre. Akwa tätre käre ja di ngwen kukwe kwin nuainne. Kukwe meden metre ye raba nüke gare ño nie ye ani mike gare jai.
6, 7. a) ¿Ñobätä nitre kukwe metre mikaka täte tä kukwe Bibliabätä driere? b) Jesukwe kukwe Ngöbökwe driebare, ¿ye tä dre mike gare nie?
6 Nitre kukwe metre mikaka täte tä kukwe Bibliabätä driere. Biblia tä niere: “Ngöbö Kukwei jökrä abko Ngöbökwe mikani gare metre nitre tärä tikakaye, aisete kukwe ütiäte dirikrä amne kuin mäträkrä amne, kuin ni mda töi diankrä amne, kuin ni töitikakrä nüne metre Ngöbö ngwärekri. Ne köböire abko nitre tödekaka Jesubti tä nüne Ngöbökrä ye tädre juto biare sribi kuinkuin bätäkä ngwarbe nuenkrä” (2 Timoteo 3:16, 17). Apóstol Pablo tikabare nitre kristiano ie: “Nun nämane Ngöbö Kukwei kädriere munbe angwane, kukwe ye abko munkwe kani ngäbti Ngöbö Kukwei ara jire kwrere amne, ñan kukwe mikanintbe ni mdakwe, kwrere munkwe kani ngäbti” (1 Tesalonicenses 2:13). Nitre kukwe metre mikaka täte ye tä kukwe Bibliabätä aibe driere, ñan ñobätä aune ye Ngöbö Kukwei. Ñaka tätre ni kä nebätä töita ño aune tä kukwe meden nuainne ye driere.
7 Jesús kukwe driebare ye jökrä nämäne Ngöbö kukweibätä (ñäkädre Juan 17:17 yebätä). Kukwe Ngöbökwe nämäne dre niere ye käre nämäne kädekete (Mateo 4:4, 7, 10). Nitre Ngöbö mikaka täte metre tä ja ngwen Jesús erere aune tä kukwe Bibliabätä driere.
8. Jehová mikadre täte metre, ¿yebätä Jesukwe dre driebare?
8 Tätre Jehová aibe mike täte. Salmo 83:18 tä niere: “Mä kä Jehová ye rabadre gare nitre jökrä ie, mä aibe Kri kä tibien ye jökräbiti ta”. Ngöbö meden metre rabadre gare kwin nitre ie yei Jesús tö namani. Yebätä Ngöbö kädekata ño ye driebare kwe ietre (ñäkädre Juan 17:6 yebätä). * Jesukwe niebare: “Jehová Ngöbö mäkwe ye aibe mäkwe mikadre täte aune mikadre ütiäte jai” (Mateo 4:10, TNM). Aisete nitre Ngöbö mikaka täte tä ja ngwen Jesús erere. Tätre Jehová aibe mike Ngöböre jai, niara kä ye kädekete aune mike gare nitre madai. Aune Ngöbökwe dre nuaindi ni kräke ye mikata gare kwetre arato.
9, 10. Nita ja tarere kwärikwäri, ¿ye nita bämike ño?
9 Tätre nitre mada tarere metre. Nitre ja tötikaka Jesukwe rabadre ja tarere kwärikwäri ye Jesukwe driebare ietre (ñäkädre Juan 13:35 yebätä). Ni nünanka juta madate o nita nüne ño, ni bobre o ni ngwian bökäne, akwa nita ni mada tarere ye rabadre ni töi mike nemen keteitibe ni ja mräkäre kwrere (Colosenses 3:14). Yebätä, ni ñaka rabadre niken rübätä aune ni ñaka rabadre ni mada murie kete. Biblia tä niere: “Nire nire Ngöbö ngäbriänkä amne nire nire diablu ngäbriänkä tä nüke gare krörö nie: Nire nire ñan tä jändrän kuin nuene ni mdakrä amne ñan tä mräkä tarere, ni ye abko ñakare Ngöbö ngäbriänkä”. Aune tä niere arato: “Nikwe ja taredre kwärikwäri [...]. Nikwe ja mikadre ngite ñakare Caín tukwe kwrere. Caín abko diablukwe, aisete moto käme diablu kwrere, käkwe etba Abel kämikani” (1 Juan 3:10-12; 4:20, 21).
10 Kätä nie, ni die aune jondron nikwe yebiti ni rabadre ja dimike kwärikwäri (Hebreos 10:24, 25). Nikwe “jondron kwin nuaindre ni jökrä kräke” (Gálatas 6:10, TNM).
11. ¿Ñobätä nikwe Jesús kukwei mikadre täte?
