Juan nämene kukwe ne driere: ‘Ni mada bäri dite ti kräke ye köböra nüke’. Kä namani bäsi 30 Jesubiti ye ngwane, niara nikani Galilea ñö Jordán yekänti. Yete Juan nämene nitre ngökö ñöte. Jesús tö namani Juankwe ngökadre ñöte, akwa Juan niebare ie: ‘Ti ñaka raba mä ngökö ñöte. Mä ye ara käkwe ti ngökadre ñöte’. Jesús niebare ie: ‘Mäkwe ti ngökadre ñöte yei Jehová tö’. Aisete, niaratre nikani ñö Jordán yete aune Juan käkwe Jesús kriabare täte ñöte.

Jesús jataninta ñöte kwin ye bitikäre orabare kwe Jehovai. Angwane kä kwin namani ñäkänintubu aune Ngöbö üai deme ye jatani ütü kwrere niarabiti. Angwane Jehová blitabare kä kwinbätä: ‘Mä ti Ngobo tikwe mä tare krubäte tikwe. Tita mä kain ngäbiti’.

Üai deme Jehovakwe namani ye erere Jesubiti aune yete ja känenkäre namani Kristo o Mesías. Jehovakwe sribi biani ie nuaindre kä tibienbätä ye kräke niara namanina juto biare.

Jesús ngökabare ñöte ye bätäräbe nikani kä ngwarbe nötare yekänti aune nämene yete köbö 40 te. Nükaninta ye ngwane nikani Juan känti. Jesús jatani jutuabare Juan ie aune niebare kwe: ‘Ni se abokän Cordero Ngöbökwe niara tä ngite denkä käbiti tibien’. Kukwe ye niebare kwe nitre dimikakäre mike nüke gare jai Jesús abokän Mesías. Jesús nämene kä ngwarbe nötare yekänti angwane, ¿dre namani barebätä gare mäi? Ani mike gare jai.