José aune María nämene nüne Nazaret, Jesús aune ngäbriänkä mada yebe. José nämene sribire kri yebätä mräkätre ngübakäre. Ne madakäre, Jehová aune Kukwe Biani Nuaindre kwe ye José nämene driere ietre. Nitre ja mräkäre ye käre nämene niken sinagoga ne kwe rabadre Ngöbö mike täte aune nämenentre niken Jerusalén Pascua käi ngwankäre juto jabätä.

Jesús yebiti kä namani 12 ye ngwane, niara mräkätre ye käkwe nänbare mente kä Jerusalén yekänti, nämenentre nuainne käre ye erere. Juta yete nitre namani kwati krubäte nitre ye nämene Pascua käi ngwankäre juto jabätä arato. Fiesta ye mikani krüte ye ngwane, José aune María nikaninta ja gwire kokwäre niaratre nämene nütüre Jesús nämene näin niaratre mräkä ye ngätäite. Akwa Jesús känänbare kwetre nitre ye ngätäite aune ñaka kwani ietre.

Aisete niaratre nikaninta Jerusalén aune köbö nikani köbömä ta niaratrebiti ngobo ye känänbätä. Mrä mada, kwani ietre templote. Yete Jesús nämene täkänintubu nitre dirikä ye ngätäite, niara nämene nitre ye kukwe nuin kwin aune nämene kukwe ütiäte ngwentari ietre. Jesús nämene  kukwe niere ye namani nitre dirikä ye töi mike ñan krütare yebätä niaratre namani kukwe ngwentari ie, Jesús namani kukwe mike gare ietre ye niaratre töi mikani niä. Kukwe Biani Nuaindre Jehovakwe ye nämene nüke gare kwin ie namani tuin nitre yei.

José aune María nämene töbike krubäte. María niebare: ‘Monso tikwe, nunta mä känene kä jökrä känti. ¿Mä nämä medente?’. Aune Jesús niebare ie: ‘¿Ti tädre ti Rün juete ñaka gare munye ya?’.

Jesús nikaninta rün aune meye ben kä Nazaret yekänti. Sribidre ño kri yebiti ye José driebare Jesús ie kä yekänti. ¿Dre namani bare raba ruin mäi? ¿Jesús nämene monsore ye ngwane nämene ja ngwen ño raba ruin mäi? Jesús jatani nirien jankunu aune jatani bäri töbätä. Ye medenbätä, Ngöbö aune nitre nämene niara tarere bäri köbö kwatire kwatire.