Ja ketamuko kwin nimä nämene Jesukwe kä Betania yekänti. Lázaro aune ngwai nibu kwe María bätä Marta nämene nüne yete. Bati, Jesús nämene ñö Jordán ye kwäräkri angwane, María bätä Marta käkwe kukwe juani jötrö Jesús ie: ‘Lázaro tä bren krubäte. Mä raba kite jötrö ngwarbe’. Akwa Jesús ñaka nikani bengwairebe. Köbö nikani köböbu ta aune ye bitikäre niebare kwe nitre ja tötikaka kwe yei: ‘Brän kä Betania yekänti. Lázaro tä kübiani aune tibike niken gainkrö’. Nitre apóstol niebare ie: ‘Lázaro tä kübiani angwane niara rabaita räre’. Yebätä Jesús kukwe ye mikani gare bäri metre ta ietre: ‘Lázaro tä ngwakare’.

Jesús namani Betania ye ngwane, köbö köböbokära Lázaro nämene ngwakare dobote. Nitre kwati krubäte janamene María bätä Marta töi miketa jäme. Jesús nükani ye namani gare Marta ie aune nikani betekä blitakäre ben. Niebare kwe ie: ‘Ti Däkien, mä tädre nete akräke, ti ngwai ñaka krütadre’. Jesús niebare ie: ‘Mä ngwai rükaita nire. ¿Ye era mä kräke ya Marta?’. Marta niebare ie: ‘Niara gaikröta ja känenkäre ye gare tie’. Angwane Jesús niebare ie: ‘Ti abokän nitre krütanina gakrökä aune ja nire bianka ie’.

Ye bitikäre Marta mikani gare María ie: ‘Jesús nämene yete’. María nikani betekä Jesús känti aune nitre nikani niara jiebiti. María namani Jesús känti ye ngwane nikani ngitiekä tibien ngotobätä aune namani muen krubäte. Niebare kwe ie: ‘Ti Däkien, mä tädre nete akräke, ti ngwai tädre nire’. María nämene ulire krubäte namani tuin Jesús ie yebätä muabare kwe arato. Jesús nämene muen jutuabare nitre ie aune namanintre niere: ‘Erametre Lázaro nämene tare krubäte Jesukwe’. Akwa nitre ruäre namani ngwentari jai: ‘¿Ñobätä ñaka ja ketamuko kwe ye kriemikani kwe?’. ¿Jesús dre nuainbare?

Jesús nikani dobobiti aune jä nämene mikani kä mäkä yebiti. ‘Jä ye denkä’ niebare kwe. Marta niebare ie: ‘Rä nibira küre, ñobätä ñan aune köbö nikanina köböbokära ta’. Akwa yebiti ta, nitre käkwe jä ye dianinkä aune Jesús orabare: ‘Ti Rün, mätä ti kukwei nuin yebätä tita debe bien mäi. Käre mätä ti kukwe nuin ye gare tie, akwa tita blite ne kwe ti kukwei juruadre nitre tä nete yei aune mäkwe ti juani ye rabadre gare ietre’.  Angwane ñäkäbare ja dibiti kwe: ‘¡Lázaro, jakwe küken!’. Batibe, jondron ñan tuabare namani bare: Lázaro nämene dobote jataninta kä mrebiti nämene minianinte dänkwäte. Jesús niebare: ‘Dänkwä metetebätä aune tuenmetre niken’.

Dre namani bare ye nitre kwati krubäte käkwe tuani angwane namanintre tödeke Jesús ie, akwa nitre ruäre nikani kukwe ye mike gare nitre fariseo ie. Köbö yete ja käne, nitre fariseo namani töbike ño raba Lázaro aune Jesús murie kete. Nitre apóstol 12 ye iti, kädeka nämene Judas Iscariote janamene tiebe nitre fariseo känti kukwe ngwentari ietre: ‘Tikwe mun dimikadre Jesús kain ngite, ¿ye ütiäre munkwe ngwian biandre nuäi tie?’. Ngwian mününe 30 käbämikani kwetre ie aune ye namani debe Judás kräke aune ñongwane raba Jesús kite ngise ietre yebätä namani töbike.