1, 2. a) Ni iti kädekata ño aibe tädre gare mäi, ¿yebätä gare kwin mäi mäkwe niedre? b) ¿Nitre tä dre niere Jesubätä?

KÄ JÖKRÄBITI nitre ruäre gare nitre kwati ie aune kädekata ño ye gare mäi arato raba ruin nuen. Akwa, niara kädekata ño ye aibe tädre gare mäi, ¿yebätä gare kwin mäi mäkwe niedre? Ñakare. ¿Ñobätä? Ñan ñobätä aune niara nüne ño aune ja ngwen ño ye ñaka gare mäi.

² Jesús nünanbare Kä tibienbätä ye käi nikanina 2,000 ta, akwa blitata niarabätä ye mä tärä kukwe nuin raba ruin nuen. Akwa Jesukwe ja ngwani ño ye ñaka gare nitre kwati ie. Nitre ruäre tä niere niara ja ngwani töi kwin. Nitre mada tä niere niara nämäne Ngöbö kukwei niere. Mada abokän tä nütüre Jesús ye Ngöbö. ¿Mä abokän töita ño? (Nota 12 mikadre ñärärä).

3. Mäkwe kukwe metre mikadre gare jai Jehová aune Jesubätä, ¿ye ñobätä ütiäte?

³ Mäkwe kukwe metre mikadre gare jai Jesubätä ye ütiäte krubäte. ¿Ñobätä? Ñan ñobätä aune Biblia tä niere: “Ja nire kärekäre ye abokän ne gärätä: mä rabadre gare ietre, mä aibe Ngöbö metre aune ni juani mäkwe, Jesukristo ye rabadre gare ietre” (Juan 17:3, TNM). Mäkwe kukwe metre mikai gare jai Jehová aune Jesubätä ngwane, mä raba nüne kärekäre Kä Bä Nuäre te Kä tibienbätä (Juan 14:6, TNM). Ne madakäre, Jesús mikadre gare jai ye raba mä dimike, ñan ñobätä aune nünandre ño aune nitre mada mikadre tuin ño jai ye niarakwe bämikani  kwin ni kräke (Juan 13:34, 35). Kapitulo 1 yekänti kukwe metre rababa gare nie Ngöböbätä. Aune kapitulo nekänti Biblia tä dre driere Jesubätä rabai gare nie.

4. ¿Mesías aune Kristo ye dre gärätä?

⁴ Jesús däredre ye känenkri, Jehovakwe käbämikani Bibliabätä niarakwe Mesías o Kristo juain. Mesías ye kukwe hebreore aune Kristo ye kukwe griegore. Kukwe ketebu ye abokän ni dianinkä Ngöbökwe sribi ütiäte nuainkäre meden gärätä. Ne madakäre, Mesías yekwe kukwe käbämikata Ngöbökwe ye jökrä mikai nemen bare.

5. ¿Dre nämäne gare metre Jesubätä nitre ja tötikaka kwe ie?

⁵ Nitre ja tötikaka Jesukwe yei nämäne gare metre Jesús ye Mesías (Juan 1:41, TNM). Ñodre, apóstol Pedro niebare Jesús ie: “Mä abokän Kristo” (Mateo 16:16, TNM). Jesús ye Mesías, ye ñobätä rabadre gare metre nie arato ye ani mike gare jai.

6. ¿Jehová tä ni dimike ño Mesías mike nüke gare jai?

⁶ Jesús däredre ye känenkri, nitre Ngöbö kukwei niekä kukwe mikani gare krubäte nitre dimikakäre Mesías mike nüke gare jai. ¿Kukwe mikani gare yekwe nitre dimikani ño? Mikakäre gare kwin jai ani bämike. Mä juandre bus tä nemen nünenkä yekänti ni iti ñaka gare mäi ye ngäbiti. Akwa, ni ye bä ño aune tädre ja ngwäkitani ño mikadre gare kwin mäi ngwane, ni ye rükadre gare mäi. Ye erere arato, nitre Ngöbö kukwei niekä yebiti Jehovakwe mikani gare Mesías ye dre nuaindi aune dre rabai barebätä. Nire nire tö Ngöbö mikai täte yei kukwe ye namani bare ño rabai gare ngwane, Jesús abokän Mesías o Kristo rükai gare ie.

7. ¿Kukwe meden ketebu tä ni dimike Jesús ye Mesías mike nüke gare jai?

