Jesús nämene kukwe driere ye käi nikani kwati biti ötare ta angwane kukwe ütiäte krubäte namani diandre ie. ¿Nire nire dianinkä kwe sribikäre bäri jabe aune konkrekasion kristiano jie ngwankäre? Jesús jämi kukwe ye den nuaindre jai känenkri, ja di käräbare kwe Jehovai. Ye medenbätä, nikani kaibe kä tokwäte aune dibire ta orabare kwe. Jetebe se kwrere, Jesukwe nitre ruäre ja tötikaka kwe ye ükaninkrö aune nitre apóstol 12 dianinkä kwe. ¿Niaratre ye ruäre kä gare mäi? Niaratre kädeka nämene Pedro, Andrés, Santiago, Juan, Felipe, Bartolomé, Tomás, Mateo, Santiago abokän Alfeo ngobo, Tadeo, Simón aune Judas Iscariote.

Nitre 12 ye nämene dikekä Jesube. Niaratre kukwe driedre ño ye driebare kwe ie aune mrä mada niaratre juani kukwe driere kaibe kwe. Ne madakäre, Jehovakwe ja di biani ietre ne kwe niaratre rabadre chokali juentari mento aune nitre bren miketa räre.

Jesús kräke nitre apóstol 12 ye nämene tuin ja ketamuko kwe aune niara nämene tö ngwen ietre. Nitre fariseo nämene nütüre nitre apóstol ye ni ngwarbe aune kukwe ñaka gare ietre ye kwrere.  Akwa Jesús ie niaratre ñaka nämene tuin ye erere. Niara nitre ye tötikani kwin sribi kwe nuainkäre. Niaratre tädi siba Jesube kukwe bäri ütiäte ye näire. Ñodre, niara murie keta jämi ye ngwane niaratre nämene yete aune ganinkröta ye ngwane nitre ye nämene yete arato. Niaratre ye jökrä bäsi nämene nüne kä Galilea yekänti, Jesús erere. Aune niaratre ruäre nämene ja mäkäninte.

Nitre apóstol töi nämene ngite, ye medenbätä kukwe nämene nainte ietre. Ruäre ngwane ñaka nämenentre töbike kwin blitakäre aune ruäre ngwane ñaka nämenentre kukwe kwin den nuaindre jai. Käre niaratre ñaka nämene kukwe ngübare bätärekä. Niaratre meden bäri ütiäte yebätä nämenentre ñäke jai arato. Akwa niaratre töi nämene kwin aune nämenentre Jehová tarere. Niaratre rabadre konkrekasion kristiano jie ngwen, Jesús ñaka rabadrera kä tibienbätä ye ngwane.