11 Tätre Jesús kukwei mike täte, ñan ñobätä aune Jesús köböire Ngöbö raba ni mike kwäre. Biblia tä niere: “Jesu aibe ni diantarikä. Nebti Ngöbökwe ni mda mikani ñakare jire kä nebtä ni diantarikäre” (Hechos 4:12). Kapitulo 5 yekänti rababa gare nie, Jehovakwe Jesús juani ja nire bien ni kä tibienbätä Ngöbö mikaka täte kökatarikäre (Mateo 20:28). Jehovakwe Jesús dianinkä Reire Kä tibien ne gobrainkäre. Yebätä, ni tö nünain kärekäre ngwane, nikwe Jesús kukwei mikadre täte nieta Bibliakwe (ñäkädre Juan 3:36 yebätä). *
12. ¿Ñobätä nikwe ñaka ja mikadre kukwe gobrankwe yete?
12 Ñaka ja mike kukwe gobrankwe yete. Jesukwe ñaka ja mikani kukwe gobrankwe yete. Kukwe ükate nämäne ben ye ngwane, niebare kwe gobran romano Pilato ie: “Ni kä nebtä tä jreire, ye kwrere ti ñan rabadre jreire” (ñäkädre Juan 18:36 yebätä). Jesús erere, nikwe ja ngwandre metre Gobran Ngöbökwe tä kä kwinbiti yei. Yebätä ni tädre nüne medente, akwa nikwe ñaka ja mikadre kukwe gobrankwe yete. Akwa Biblia tä niere nie, nikwe “nitre gobranka” kukwei mikadre täte (Romanos 13:1). Kukwe meden ükateta gobrankwe juta nikwe yete ye ni rabadre mike täte. Akwa, Ngöböta kukwe ñäkäire ye gobran tä nuainmana nie ngwane, nikwe ja ngwandre nitre apóstol erere. Niaratre niebare: “Nunkwe Ngöbö mikadre täte, akwa mun abko ñan kukwei mikadre täte nunkwe” (Hechos 5:29; Marcos 12:17).
13. ¿Gobran Ngöbökwe yebätä dre drieta?
13 Gobran Ngöbökwe aibe raba kukwe jökrä ükete drieta kwetre. Jesukwe niebare: “Kukwe kwin Gobran Ngöbökwe yebätä ye driedi kä jökräbiti tibien” (ñäkädre Mateo 24:14 yebätä). * Gobran Ngöbökwe dre nuaindi ni kräke, ye erere gobran kä nebätä ñaka raba nuainne jire (Salmo 146:3). Nikwe Gobran Ngöbökwe kärädre orasionte ye Jesukwe driebare krörö nie: “Gobran mäkwe jatadre. Mä töi rabadre bare kä kwinbiti, ye erere rabadre bare kä tibienbätä arato” (Mateo 6:10, TNM). Gobran Ngöbökwe käkwe gobrantre kä tibienbätä ye jökrä gaite nieta Bibliakwe. Gobran ye aibe rabai Kä tibien gobraine aune rabai gobrane kärekäre (Daniel 2:44).
14. ¿Nitre meden tä kukwe metre mike täte raba ruin mäi?
14 Nitre kukwe metre mikaka täte rabadre dre nuainne ye nibira gare mäi, yebätä töbike kukwe ngwantarita nebätä: “¿Nireta kukwe Bibliabätä driere? ¿Nireta Ngöbö kä ye mike gare? ¿Nireta ja tarere metre kwärikwäri? Ngöbökwe Jesús juani ni mikakäre kwäre, ¿ye nireta mike era jai? ¿Nire ñaka tä ja mike kukwe gobrankwe yete? Gobran Ngöbökwe aibe raba kukwe ükete ni kräke, ¿ye nireta driere?”. Nitre testiko Jehovakwe aibe tä kukwe ye jökrä nuainne (Isaías 43:10-12).
¿MÄKWE DRE NUAINDI?
15. Nita Ngöbö mike täte ye rabadre tuin kwin ie yekäre, ¿nikwe dre nuaindre?
15 Ngöbö tärä ye ñan aibe mikadre era jai. Ngöbö tärä ye gare chokalitre ie, akwa ñaka mike täte (Santiago 2:19). Nita Ngöbö mike täte ye rabadre tuin kwin ie yekäre, dre ribeta nuaindre kwe nie ye nikwe nuaindre aune niara tärä ye ñan aibe nikwe mikadre era jai.
16. ¿Ñobätä nikwe kämikadrekä iglesia ngwarbe yebätä?
16 Nita Ngöbö mike täte ye rabadre tuin kwin ie yekäre, nikwe kämikadrekä iglesia ngwarbe yebätä arato. Isaías niebare: “Kämikekä niarabätä, mun [...] ja ngwan kwin” (Isaías 52:11; 2 Corintios 6:17). Yebätä dre raba ni mike ja kete iglesia ngwarbe yebe, ye nikwe tuanemetre.
17, 18. a) ¿“Babilonia Kri” ye abokän dre? b) ¿Ñobätä mäkwe kämikadrekä biarebätä?
