Rei Nabucodonosor ni nire üai kri tuani köböre ye bitikäre, jondron üai kri sribe manabare kwe orore. Jondron ye mikani kwe kä kiare kädeka nämene Dura yekänti aune nitre ütiäte ye jökrä ükaninkrö kwe aune nitre ye ngätäite Sadrac, Mesac aune Abednego nämene arato. Rei kukwe ne ribebare: ‘Trompeta, arpa aune gaita ye ngö jurua munye angwane munkwe ja mika ngukodokwäbiti jondron üai yei. Nire käkwe ñaka nuaindi ye kitai ñukwä jutra ngitiekä yete’. ¿Dre namani bare raba ruin mäi? ¿Nitre hebreo nimä ye ja mikani ngukodokwäbiti jondron üai yei raba ruin mäi? ¿O Jehová aibe mikani täte kwetre?

Musika täkädre niebare reikwe. Nitre jökrä käkwe ja mikani ngukodokwäbiti aune jondron üai sribebare ye mikani täte kwetre. Akwa Sadrac, Mesac aune Abednego käkwe ñaka ye nuainbare. Nitre ruäre käkwe niaratre tuani aune niebare kwetre rei ie: ‘Nitre hebreo nimä ñaka tä jondron üai sribebare mäkwe ye mike täte’. Nabucodonosor käkwe nitre juani monsotre bati nimä ye kärere aune niebare kwe ietre: ‘Tibike kä bienta munye ne kwe jondron üai sribebare ye munkwe mikadre täte. Munkwe ñaka nuaindi angwane, tikwe mun kitai ñukwä jutra ngitiekä yete. Ngöbö ñaka tärä jire iti mun mikakäre kwäre ti kisete’. Niaratre käkwe niebare ie: ‘Kä biandreta nunye ye nun ñaka tä ribere jai. Ngöbö nunkwe raba nun mike kwäre. Ñaka nun mikai kwäre kwe akwa nunkwe ñaka jondron üai ye mikai täte’.

Nabucodonosor namani bäri rubun krubäte. Niara niebare nitre sribikä kwe yei: ‘¡Ñukwä ye mike ngire bä kükü bäri käne ye kräke!’. Ye bitikäre, nitre rükä kwe ye  juani kwe: ‘Nitre ye kise mäke aune kite ñukwä ngire yete’. Ñukwä trä namani ngire krubäte yebätä nitre rükä ye namani ken angwane krütani bengwairebe. Nitre hebreo nimä ye kitani ñukwä ngire yete. Ye bitikäre, Nabucodonosor nikrabare angwane, nitre ñaka nämene nimä, ñakare aune nitre nämene nibokä dikekä ñukwä ngire yete ta jutuabare ie. Kä jürä namani krubätebätä aune nitre nämene niara dimike yei ngwantaribare kwe: ‘¿Nikwe ñan nitre nimä aibe kiti ñukwä ngire yete ya? Nibi tuin nibokä tie, ¡iti ye nibi tuin ángel kwrere tie!’.

Nabucodonosor krötabare bäri ñukwä ngire ye ken aune ñäkäbare kwe: ‘¡Nitre Ngöbö Kri kä kwinbiti mikaka täte, näin küken!’. Sadrac, Mesac aune Abednego jatani küken ñukwä ngire yete aune niaratre ñaka nämene nukwani jire yebätä nitre jökrä käkwe niaratre tuani ye töi namani ñan krütare. Niaratre kwata, dokwä drüen, dän, ñaka nukwani jire aune niaratre rä ñaka nämene ngübüre.

Nabucodonosor niebare: ‘¡Ngöbö Sadrac, Mesac aune Abednego yekwe ye ti töi miri ñan krütare! Niara ángel kwe juni niaratre mikakäre kwäre. Ngöbö mada ñaka tärä Ngöbö niaratrekwe ye erere’.

Dre dre rabadre bare yebiti ta nitre hebreo nimä ja töi mikani kwatibe ja ngwen metre Jehovai. ¿Mä tö ja ngwain metre niaratre erere?