 ⁷ Kukwe niebare ye ani mike gare ketebu jai. Kena, kä 700 rikadre ta ye känenkri Miqueas mikani gare, Mesías däredi juta chi Belén yekänti (Miqueas 5:2). Aune kä ye ara känti Jesús därebare (Mateo 2:1, 3-9). Ketebukäre, Mesías rükai kä 29 te ye Daniel mikani gare (Daniel 9:25). Aune ye namani bare arato. * Kukwe ketebu nikwe miri gare jai ye tä ni dimike Jesús ye Mesías mike nüke gare jai.

8, 9. Jesús ngökani ñöte ye ngwane, ¿dre namani bare abokän käkwe bämikani niara ye Mesías?

⁸ Jesús ye Mesías Jehovakwe mikani gare metre. Ngöbökwe kukwe keteiti bämikai ye käbämikani kwe Juan Bautista ie ne kwe nire abokän Mesías ye rükadre gare ie. Kä 29 yete, ñö Jordán yekänti Juan käkwe Jesús ngökani ñöte ye ngwane, Ngöbökwe kukwe bämikani ie ye tuani kwe. Dre namani bare ye Biblia tä mike gare: “Jesu ngökani ñöte, jataninta ñöte käin angwane, kä käin se namani tuen ñäkänintbe ie angwane, Ngöbö Üai jatani ütü bä kwrere timonkwäre, nükani mate Jesubti, namani tuen ie. Ye btäräbe ni kukwei jarabare kä käinbti, käkwe niebare: Ni ne abra ti Ngobo tikwe. Niara tare kri tikwe. Niara käi nuäre kri tibtä” (Mateo 3:16, 17). Kukwe tuani Juankwe aune Ngöbö kukwei juruabare ie yekwe mikani gare metre ie Jesús ye Mesías (Juan 1:32-34).  Köbö yete, Jehovakwe üai deme mikani nemen Jesubätä. Yete ja känenkäre Jesús namani Mesías. Ngöbökwe niara dianinkä Ji Ngwanka aune Reire (Salmo 2:6; Isaías 55:4).

⁹ Jesús ngökani ñöte ye ngwane, kukwe niebare Jehovakwe, kukwe bämikani kwe aune kukwe niebare Bibliabätä yekwe mikani gare metre Jesús ye Mesías. Akwa, ¿Jesús nämäne medente jatani? ¿Niara ja ngwani ño? Biblia tä dre niere ye ani mike gare jai.

10. Jesús rükadre Kä tibienbätä ye känenkri, ¿nämäne nüne medente nieta Bibliakwe?

¹⁰ Biblia tä mike gare, Jesús rükadre Kä tibienbätä ye känenkri nünanbare kwe kä kwati krubäte te kä kwinbiti. Ñodre, Miqueas niebare Mesías ye abokän ni “nünanka mekerabe” (Miqueas 5:2). Aune Jesukwe mikani gare bä kabre, niara däredre Kä tibienbätä ye känenkri nünanbare kwe kä kwinbiti (ñäkädre Juan 3:13; 6:38, 62; 17:4, 5 yebätä). Jesús nämäne ja kete kwin Jehovabe kä kwinbiti.

11. ¿Ñobätä Jesús tare krubäte Jehovakwe?

¹¹ Jesús tare krubäte Jehovakwe. ¿Ñobätä? Ñan ñobätä aune “niara sribebare kena jondron jökrä ye känenkri”. Ye tä mike gare niara sribebare käne Jehovakwe (Colosenses 1:15, TNM). * Jesús ye “Monso ngöräbe” Ngöbökwe yebätä tare kwe arato. Ye tä mike gare Jehovakwe niara aibe sribebare kaibe (Juan 3:16, TNM). Ne madakäre, Jesús aibe käkwe Jehová dimikani jondron mada mada sribere (Colosenses 1:16, TNM). Aune Jesús aibe kädekata “Kukwe”, ñan ñobätä aune Jehovakwe niara mikani kukwe niere angeletre aune ni kä tibienbätä ie (Juan 1:14).

12. ¿Ñobätä Jesús aune Ngöbö ñaka ja erebe?

¹² Nitre ruäre tä nütüre Ngöbö aune Jesús ye ja erebe, akwa Biblia ñaka tä ye erere driere (nota 14 mikadre ñärärä). Jesús ye sribebare drieta Bibliakwe, ye abokän niara ñaka nämäne kena meden gärätä. Akwa Jehovakwe jondron jökrä sribebare aune niara tä käre (Salmo 90:2).  Biblia tä mike gare metre Jehová bäri kri Jesús kräke. Ne madakäre, Jesús ye Rün erere ñaka niebare jire kwe (ñäkädre Juan 14:28 yebätä; 1 Corintios 11:3). Jehová ye aibe “Ngöbö Di Kri” (Génesis 17:1, JK). Niara aibe bäri ütiäte aune dite.

