Jehovakwe Jeremías dianinkä ne kwe rabadre niara kukwei niekä kä Judá yekänti. Niara rabadre kukwe driere nitre nämene nüne yete ie aune rabadre nitre mike mokre ne kwe niaratre ja töi kwitadre kukwe blo yebätä. Akwa Jeremías niebare Jehovai: ‘Ti tä bati krubäte aune blita ñaka gare tie nitre ngwärekri’. Jehová käbämikani ie: ‘Ñan kä jürä ngwan jabätä, tikwe mä dimikai aune mäkwe kukwe meden driedre ye tikwe niei mäi’.

Jeremías rabadre nitre umbre ji ngwanka ye ükökrö biti niaratre okwäbiti niara rabadre jarrón sribebare dobrobiti ye trekete aune niedre kwe ietre: ‘Ne erere rabai bare Jerusalén yebätä’. Jeremías ye nuainbare angwane, nitre umbre ji ngwanka ye namani rubun krubäte. Sacerdote kädeka nämene Pasjur ye käkwe Jeremías metani aune mikani kwe kri sribebare yete ye abokän niara ngoto bätä kise ye mikani krite kwe. Ñaka namani nuäre Jeremías kräke ja ngökatekäre deu. Jetebe se kwrere Pasjur niara tikaninte. Angwane Jeremías niebare: ‘Kä ñan kitera nüke tie. Ti ñaka kukwe driei jankunu’. Akwa, ¿ye erere nuainbare kwe? Ñakare. Jeremías töbikabare bäri kwin aune niebare kwe: ‘Kukwe Jehovakwe mikadre gare ye tä ñukwä kwrere ti teri. Kukwe driedre ye ti ñaka raba tuenmetre’. Yebätä Jeremías nikani nitre mike mokre jankunu.

Kä nikani kwati krubäte ta ye ngwane, rei mada namani gobrane Judá. Jeremías nämene kukwe mike gare ye ñaka nämene tuin kwin nitre sacerdote aune nitre kukwe ngwarbe niekä yei. Ye medenbätä niebare kwetre nitre ütiäte yei: ‘Ni ne murie ketadre jerekäbe’. Jeremías niebare: ‘Munkwe ti murie ketai angwane ni ñaka ja mike ngite murie ketai munkwe. Jehová tä dre niere tie ye erere tita nuainne aune ñan kukwe nüke ti töite ye nieta tikwe’. Niara kukwe niebare ye kukwe juruabare nitre ütiäte yei angwane, niebare kwetre: ‘Ni ne ñaka murie ketadre’.

 Jeremías nikani jankunu kukwe driere, akwa ye ngwane nitre ütiäte ye namani rubun krubäte yebätä niaratre ribebare rei ie rabadre Jeremías murie kete. Niaratre törbadre dre nuainbätä ye erere rabadre nuainne niebare reikwe ietre. Aisete Jeremías nakani ietre aune kitani kwetre kämäkä te dobro okwä nämene yete ne kwe krütadre. Bätärekä bätärekä, Jeremías jatani niken dobro okwäte nguse.

Ye ngwane ni sribikä gobranbe kädeka nämene Ébed-Mélec yekwe niebare rei ie: ‘Nitre ütiäte yekwe Jeremías kitani kämäkäte. Nikwe tuainmetre yete angwane, niara krütai’. Rei niebare Ébed-Mélec ie niara rabadre niken nitre 30 ngwena jabe aune rabadre Jeremías denkä kämäkä yete. Kukwe tare namani bare Jeremías yebätä akwa kukwe driebare jankunu kwe. ¿Mä tö ja tuai niara erere?