17 ¿Iglesia meden meden abokän ngwarbe? Ye iglesia tä Ngöbö mikamana täte, akwa ñaka drieta Bibliabätä ye erere. Iglesia ngwarbe ye jökrä Biblia tä kädeke “Babilonia Kri” (Revelación 17:5, TNM). ¿Ñobätä? Ñan ñobätä aune, Ñü Kri näkäni tibien Noé näire ye bitikäre, kukwe ngwarbe keta kabre drie jatani juta Babilonia yete. Kukwe ngwarbe ye drie jatani kä jökräbiti tibien. Ñodre, nitre nünanka Babilonia nämäne ngöbö nimä ngöböre itibe ye mike täte. Kä nengwane, iglesia keta kabre tä driere Ngöbö ye ngöbö nimä ngöböre itibe. Akwa Biblia tä mike gare merebe, Ngöbö metre ye abokän itibe aune kä Jehová bätä Jesús ye abokän Monso kwe (Juan 17:3, TNM). Nita krüte ye ngwane jondron tärä nibätä ye tä nemente nire aune raba ja tare nike kä ñukwäre te, ye nitre nünanka Babilonia nämäne mike era jai arato. Akwa ye kukwe ngwarbe (nota 14, 17 aune 18 mikadre ñärärä).
18 Ngöböta mike gare, niara köböra iglesia ngwarbe ye jökrä gainte (Revelación 18:8, TNM). ¿Ñobätä mäkwe kämikadrekä biare iglesia ngwarbe yebätä ye nüke gare mäi? Kä nebera braibe yebätä mäkwe nuaindre biarebe ie Jehová tö (Apocalipsis 18:4).
Mäkwe Jehová mikai täte ngwane, mä rabai ja mräkätre kä jökräbiti tibien ye ngätäite
19. Mäkwe ja töi mikai Ngöbö mike täte ngwane, ¿Ngöbökwe dre nuaindi mä kräke?
19 Mäkwe kämikadrekä iglesia ngwarbe yebätä aune mäkwe ja töi mikadre Jehová mike täte ye ñaka raba nüke gare mä mräkä o ja ketamuko mäkwe ie aune raba ja mike mä rüere. Akwa Jehovakwe ñaka mä tuainmetre kaibe. Mä rabai ja mräkätre kwati kä jökräbiti tibien tä ja tarere metre ye ngätäite aune mä mikai nüne kwe kärekäre kä bä nuäre käbämikata kwe yete (Marcos 10:28-30, TNM). Mä mräkä o ja ketamuko mäkwe ruäre tä ja mike mä rüere Jehová mikabätä täte, ye ja känenkäre raba ja tötike Bibliabätä.
20. Mäkwe ja mikadre kukwe metre yekri, ¿ye ñobätä ütiäte krubäte?
20 Kukwe käme nuainta ye Ngöbö köböra mike krüte aune Gobran kwe rabai Kä tibien jökrä gobraine (2 Pedro 3:9, 13, TNM). Kä ye näire nüna rabai kwin krubäte. Ni jökrä käkwe Jehová mikai täte tö ie ye erere. Aisete mä ñan rabadre kwekebe, ñakare aune mäkwe ja mikadre kukwe metre yekri ye ütiäte krubäte.
^ párr. 8 Juan 17:6, (TNM): “Tikwe mä kä ye mikani gare nitre kä nebätä mäkwe biani tie yei. Nitre ye mäkwe aune mäkwe biani tie bätä niaratre tä mä kukwei mike täte”.
^ párr. 11 Juan 3:36, (NGT): “Nire tä tödeke ngobobiti, yebrä abokän ja nirekrä käre tä kwe, akwa nire ñakare tä niara mike era jai, yebrä ñan tärä ja nire tuaka jire chi, angwane Ngöbökwe tö diandi krubäte”.
^ párr. 13 Mateo 24:14, (TNM): “Kukwe kwin Gobran Ngöbökwe yebätä ye driedi kä jökräbiti tibien kukwe mikakäre gare nitre juta jökrä te ie aune ye ngwane kä krütai ye köböi rükai”.
Ne rabai tuen kwin mäi arato
KUKWE NGWANTARITA BÄRI
¿Nitre testiko Jehovakwe tä nitre töi mike jadibiti ja mike kukwe madabätä?
¿Nitre testiko Jehovakwe tä kukwe driere ni kwati tä näin ta yekänti ne kwe nitre ja mikadre kukwe kwetre yebätä? ¿Nitre testiko Jehovakwe tä nitre töi mike jadibiti ja mike kukwe madabätä?
KUKWE MIKATA GARE
Nitre testiko Jehovakwe: tödekabare metre. Kukwe 1: Kä trä namani tuinta ietre
Nitre kristiano braibe ye käkwe ñaka kä jürä ngwani jabätä kukwe metre Bibliabätä ye mikakäre gare aune ye ererebätä ja ngwani kwetre ye mäkwe tua. Niaratre kukwe bämikani yekwe mä töi mikai Ngöbö mike täte metre.