13. ¿Ñobätä Biblia tä niere Jesús ye Ngöbö bä erere?

¹³ Kä kwinta aune Kä tibien sribe jämi ye känenkri, Jehová aune Jesús sribibare gwairebe kä kwati krubäte te jabe. Yebätä niaratre nämäne ja tarere krubäte (Juan 3:35; 14:31). Biblia tä kukwe ne niere Jesubätä: “Ngöbö ñaka tuin ye abokän erere niara bä”. ¿Ñobätä? Ñan ñobätä aune niara ja töi mikani kwin Rün ye erere (Colosenses 1:15, TNM).

14. ¿Ñokänti Jesús därebare ni kä tibienbätä erere?

¹⁴ Jesús namani juto biare nänkäre Kä tibienbätä. Akwa, ¿ñokänti därebare ni kä tibienbätä erere? Jehovakwe kukwe ñan tuabare nuainbare. Monso kwe nämäne kä kwinbiti ye mikani nemen kwe meri iti jämi nemen ni brare ben kädeka nämäne María yebätä. Yebätä, Jesús rün ye ñaka kä tibienbätä. Aisete monso namani Mariakwe ye töi metre, abokän kädekani kwe Jesús (Lucas 1:30-35).

15. ¿Jehová raba nemen gare ño bäri kwin mäi?

¹⁵ Jesukwe niebare: “Nire nire käta ti tuen, ye abko tä ti Rün tuen arato” (Juan 14:9). Jesús ye töi kwin Rün erere, yebätä mäkwe ja tötikai niarabätä ngwane Jehová rabai gare bäri kwin mäi. Arato mäkwe ñäkäi tärä Mateo, Marcos, Lucas aune Juan yebätä ngwane, Jesukwe nünanbare ño bätä töi nämäne ño ye rabai gare bäri kwin mäi. Tärä ketabokä ye kädekata Evangelio.

16. a) ¿Kukwe meden driebare Jesukwe? b) ¿Nire kukwei driebare kwe?

 ¹⁶ Nitre kwati nämäne “Dirikä” niere Jesuye (Juan 1:38; 13:13). “Kukwe kwin Ngöbö gobrain” yebätä ye kukwe bäri ütiäte driebare Jesukwe. ¿‘Gobran’ ye tä medente? Gobran ye tä kä kwinbiti aune gobrandi kwe kä jökräbiti tibien bätä kukwe kwin nuaindi kwe nitre Ngöbö mikaka täte kräke (Mateo 4:23, NGT). ¿Nire kukwei driebare Jesukwe? Jehová kukwei driebare kwe. Jesukwe niebare: “Tita kukwe dirire, ye abko ñakare tikwe, akwa ni ti juanka abko kukwei dirita tikwe” (Juan 7:16). Kukwe kwin Gobran Ngöbökwe yebätä rabadre gare nitre ie yei Ngöbö tö ye nämäne gare kwin Jesús ie.

17. a) ¿Jesús nämäne kukwe driere medente? b) ¿Ñobätä niarakwe ja di ngwani krubäte dirikäre nitre ie?

¹⁷ ¿Jesús nämäne kukwe driere medente? Kä jökrä känti. Nämäne kukwe driere nitre nämäne sribire yekänti, jutate, jondron rürübäin nämäne yekänti, templote, sinagogate aune ju ju te. Ñaka nämäne nitre ngübare niken jakänti, ñakare aune nämäne niken nitre känti (Marcos 6:56; Lucas 19:5, 6). Jesukwe kä dianinkä krubäte jai dirikäre aune ja di ngwani kwe nuainkäre. Nuainbare kwe ñan ñobätä aune Rün töi nämäne ye erere nämäne gare ie aune käre nämäne Rün kukwei mike täte (Juan 8:28, 29, TNM). Arato nitre mada nämäne tuin bobre ie yebätä nämäne dirire ietre (ñäkädre Mateo 9:35, 36 yebätä). Nitre ji ngwanka kukwebätä ñaka nämäne kukwe metre driere Ngöböbätä aune Gobran kwe yebätä ye nämäne gare Jesús ie. Aisete niara tö nämäne kukwe kwin Gobran Ngöbökwe yebätä driei nitre jökrä ie.

18. ¿Jesús töi meden abokän tuin kwin mäi?

¹⁸ Jesús nämäne nitre tarere aune töi nämäne nitre  madabätä. Niara töi nämäne kwin yebätä nitre tö nämäne blitai ben. Monsotre kia yei ja nämäne ruin kwin niarabe arato (Marcos 10:13-16). Käre Jesús nämäne ja ngwen metre. Kukwe käme aune kukwe ñaka metre nuain nämäne ye nämäne tuin blo ie (Mateo 21:12, 13). Meritre ñaka mika nämäne ütiäte jai ye näire nünanbare kwe. Akwa käre Jesús nämäne meritre mike tuin ütiäte jai (Juan 4:9, 27). Ne madakäre, Jesús töi nämäne bobre. Ñodre, bati nitre apóstol ngoto bätäninte kwe. Metrere, nitre klabore nämäne sribi ye nuainne (Juan 13:2-5, 12-17).

19. Nitre nämäne dre ribere jai ye nämäne gare Jesús ie aune tö nämäne dimikai, ¿ye kukwe meden tä bämike?

¹⁹ Nitre nämäne dre ribere jai ye nämäne gare Jesús ie aune tö nämäne dimikai. Ye bämikakäre Ngöbökwe ja di biani ie yebiti nitre mikaninta räre kwe (Mateo 14:14). Ñodre, ni iti bren lepra kisete jatani Jesús kokwäre aune niebare kwe ie: “Ma tö ti mikaita kuinta ne ngwane, makwe ti mikata kuinta”. Ni ye nämäne ja tare nike krubäte ye nükani gare kwin Jesús ie. Aisete namani tuin bobre ie aune dimikani kwe. Jesukwe “kise mikani ni yebti, bti niebare kwe ie: Ma rabata kuinta, ie ti tö nibi”. Aune ni bren ye namaninta räre (Marcos 1:40-42). ¿Ni yei ja namani ruin ño ye mä raba bämike ja töite?

20, 21. ¿Jesukwe Ngöbö mikani täte ye bämikani ño kwe?

²⁰ Jesukwe Ngöbö mikani täte yebiti kukwe kwin bämikani kwe. ¿Ñobätä? Ñan ñobätä aune nitre niara rüe käkwe kukwe ñaka kwin nuainbarebätä aune kukwe kri ben ja tuani kwe, akwa käre ja ngwani metre kwe Rün ie. Ñodre, Satanakwe jondron driebare Jesús ie ye ngwane ñaka kani ngäbiti kwe (Mateo 4:1-11). Ne madakäre,  niara Mesías ye mräkätre ñaka namani mike era jai aune kä nämäne ngwarbe dokwäbiti namanintre niere. Akwa yebiti ta, Jesukwe Jehová mikani täte jankunu (Marcos 3:21). Aune nitre niara rüe käkwe nuainbare tare ye ngwane, ja ngwani metre kwe Jehovai aune ñaka ja ngie mikani kwe (1 Pedro 2:21-23).

²¹ Jesús nuainbare tare krubäte murie ketakäre, akwa yebiti ta ja ngwani metre kwe Jehovai (ñäkädre Filipenses 2:8 yebätä). * Niara murie ketakäre kani ngite, nämäne ñäke Ngöbö rüere niebarebätä, nitre kukwe ükatekä käkwe kukwe ñaka kwin ükaninte rüere, nitre namani kötaire, nitre rükä käkwe nuainbare tare aune metani  kribätä yebätä töbike. Jesús jatanina krüte ye ngwane, niebare ja dibiti kwe: “Sribita ti kisete, erere nibira bare täte jökrä tie” (Juan 19:30). Köbö köbömäkäre yete Jehovakwe ganinkröta ni üaire erere (1 Pedro 3:18, TNM). Bämän nikani ruäre ta ye bitikäre, Jesús nikaninta kä kwinbiti, “namani täkänintbe Ngöbö küde ruenkri” aune Rünkwe kädekadre Reire ye ngübabare kwe (Hebreos 10:12, 13).

22. Jesukwe ja ngwani metre Rün kwe ie, ¿ye köböire dre raba nemen nikwe?

²² Jesukwe ja ngwani metre Rün kwe ie ye köböire, ni raba nüne kärekäre Kä Bä Nuäre te Kä tibienbätä. Jehová tö namani ye erere ie kena. Jesús ja nire biani murie ketadre ye köböire nüna kärekäre rabai ño nikwe, ye nikwe mikai gare jai kapitulo mada yekänti.